د امریکا متحده ایالاتو نورو هېوادونو ته خبرداری ورکړی چې د ایران د تیلو ټانکرونه خپلو بندرونو ته پرینهږدي.
د دغه وزارت چارواکي وایي، دغه اقدام به نه یوازې د امریکا د بندیزونو سره سم دغه هېوادونه له مجازاتو سره مخامخ کړي، بلکه کیدای شي چاپیریالي ستونزې هم رامنځته شي.
امریکایي چارواکي پهخپله د ایران له لوري داسې اقداماتو ته اشاره کوي چې د دوی په باور دغه هېواد د امریکا د نویو بندیزونو د سرغړونې هڅه کوي.
د ایران لپاره د امریکا ځانګړی استازی وایي، د امریکا د بهرنیو چارو وزارت داسې شواهد لري چې ښیې ایراني کښتۍ هڅه کوي د امریکا بندیزونو څخه سرغړونه وکړي.
برایان هوک وایي، د ایران هڅه دا ده چې هغه وسیلې چې د ټکرونو د مخنیوي لپاره د موقعیت معلومولو په هدف په دغه ډول ټانکرونو کې کارول کېږي، تخریب کړي؛ څو پهدې ترتیب وکولی شي خپل مسیر پټ وساتي.
د هوک په خبره دغه تکتیک د سمندري امنیت لپاره یو ګواښ دی. دغه الې داسې جوړې شوي چې په سمندر کې د لیدو وړ وي او که دا وسیلې له کاره ولوېږي، نو یوازې د پېښو او تاوانونو د ډېرېدو لامل کیدای شي او پهدې صورت کې د ښاغلي هوک په خبره ایراني ټانکرونه چې یوازې پهخپله یې بیمه کړي دي او په یوه ناخوندي ډول له څو ټنه اومو تیلو سره سفرونه کوي، نو دواړه هم مالي او هم چاپیریاليستونزې رامنځته کولی شي.
د ایران لپاره د امریکا ځانګړي استازي برایان هوک ویلي، پهداسې حال کې چې د بیمې لوی شرکتونه د ایراني کښتیو د تاوان له ورکولو ووځي، نو ایران به په قوي احتمال خپلو کورنیو بیمې شرکتونو ته مخه کړي چې هغه شرکتونه به د ښاغلي هوک په خبره ونهشي کولی د ایراني کښتیو لپاره دغه تاوان چې میلیاردونو ډالرو ته هم رسېږي، پوره کړای شي.
وروسته له هغه چې امریکا د ایران د تیلو پر صادراتو او له دوی سره د بیمې پر شرکتونو بندیزونه ولګول، د امریکا د بهرنیو چارو وزارت نورو هېوادونو ته خبرداری ورکړی چې که هر هېواد لهدې بندیزه سرغړونه وکړي د امریکا لهخوا به له مجازاتو سره مخامخ شي.
برایان هوک زیاته کړه چې هېوادونه، بندرونه او خصوصي شرکتونه باید پهدې پوه شي چې د ایران له ټانکرونو سره د ټکر په صورت کې به تاوانونه پهخپله ورکوي.
که څه هم نوموړي هیله وښوده چې داسې کومه پېښه ونهشي، خو هغه یوه بېلګه یاده کړه چې په جنورۍ کې د چین په اوبو کې په یوه ورته لویه پېښه کې د ایران ټانکر شامل وو.
د امریکا متحده ایالاتو د نوومبر پر ۵مه نېټه د ایران د تیلو پر سکتور سخت بندیزونه ولګول، خو وروسته یې اتو هېوادونو ته چې د ایران د تیلو لوی پیریدونکي دي، تر شپږو میاشتو وخت ورکړ چې ورو- ورو دغه واردات صفر ته ورسوي.
چین، هند، یونان، ایټالیا، تایوان، جاپان، ترکیه او جنوبي کوریا هغه هېوادونه دي چې د واشنګټن لهخوا مؤقت معافیت ورکړل شوی دی.
