په کندهار کې يوې انتحاري حملې دوه ملکيان ووژل او درې نور يي ټپيان کړل.
د کندهار د والي ویاند عزيز احمد عزيزي ازادي راډيو ته وويل چې حمله کوونکي د کندهار د عينو مېنې پر درېيم سړک ځانته چاودنه ورکړې ده چې له امله یې دوه ملکي کسان وژل شوي او درې نور ټپيان شوي دي.
عزيزي وویل چې بريدګر د امنیتي ځواکونو تر تعقيب لاندې و او هدف ته تر رسېدو مخکې يې ځان پورې تړلو چاودېدونکو توکو ته چاودنه ورکړه.
د والي وياند ونه ويل چې د حمله کوونکي هدف کوم ځای و، خو تر دې مخکې يوې باوري امنیتي سرچينې ازادي راډيو ته ويلي وو چې بريد د بلوڅ توکمو پر يوه کور ترسره شوی دی.
د دې حملې مسؤليت تر اوسه چا نه دی منلی.