د لاسرسي لېنکونه

تازه خبر
چهارشنبه ۱ لړم ۱۳۹۸ کابل ۰۱:۰۳

د ملګرو ملتونو امنیت شورا د ایران د توغندیو د پروګرام په اړه بحث کوي


د ملګرو ملتونو امنیت شورا به نن په غونډه کې د ایران د منځني واټن ویشتونکو توغندیو د پروګرام په اړه بحث وکړي.

د ملګرو ملتونو امنیت شورا نن د تړلو دروازو تر شا په غونډه کې د ایران د بالیستیک توغندیو پر دغه پروګرام بحث وروسته له هغې کوي چې ډیپلوماتانو په‌دې وروستیو کې ایران د دغو توغندیو پر نوې ازموینې تورن کړ.

د امنیت شورا نننۍ غونډه د فرانسې او بریتانیا په غوښتنه رابلل شوې ده.

  • امریکا

د امریکا متحده ایالاتو وویل چې ایران د تېرې شنبې په ورځ د دغو توغندیو چې مختلف سروکې لېږدولی شي، نوې ازموینه ترسره کړه چې هغه د ایران د اټمي تړون په اړه د ملګرو ملتونو د ۲۰۱۵ میلادي کال له پرېکړه‌لیک څخه سرغړونه ده.

واشنګټن له دغه تړونه وتلی دی.

دغه پرېکړه‌لیک له ایرانه غواړي چې د هغو توغندیو له ازموینې لاس واخلي چې اټمي وسلې لېږدولی شي.

  • فرانسه

فرانسې وویل چې د تهران له‌خوا ترسره شوې ازموینې ته اندېښنه لري او د بهرنیو چارو وزارت‌یې هغه یو لمسوونکی او بې‌ثباته کوونکی اقدام بللی چې په خبره‌یې دغه ازموینه له ایران سره د شوې معاملې په اړه د ملګرو ملتونو د ۲۲۳۱م پرېکړه‌لیک سره سر نه‌خوري.

  • بریتانیا
    د بریتانیا د بهرنیو چار وزیر جرمي هانټ
    د بریتانیا د بهرنیو چار وزیر جرمي هانټ
    د بریتانیا د بهرنیو چاروزیر جرمي هانټ هم د میزائیلو دغه ازموینه پارونکې، ګواښوونکې او له پرېکړه‌لیک څخه سرغړوونکې بللې او غوښتنه‌یې کړې چې دا ډول ازموینې باید بندې شي.

خو ایران په ټینګار سره ویلي چې د توغندیو پروګرام‌یې یوازې دفاعي اهداف تعقیبوي او د اټمي وسلو د لېږدولو لپاره نه‌دي پلان شوي.

د ملګرو ملتونو په امنیت شورا کې روسیه د ایران د دغه دریځ ملاتړ کوي.

د ایران لپاره د امریکا ځانګړي استازي برایان هوک له اروپایي اتحادیې غوښتي چې د ایران د میزائیلو د پروګرام په خاطر پر تهران بندیزونه ولګوي.

برایان هوک
برایان هوک

د امریکا د بهرنیو چارو وزیر مایک پامپیو به هم په‌دې اړه په بروکسل کې له خپلو اروپایي سیالانو سره خبرې وکړي.

متحده ایالاتو د روان کال په مې میاشت کې د نړۍ له قدرتونو سره د ایران د ۲۰۱۵ میلادي کال له اټمي تړونه د وتلو اعلان وکړ او د اروپایي شریکانو خلاف‌یې پر دې هېواد بندیزونه بېرته ولګول.

د دغه تړون پاتې پنځو لاسلیک کوونکو، بریتانیا، چین، فرانسې، جرمني او روسیې د دغه تړون په ملاتړ د اروپایي اتحادیې د هغو هڅو هم ملاتړ کړی چې له ایران سره د سوداګرۍ اړیکو د ساتلو لپاره د پیسو د انتقال لپاره یو ځانګړی سیستم رامنځته کوي.

XS
SM
MD
LG