پر ایران د امریکا نوي بندیزونه نن عملاً په داسې حال کې نافذ شول چې د واشنګټن او تهران ترمنځ ناندرۍ روانې دي.

په نویو بندیزونو کې د غالیو په ګډون د ایران د صنعتي تولیداتو د خرڅلاو لپاره د امریکايي ډالرو د پېرلو شرایط سخت شوي دي.

ولسمشر ډونالد ټرمپ تېره شپه یو ځل بیا له ایراني چارواکو سره د مخامخ لیدنې وړاندیز تکرار کړ او ویې‌ویل، دی چمتو دی د ایران د بالیستیک توغندیو په ګډون پر ټولو لانجمنو موضوعاتو له ایراني مشرانو سره مخامخ خبرې وکړي، خو ولسمشر حسن روحاني پرون پر دولتي ټلوېزیون په وینا کې دا وړاندیز رد کړ.

ښاغلي روحاني وویل د ټرمپ وړاندیز داسې دی لکه څوک چې خپل مقابل لوری په چاړه ووهي او بیا یې خبرو ته راوبولي.

له دې مخکې د ایران د بهرنیو چارو وزیر جواد ظریف ویلي و، امریکا د ایران پر وړاندې د سخت دریځ په خپلولو سره په خپله منزوي شوی دی.

• پخواني معلومات

د امریکا ولسمشر ډونالد ټرمپ پرون دوشنبې پر ایران د پراخو مالي بندیزونو د بیا انفاذ امر وکړ.

په دې بندیزونو کې د ایران د اسعارو د راکړې ورکړې او مهمې صنعتي برخې په نښه شوې دي.

ټرمپ دا بندیزونه درې میاشتې وروسته له هغه لګوي چې د ایران له اټمي تړون څخه د امریکا وتل یې اعلان کړل.

ټرمپ پرون په یوه بیان کې پر خپل پخواني دریځ ټینګار وکړ چې د ۲۰۱۵ کال اټمي موافقه یوه یو اړخیزه او ناوړه موافقه وه.

ښاغلي ټرمپ د نړۍ پر ټولو هېوادونو غږ کړی چې دا خبره روښانه کړي چې د ایران رژیم به یا خپل ګواښونکی او بې ثباته کوونکی چلند بدلوي او په نړیوال اقتصاد کې به مدغمېږي او یا به له اقتصادي انزوا سره مخامخ کېږي.

د ایران ولسمشر حسن روحاني پرون په یو وینا کې وویل ایران به د امریکا له بندیزونو سره سره په اټمي موافقه کې پاتې شي.

هغه وویل چې امریکا غواړي د ایران د ملت پرضد له رواني جګړې کار واخلي او د خلکو ترمنځ یې نفاق واچوي.

له دې مخکې د ایران د بهرنیو چارو وزیر جواد ظریف وویل، متحده ایالات د ایران پر وړاندې د سخت دریځ په خپلولو سره په خپله منزوي شوی دی.

په ایران کې پېل شوې مظاهرې اتمې ورځې ته وغځېدې.

راپورونه او خپرې شوې ویډیوګانې ښيي چې تېره شپه هم په بېلابېلو ښارونو کې اعتراضونه شوي دي.

له پولیسو سره د اخ او ډب راپورونه هم ورکړل شوي دي.

په ویډيوګانو کې لیدل کیږي چې امنیتي ځواکونه پر مظاهره کوونکو ساچمه یي ګولۍ او اوښکې بهونکی ګاز کاروي.

د هرانا په نوم د ایران د بشري فعالانو یوې مجموعې ویلي، د اعتراضونو له پېل راهیسې لږ تر لږه ۱۵ تنه وژل شوي دي.

اعتراضونه تیره یکشنبه د ایراني ریالو د بې ساري ښکته کېدو له کبله تهران کې پیل او لمن یې نورو ښارونو ته هم وغځېده.

د اوکراین ولسمشر ولودمیر زلنسکي وایي، کیف به دغه اونۍ د روسیې د جګړې " د چټکې پای ته رسونې " په هدف له اروپایي متحدانو سره دوه غونډې ولري.

لومړنۍ غونډه د فرانسې، جرمني او بریتانیا په ګډون د اروپایي هېوادونو د لوی درستیزانو ده چې نن دوشنبه ( د جدي ۱۵مه) د اوکراین په کوربه توب ترسره کیږي.

دویمه غونډه سبا سه شنبه د فرانسې د ولسمشر ایمانویل مکرون په کوربتوب جوړیږي چې د مکرون په ټکو اروپایي مشران به د اوکراین د امنیت لپاره " پخې " ژمنې په کې وکړي.

زلنسکي تر دواړو غونډو مخکې ویلي، هېواد یې هر ډول احتمالاتو ته چمتو دی.

دا په داسې حال کې ده چې رویټرز د کیف د ښاروال ویتالي کلیچکو په حواله ویلي چې تیره شپه هم روسیې پر کیف هوایي بریدونه کړي.

د دغو بریدونو د احتمالي زیانونو راپور لا تراوسه نه دی ورکړل شوی.

شمالي کوریا نن یکشنبه ( د جدي ۱۴) لږ تر لږه دوه بالستیک توغندي وتوغول.

دا توغندي له پلازمینې پیونګ یانګ څخه د جاپان او دواړو کوریاو ترمنځ پراته سمندر ته وتوغول شول.

دا توغونه پر وینزویلا د متحده ایالتونو له برید څو ساعته وروسته او داسې مهال وشوه چې د جنوبي کوریا مشر چین ته خپل دولتي سفر پيل کړ.

رویټرز لیکلي، دا له تیرو دوو میاشتو راهیسې لومړی ځل دی چې شمالي کوریا دغه ډول توغندي توغوي.

برتانیا او فرانسې د یکشنبې په ورځ (د جدې ۱۴مه) اعلان وکړ چې دوی په سوریه کې د اسلامي دولت ډلې یا داعش، پر وړاندې ګډ هوايي بریدونه کړي دي.

د برتانیا دفاع وزارت وویل چې دوی له فرانسې سره په ګډه تیره شپه په سوریه کې تر ځمکې لاندې هغه ځای په نښه کړ چې ګمان کیږي داعش د وسلو او چاودیدونکو توکو د زیرمه کولو لپاره کاروه.

د سر د احتمالي زیان په اړه څه نه دي ویل شوي.

د برتانیا دفاع وزارت زیاته کړې، هیڅ داسې نښې نشته چې وښيي د پالمیرا په لرغونې سیمه کې شویو دې عملیاتو کې ملکیانو ته زیان اوښتی وي.

د اسلامي دولت ډله په ۲۰۱۹ کال کې په سوریه کې د ځمکې درلودو له پلوه له ماتې سره مخامخ شوه، خو د دغه هېواد په دښتو او بیابانونو کې یې لا هم خپل حضور ساتلی دی.

متحدوعربي اماراتو د شنبې په ورځ وویل چې په یمن کې د روان کړکیچ په اړه ژوره اندیښنه لري. دا وروسته له هغه چې د سعودي عربستان په ملاتړ حکومتي ځواکونو په هغو سیمو کې چټک پرمختګ وکړ چې تیره میاشت د متحده عربي اماراتو په ملاتړ جنوبي بیلتون غوښتونکو نیولې وې.

د ابوظبي اعلامیې وویل چې یمنیان باید له زغم څخه کار واخلي او د امنیت او ثبات د ساتنې لپاره خبرو اترو ته لومړیتوب ورکړي.

تردې څو ساعته مخکې د جنوب انتقالي شورا (STC) چې امارات یې ملاتړ کوي ویلي وو چې په دوو کلونو کې د خپلواکۍ په اړه ټولپوښتنه کوي.

د انتقالي شورا ځواکونه له هغو مهمو سیمو وویستل شول چې دوی تیره میاشت ناڅاپه نیولې وې.

دهند بهرنیو چارو وزیر وايي نوي ډیلي د افغانستان تګلاره د خلکو پر بنسټ ساتلې او پاللې ده، داسې چې بشري مرستو، پراختیایي همکارۍ او د افغانستان له ټولنې سره دوامداره ښکیلتیا ته لومړیتوب ورکوي.

ایس جي شنکر دا څرګندونې د جمعې په ورځ د چینای ایالت په یوه پوهنتون کې له محصلینو سره د خبرو پرمهال وکړې. نوموړي د طالبانو د بهرنیو چارو له وزیر امیرخان متقي سره خپله غونډه مثبته وبلله.

امیرخان متقي د اکتوبر له نهمې تر شپاړسمې هند ته تللی و او دا د طالبانو د یوه جګپوړي چارواکي لومړی سفر و چې هند ته ترسره شوه.

هند د طالبانو حکومت په رسمیت نه پيژني خو په کابل کې یې خپل سفارت فعاله کړی دی.

په داسې حال کې چې د متحدو ایالاتو ولسمشر ډونالډ ټرمپ وویل چې د وینزویلا ولسمشر نیکولاس مدورو نیول شوی او له هیواد بهر ویستل شوی دی ، د وینزویلا دفاع وزیر د شنبې ورځې په لومړیو ساعتونو کې په یوې ویډیو کې وویل چې وینزویلا به د بهرنیو عسکرو د حضور په وړاندې مقاومت وکړي.

دفاع وزیر ویلادیمیر پادرینو وویل په وینزویلا باندې امریکايي برید کې ولسي سیمې په نښه شوي دي او دوی د وژل شویو او ټپیانو په هکله معلومات راټولوي.

ټرمپ په خپله خواله رسنۍ سوشل ټروث ولیکل چې نیکولاس مدرو یې نیولی دی.

په ایران کې د حکومتي ځواکونو له مخنیوونکو اقداماتو سربېره ګڼو ښارونو کې تر شپې ناوخته لاریونونو دوام درلود.

لږ تر لږه اوه کسان په تېرو شپږو ورځو کې د لاریونونو پر مهال وژل شوي او لسګونه نور ژوبل دي.

د راپورونو له مخې پرون هغه کسان هم خاورو ته سپارل شوي چې په تېرو شپږو ورځو کې وژل شوي.

د ازادې اروپا فردا راډیو په راپورونو کې راغلي چې د جنازې په مراسمو کې هم ګڼو خلکو د حکومت پر ضد شعارونه ورکړي او له امنیتي ځواکونو سره یې اخ او ډب کړی دی.
خلکو اعتراضونه د ډالرو په وړاندې د تومانو د بېساري لوېدو په خاطر پيل کړل چې اوس یې لمن ګڼو ښارونو ته غځېدلې او پکې لاریونوال حکومت په فساد، جبر او د منابعو په ضایع کولو تورنوي.

د ایران امنیتي ارګانونو مظاهره چیان د دوی په خبره بلواګر یاد کړي چې غواړي له منځته راغلي وضعیته ناوړه ګټه پورته کړي.

د امریکا ولسمشر ډونالډ ټرمپ خبرداری ورکړی چې که ایران پر سوله ییزو مظاهره چیانو ډزې وکړي او هغوی ووژني نو متحده ایالات به د دغو خلکو ژغورنې ته ودانګي.
دغو څرګندونو د ایران کلک عکس العمل پارولی او په سیمه کې یې د امریکايي سرتیرو او اهدافو په اړه ګواښونه هم کړي دي.

د پاکستان د ترهګرۍ ضد محکمې اته تنه خبریالان په عمر بند محکوم کړل.

په دوی باندې د ترهګرۍ اړوند جرایمو تورونه لګېدلي چې د پخواني بندي صدراعظم عمران خان په ملاتړ له انلاین فعالیتونه سره تړلي بلل شوي.

د راپورونو له مخې دا خبریالان د هغو قضیو په خاطر محکوم شوي چې د ۲۰۲۳ کال د مې په نهمه تر تاوتریخجنو مظاهرو وروسته ثبت شوې وې.

په هغو مظاهرو کې د پخواني صدراعظم عمران خان پلویان په پوځي مراکزو په بریدونو تورن شوي.

پخوانی صدراعظم او د تحریک انصاف پاکستان رهبر عمران خان د ۲۰۲۳ کال له اګست راهیسې په زندان کې دی.

د امریکا ولسمشر ډونالډ ټرمپ ویلي که ایران مظاهره چیان ووژني دوی به یې ژغورنې ته ودانګي.
د راپورونو له مخې په ایران کې چې مظاهرې نن شپږمې ورځې تر رسېدلي لږ تر لږه اوه تنه وژل شوي او لسګونه نور ټپیان دي.

ټرمپ په خپله تروث سوشیال پاڼه کې په بیان کې لیکلي :« که ایران سوله ییز لاریونوال ووژني چې دا یې رسم دی، متحده ایالات به د هغوی ژغورنې ته ور ودانګي.»

د هغه په خبره امریکا د اقدام لپاره چمتو ده.

د ټرمپ دغه بیان د ایران د لوړپوړو چارواکو کلک عکس العمل پارولی.

د ایران د ملي امنیت د عالي شورا سلاکار علي لاریجاني په ایکس پاڼه د یوه بیان له لارې په سیمه کې امریکايي سرتیري ګواښلي دي.

د ایران د رهبر علي خامنه يي سیاسي سلاکار علي شمخاني هم ګواښ کړی چې ایران به د دغه هېواد په چارو کې لاسوهونکو ته کلک ځواب ورکړي او لاس به یې ورلنډ کړي.

د بشري حقونو مدافع ډلو راپور ورکړی چې امنیتي ځواکونو پر مظاهره چیانو ډزې کړي او له تاوتریخوالي یې کار اخیستی.

د ایران شاوخوا ۳۰ ښارونو کې د ډالرو او سرو زرو د بیو د بېساري لوړېدو په غبرګون مظاهرې روانې دي.