د امریکا د کانګرس لپاره په منځمهاله انتخاباتو کې د دې هېواد د جمهوري غوښتونکو او ډموکراتانو ترمنځ سیالي نږدې او توده ده.
د دواړو ګوندونو کاندیدان د استازو د مجلس د ۴۳۵ څوکیو او د سنا د مجلس له سلو څوکیو څخه د ۳۵ څوکیو لپاره خپلو کې سیالي کوي.
د امریکا د ډموکرات ګوند هڅه دا ده، څو د امریکا د استازو په مجلس کې له جمهوري غوښتونکو څخه د اوس په مقایسه ۲۳ اضافي څوکۍ وګټي.
دا مهال ډموکراتان د استازو په مجلس کې ۱۹۳ څوکۍ لري او جمهوري غوښتونکي بیا پهدې مجلس کې د ۲۳۵ څوکیو په لرلو اکثریت دي.
امریکايي وګړي د خپلو استازو په انتخاب سربېره، ۳۶ والیان او تر شپږ زرو زیات د ایالتي شوراګانو غړي هم ټاکي.
د استازو په مجلس کې د اقلیت ډموکراتانو مشرې نانسي پلوسي پرون د سې شنبې په ورځ «۱۳۹۷ کال د لړم ۱۵» وویل چې که په کانګرس کې یې اکثریت ترلاسه کړ، دوی به د جمهوري غوښتونکو کارونه تکرار نهکړي.
نوموړې زیاته کړه:
"موږ په جمهوري غوښتونکو پسې نهوو، هسې چې دوی په موږ پسېوو. موږ ډموکراتان یوو او ډموکراتان به یو پرانیستی او شفاف کانګرس ولري. داسې څه چې د شراکت غوښتونکي به یوو او داسې کانګرس چې زموږ د بنسټ ايښودونکي هغو هیلو ته به درناوی کوي چې د یووالي لپارهیې درلودې."
ویل کېږي چې د نومبر د شپږمې نېټې د انتخاباتو نتایج به د ولسمشر ډونالد ټرمپ د ولسمشرۍ په دوه کاله پاتې مودې اغېزې ولري.
ولسمشر ټرمپ بیا په هېڅ صورت د امریکا د استازو په مجلس او سنا کې د ډموکراتانو د ممکن اکثریت ترلاسه کولو لپاره خوښ نهدی.
ولسمشر ټرمپ پهدې برخه کې یو مورد ته په اشارې وویل:
"که ډموکراتان واک ته ورسېږي، لومړنۍ پروژه بهیې د امریکا د روغتیايي خدماتو پر غاړه اخیستل وي. پوهېږئ چې له دې سره څه پېښېږي؟ ستاسو مالیه به درې چنده او یا ښايي څلور چنده شي چې تاسو به خوشاله نهیئ."
جمهوري غوښتونکو د امریکا د استازو په مجلس کې د ۲۰۱۶ میلادي کال په انتخاباتو کې اکثریت ترلاسه کړ.
د دې انتخاباتو په نتیجه کې ولسمشر ډونالد ټرمپ هم انتخاب شو.
د امریکا پهدې دوره انتخاباتو کې د کانګرس د دواړو خونو لپاره تقریباً ۲۶۰ ښځې هم کاندیدې دي چې دا شمېر بېساری دی.
ټاکل شوې د امریکا د دې انتخاباتو لومړني نتایج د رأی ورکولو د وروستي مرکز په تړل کېدو سره د واشنګټن په وخت د شپې په ۱۲ بجو چې د کابل په وخت نن سهار نهه نیمې بجې کېږي اعلان شي.