د ترکيې د ولسمشر يو سلاکار وايي په دې باور دى چې د سعودي عربستان يو پېژندل شوى ژورناليست چې له شپږو ورځو راهيسې ورک دى، په استانبول کې د سعودي په قونسلګرۍ کې وژل شوى دى.

ياسين اقتاى رويټرز خبري اژانس ته وويل، ترکي چارواکي په دې باور دي، چې په اغلب ګومان د سعودي عربستان يوه ١٥ کسيزه ډله په دې قضيه کې لاس لري.

تر دې مخکې د ترکيې ځينو سرچينو ويلي وو، فکر کوي جمال خاشُقجي، چې د سعودي د وليعد شهزاده بن سلمان له منتقدانو و، ښايي په قونسلګرۍ کې وژل شوى وي.

يوه چارواکي چې نوم يې نه دى اخيستل شوى ويلي، دغه خبريال د سعودي عربستان د هغې ډلې له خوا وژل شوى، چې په مشخص ډول د وژنې لپاره لېږل شوې وه.

خو په استانبول کې د سعودي عربستان د قونسلګرۍ يوه چارواکي دغه تورونه بې اساسه وبلل او ويې ويل، د خاشقجي د ورک کېدو د څېړنې لپاره د سعودي يو امنيتي هيئت استانبول ته ورغلى دى.

د خیبرپښتونخوا په ډیری اسماعیل خان سیمه کې نن مازیګر د پولیسو پر یوې امنیتي پوستې په چاودنه کې لږترلږه یولس کسان وژل شوي او تر ۳۰ ډیر ټپیان شوي دي.

د پولیسو چارواکو په سیمه کې د ازادي راډيو خبریال ته تایید کړې چې چاودنه درازنده سیمه کې امن میلې امنیتي پوستې ته نژدې شوې ده.

دا سیمه د خیبرپښتونخوا او بلوچستان ترمنځ لویه لار ده.

لومړني راپورونه ښيۍ چې له چاودونکو توکو ډک موټر د پولیسو پر پوسته ورغلی او چاودنه يې کړې ده.

دا پوسته په سیمه کې یو ګمرګ ته نژدې ده.

د ۱۱۲۲ په نوم د ژغورنې اداره وايي چې په وژل شویو کې د ګمرګ شپږ کارکوونکي، او پنځه ملکیان چې دوه تنه يې ښځې، دوه يې نارینه او یو ماشوم شامل دي.

دې ادارې ویلي چې ټپیان روغتون ته انتقال شوي دي.

په پاکستان کې د پخواني صدراعظم عمران په ملاتړ لاریونونه د یوې اوونۍ لپاره وځنډول شول.

رویترز خبري اژانس نن شنبه د (سپټمبر۲۶مه) د خیبرپښتونخوا د اعلی وزیر او د تحریک انصاف ګوند (پي ټي ای) غړي سهیل افریدې په حواله ویلي،"د لاریونونو ځنډول زموږ د ستراتیژي یوه برخه ده، موږ باید د پاکستان فډرالي حکومت ستړی کړو".

افریدې وړاندې ویلي چې دغه لاریونونه د اکټوبر۴مې ته ځنډول شوي دي.

پي ټي ای د عمران په ملاتړ سبا یکشنبې د اسلام اباد په ګډون د پاکستان په لویو ښارونو کې پراخ لاریونونه پلان کړي وو.

پاکستاني چارواکو فرانس پریس خبري اژانس ته ویلي چې د دې لاریونونو لپاره يې په اسلام اباد کې ۲۲زره امنیتي ځواکونه او دوه پوړییز کانتیرونه ځای پرځای کړي دي.

د چارواکو په خبره، د پېښور او اسلام اباد ترمنځ ټولې لارې تړل شوي او د خلکو تګ راتګ له ستونزو سره مخ دی.

۷۳کلن عمران خان له ۲۰۲۳کال راهیسې د مالي فساد، د حکومت ضد د خلکو پارولو او یو شمیر نورو قضیو په تور په زندان کې دی.

عمران خان پر ځان لګیدلي ټول تورونه ردوي او وايي چې دا قضیې سیاسي انګیزه لري.

په منځني ختیځ کې د امریکا مرکزي قوماندانۍ (سنټکام) پرون جمعه وویل، د ایران د سمندري محاصرې د دویم پړاو له پیل راهیسې يې ۱۲۲ سوداګریزې بیړۍ اړ کړي چې خپل مسیر بدل کړي.

د سنټکام دې اقدام د ایران د تیلو صادرات تقریبا په ټپه درولي دي.

امریکا د ایران د سمندري محاصرې دویم پړاو په تیره سرطان میاشت کې وروسته له هغه پیل کړ چې په هرمز تنګي کې د تیلو پر څو ټانګرونو بریدونه وشول.

په عین حال کې یو امریکايي چارواکي رویترز خبري اژانس ته ویلي چې د میزان له پیل راهیسې شاوخوا۶۰ سوداګریزې بیړۍ له هرمز تنګي تیرې شوي دي.

د دغه چارواکي په خبره، په وروستیو میاشتو کې دا لومړی ځل و چې په دې شمیر د خامو تیلو ډیرې سوداګریزې کښتۍ له دې تنګي تیرې شوې.

ایران او امریکا دواړه پر هرمز تنګي د کنټرول ادعا لري.

پر ایران د امریکا له بریدونو مخکې له تنګي د نړۍ نژدې یوه پر پنځمه برخه تیل تیریدل.

د طالبانو د حکومت د کورنیو چارو وزارت وايي، په هرات ولایت کې يې هغه کس نیولی دی چې غوښتل يې ۵۸۰زره امریکايي ډالر ایران ته قاچاق کړي.

دغه وزارت نن شنبه پر خپلې ایکس پاڼې لیکلي چې دا کس د اسلام قلعه په بندر کې نیول شوی دی.

طالبانو د دې کس د هویت په اړه جزییات نه دي ورکړي.

طالبان په داسې حال کې ایران ته د امریکايي ډالرو د قاچاق د مخنیوي خبره کوي چې امریکا په وروستیو کې پر ایران سخت اقتصادي بندیزونه لګولي دي.

د امریکا د خزانې وزیر سکاټ بسنټ د ایران د "اقتصادي انزوا" په نوم د بندیزونو یوه لړۍ پیل کړې ده.

په وروستیو کې د ایران د هوايي چلند پر سکټور بشپړ بندیزونه ولګول شول چې له کبله يې ایران ته د شاوخوا ۹۰سلنه الوتنو مخه ونیول شوه.

له دې سربیره د ایران د تیلو او انرژۍ پر شریکونو او هغوو ایراني بانکونو هم بندیزونه لګول شوي له چې ایرانه د باندې فعالیتونه کوي.

امریکا پر هغوو اشخاصو هم بندیز لګولی چې غواړي ایران ته توکې وارد کړي.

اوسمهال په ایران کې د امریکايي ډالرو ارزښت ډیر لوړ دی چې یو امریکايي ډالر ۲۳۵۱ ایراني تومانه کیږي.

سعودي عربستان وايي، هوايي دفاعي ځواکونو يې نن شنبه د حوثي یاغیانو بې‌پیلوټه الوتکې او توغندي شنډ او له منځه وړي دي.

حوثیانو دا توغندي د ریاض پر سویل لوېدیځو سیمو توغولي وو.

د سعودي د حکومت په خبره، دوه بې‌پیلوټه الوتکو په ریاض کې یو شمیر سیمې هدف ګرځولي او دوه بالستیک توغندي د خمیس مشیط پر لور توغول شوي دي.

د حوثي یاغیانو سیاسي دفتر ویلي، دا بریدونه د "جګړې د پراخیدو لپاره لومړني اقدامات" دي.

د خلیج هېوادونو د همکارۍ د شورا منشي دغه بریدونه غندلي او هغه یې د سعودي عربستان د "حاکمیت ښکاره سرغړونه" او د ملکي وګړو امنیت او د سیمې ثبات ته ګواښ بللي دي.

په وروستیو کې حوثیانو د سعودي د تیلو پر تاسیساتو بریدونه زیات کړي دي.

د ایران له ملاتړه برخمنه د حوثي یاغیانو ډله په یمن کې سره سمندرګي ته څیرمه ټولې ساحلي سیمې کنټرولوي.

د ایران ولسمشر وايي چې تهران چمتو دی چې دخپلو یورانیمو د غنا کچه له ۶۰ سلنې راټیټه کړي او خپل اټومي پروګرام د څار او تصدیق لپاره پرانیزي.

مسعود پزشکیان دغه څرګندونې له فاکس نیوز شبکې سره په مرکه کې کړې دي چې د پنجشنبې په ماښام خپره شوه.

د یورانیمو د غني کولو کچه او د ایران د اټومي پروګرام د څار څرنګوالی د تهران او واشنګټن ترمنځ مهم اختلافي موضوعات دي. امریکا او متحدین یې اندېښمن دي چې له دې موادو څخه امکان لري د اټومي وسلو د جوړولو لپاره کار واخیستل شي.

په اسلام‌اباد کې د امریکا سفارت وايي چې پاکستاني چارواکو سره په همکارۍ یې د ۲۱ ملیونو ډالرو په ارزښت شاوخوا ۴۶۳ کیلوګرامه کرسټال مېتامفیتامین یا «شیشه» مخدر مواد کشف او ضبط کړي دي .

د امریکا سفارت د پنجشنبې په ورځ، پر خپله ایکس پاڼه وویل چې د دې محمولې اصلي سرچینه افغانستان وه او ټاکل شوې وه چې له پاکستان څخه سریلانکا ته ولېږدول شي.

د خبرپاڼې له مخې، د پاکستان د نشه‌يي توکو پر وړاندې د مبارزې ځواکونو د اګست له ۱۴مې تر ۲۹مې پورې د کراچۍ په بندر کې څو مشکوک کانټینرونه په نښه کړل او وپېژندل. دا عملیات د پاکستان او سریلانکا د نشه‌يي توکو پر وړاندې د مبارزې ادارو او په نوي ډیلي کې د امریکا د نشه‌يي توکو پر وړاندې د مبارزې ادارې د دفتر په همکارۍ ترسره شوي دي.

خو د طالبانو د حکومت د بهرنیو چارو وزارت ویاند عبدالقهار بلخي له افغانستان سره ددغو موادو تړاو رد کړ. هغه دجمعې په ورځ په خپله ایکسپاڼه وویل چې په افغانستان کې د نشه‌يي توکو تولید، قاچاق او استعمال منع دي او دغه هېواد د مصنوعي نشه‌يي توکو د تولید ظرفیت نه لري.

بلخي غوښتنه کړې چې د یادې محمولې د اصلي سرچینې په اړه دې پلټنه و شي.

دا په داسې حال کې ده چې د ملګرو ملتونو د نشه‌يي توکو او جرمونو پر وړاندې د مبارزې د دفتر د ۲۰۲۵ کال راپور ښيي چې په افغانستان کې د کوکنارو کرکیله او د تریاکو تولید کم شوي، خو افغانستان او سیمه کې د «شیشې» یا مصنوعي نشه‌يي توکو تولیداو کشف زیات شوی دی.

د پاکستان امنیتي سرچینې وايي ددغه هیواد د «ګلستان» سرحدي سیمه کې یې د افغانستان له لوري یو برید شنډ کړی او په نښته کې د طالبانو څو غړي وژل شوي دي.

پاکستاني سرچینو د جمعې په ورځ، د میزان په درېیمه، رویټرز خبري اژانس ته ویلي چې نښته د «ګلستان» په سرحدي سیمه کې شوې دي.

خو د طالبانو یوې باخبره سرچینې ازادي راډیو ته وویل پاکستاني پوستو څو ډزې وکړي چې ورته ځواب وویل شو او طالبانو ته مرګ ژوبله نه ده اوښتې.

خو ، افغان سیمه‌ییزو رسنیو تېره شپه د طالبانو د سرچینو په حواله راپور ورکړ چې طالب ځواکونو په «سپین بولدک» کې د پاکستان پر یوه امنیتي پوسته برید کړی دی.

دا په داسې حال کې ده چې پاکستان د پنجشنبې په ورځ سهار وختي په افغانستان کې پر ۱۰ سیمو هوايي بریدونه وکړل او وویل چې پوځي اهداف یې په نښه کړي دي.

د طالبانو حکومت ویلي چې د دغو بریدونو له امله په کندهار، پکتیا او خوست ولایتونو کې لږ تر لږه څلور کسان وژل شوي دي.

د طالبانو د حکومت ویاند ذبیح‌الله مجاهد دغه بریدونه په کلکه غندلي او ویلي یې دي چې طالبان به ورته په «مناسب وخت» کې ځواب ورکړي.

پاکستاني ځواکونو د تیرې دوشنبې په ورځ هم ، پر کونړ او پکتیکا ولایتونو هوايي بریدونه کړي وو.

د دواړو هېوادونو ترمنځ د تاوتریخوالي دغه زیاتوالی د څو میاشتو نسبي ارامۍ وروسته رامنځته کېږي.

تېره اوونۍ د پاکستان په کوهاټ کې د پولیسو په یو مرکز برید کې لږ تر لږه ۳۱ کسان ووژل شول.

اسلام‌اباد تور لګوي چې افغانستان کې د طالبانو حکومت هغو وسله‌والو ډلو ته پناه ورکړې چې په پاکستان کې بریدونه کوي. خو د طالبانو حکومت دا تور ردوي او وايي چې په پاکستان کې ناامني د دغه هېواد کورنۍ ستونزه ده.

د فرانسې ولسمشر د سعودي عربستان د نفتي تاسیساتو د ساتنې لپاره دغه هیواد ته د ځواکونو او پوځي تجهیزاتو د استولو خبر ورکړ.

ایمانویل مکرون د پنجشنبې په ورځ ( تلې دویمه) په یوه ټلویزیوني مرکه کې وویل چې پاریس دیمن د حوثیانو له بریدونو وروسته د ینبع د ستراتیژیک بندر د ساتنې لپاره عربستان ته ، «تجهیزات او ځواکونه» استوي.

هغه وویل :«مونږ ددغو تاسیساتو د ساتنې لپاره ، د ځواکونو ، رادار او دفاعي وسایلو په شمول تجهیزات استوو».

د فرانسې ولسشمر دا هم وویل چې دغه اقدام په نښته کې د ښکیلتیا په معنا نه دی بلکه یوازې «ددغه ځای د ساتلو لپاره دی».

ینبع بندر کې د سعودي عربستان د تیلو سترې ذخیرې او تفصیه خونې دي او ددغه هیواد د « ختیځ – لویدیځ» د پایپ لاین یوه برخه ګڼل کیږي.

د څه دپاسه ۱۲۰۰ کیلومیترو په اوږدوالي دغه پایپ لاین د ورځې د ۷ ملیون بوشکه تیلو د لیږد ظرفیت لري.

د یاد پایپ لاین فعالیت وروسته لدې چې دتیرې وږي میاشتې په شلمه د عراق له خاورې د ډرون برید ورباندې وشو په احتیاطي اقدام کې وځنډول شو.

د افغانستان پخواني ولسمشر حامد کرزي ته نږدې سرچینو د پنجشنبې په ورځ ازادي راډیو ته وویل چې له دوو ورځو راهیسې کابل کې د هغه کور ته د کسانو په تګ راتګ محدودیت لګول شوی دی.

سرچینې چې نه‌غوښتل نوم‌یې واخیستل شي زیاته کړه چې دغه محدودیت کندهار کې د طالبانو د مشرتابه له‌خوا وروسته له دې لګول شوی دی چې څو اوونۍ مخکې یې له هغه د بیعت او د طالبانو د حکومتوالۍ د ستاینې غوښتنه کړې وه، خو حامد کرزي په ځواب کې ورته ویلي و ترڅو چې د نجونو په زده‌کړو بندیز وي د حکومت ستاینه نه‌شي کولای.

د طالبانو حکومت په دې هکله د ازادي راډیو پوښتنو ته تر اوسه ځواب نه‌دی ویلي.

خو د افغانستان پخوانی ولسمشر حامد کرزی په خواله رسنیو کې فعال دی.

هغه د پنجشنبې په ورځ په خپله اېکس‌پاڼه په افغانستان باندې د پاکستان د تېرې شپې بریدونه وغندل.

په کندهار، خوست او پکتیا باندې دغو هوايي بریدونو کې د طالبانو د حکومت په وینا لږ تر لږه ۴ تنه ولسي کسان وژل شوي.

خو اسلام‌اباد وايي پوځي اهداف‌یې په نښه کړي دي.