د ترکیې جمهور رئیس رجب طیب اردوغان وايي، په استانبول کې د سعودي عربستان په قونسلګرۍ کې د یوه سعودي خبریال د مرموزې وژنې په اړه د څارنوالانو وروستي راپور ته په تمه دی.
پرون یکشنبه نیویارک ټایمز او روېټرز ته ترکي سرچینو راپور ورکړی چې جمال خاشُقجي د سعودي عربستان په قونسلګرۍ کې وژل شوی دی.
د ترکیې جمهور رئیس رجب طیب اردوغان ویلي چې څېړنې روانې دي او جزئیات به ټولې نړۍ ته واضح کړای شي.
د ترکیې جمهور رئیس رجب طیب اردوغان
نوموړي زیاته کړه:
"د ترکیې د جمهور رئیس په توګه دا موضوع زه شخصاً تعقیبوم او نتایج بهیې ټولې نړۍ ته وړاندې کړم. هر څه قونسلګرۍ ته د تګ راتګ په شمول څېړل کېږي. همداراز به له هوايي میدانونو ټول پروازونه او ناستې هم وڅېړل شي."
د ترکیې د ولسمشر یوه سلاکار ياسين اقتاى پرون ویلي چې په اغلب ګومان د سعودي عربستان يوه ١٥ کسيزه ډله پهدې قضيه کې لاس لري.
یوه بل ترکي چارواکي چې نومیې نهدی اخیستی ویلي چې جمال خاشُقجي ښايي هغې ډلې چې سعودي ورته ګمارلې وه وژلی وي.
جمال خاشُقجي چې پخوا په سعودي کې د یوې ورځپاڼې اېډېټر و تېر کال خپل هېواد پرېښود او ویېویل له هغه غچ وېرېږي چې ښايي د ریاض په پالېسیو د ده د انتقادونو په خاطر ورته متوجې وي.
جمال خاشقجي
خاشُقجي د اکټوبر په دوهمه د خپل واده لپاره د یوه سند په خاطر په استانبول کې د سعودي عربستان قونسلګرۍ ته ورغلی و.
کوژدنهیې چې ورسره د قونسلګرۍ تر دروازې ورغلې وه څو ساعته له ودانۍ دباندې ناسته وه او خبریالانو تهیې ویلي و چې کوژدنیې بېرته رانهغی.
په استانبول کې د سعودي عربستان د قونسلګرۍ یوه چارواکي چې نومیې نهدی ښودلی د جمال خاشُقجي د قضیې په تړاو تورونه بېځایه بللي او د شهزاده محمد بن سلمان له قولهیې ویلي:
"موږ هېڅ شی د پټولو لپاره نهلرو."
د ترکیې د بهرنیو چارو وزارت پرون یکشنبه ویلي چې په انقره کې یې د سعودي سفیر احضار کړی او د سعودي خبریال جمال خاشُقجي د لادرکه کېدو په اړهیې سپیناوی ترې غوښتی.
په استانبول کې د سعودي د حکومت د منتقد خبریال د وژنې قضیه داسې وخت بحث پارونې شوې چې تر دې مخکې هم د ریاض او انقرې اړیکې چندانې ښې نهدي بلل شوي.
راپور: صفيالله ستانکزی
