د بالیوډ پېژندل شوې هنرمنده پریانکا چوپرا به نن یکشنبه د ډسمبر ۲مه، له امریکايي سندرغاړي نېک جوناس سره د هندوانو په یوه مذهبي دستور واده وکړي.
نېک جوناس او پریانکا چوپرا پرون د عیسویانو له دود سره سم، واده وکړ.
دا مراسم ډېر مختصر و او د هغوی یو شمېر نېږدې ملګرو او د کورنیو غړو ګډون پهکې کړی و.
نېک جوناس عیسوی او پریانکا چوپړا هندوه ده.
پریانکا چوپړا پر ټوېټر لیکلي:
"داسې دوه کورنۍ چې د یوه او بل مذهبي او کلتوري ارزښتونو عزت کوِ سره یوځای شوي او دا زموږ د واده ښکلې تحفه ده."
پریانکا چوپړا ۳۶ کلنه او نېک جوناس ۲۶ کلن دی.
پردې چې ناوې لس کاله پر زوم مشره ده، د هند او امریکا په رسنیو کې تر ډېرې مودې بحثونه وشول.
د نېک او پریانکا د هندو واده لپاره په جهودپور ښار کې د امېدبهون پلاس Umaid Bhavan Palace ماڼۍ نیول شوې ده.
امېدبهون پلاس د جهود پور د شاهي کورنۍ پلرنۍ قصر یا ماڼۍ ده چې له یوې برخې یې هوټل جوړ کړی دی.
د رويټرز خبريال وايي چې د دې ماڼۍ شاوخوا ته تقریباً ۲۶ هکټاره باغ دی چې طاوس او نور ښکلي مرغان پهکې اوسېږي او ښکلې منظره لري.
د رالف لورېن په نوم د کالیو معروفې کمپنۍ پرون پر ټوېټر ولیکل چې پریانکا او نېک د خپل عیسوي واده لپاره د دوی کالي اغوستي وو.
خو د هند رسنۍ وايي چې د هندو واده لپاره پریانکا او نېک جوناس د هندي ډيزاینر، سبیا ساچي له مغازې جامې واغوندي.
د هند د مشهور کرکټر ویراټ کوهلي او انوشکا شرما او همدا راز د بلې مشهورې فلمي جوړې، رنویر سنګه او دپيکا پدکونې د واده ورځې کالي هم سبیا ساچي جوړ کړي وو.
هندي رسنیو ویلي چې د نیک او پریانکا چوپړا د واده رسېپشن یا عمومي مراسم راتلونکې اوونۍ په نوي ډيلي کې جوړېږي.