د امريکا متحده ايالاتو د بهرنيو چارو وزير د پاکستان نوي حکومت ته د پيسو نړيوال صندوق د مالي مرستې برابرولو په وړاندې خبردارى ورکړ.
پاکستان په پام کې لري چې د پيسو نړيوال صندوق يا «IMF» په دغو مالي مرستو هغو چينايي شرکتونو او اشخاصو ته هم پيسې ورکړي چې ورڅخه پوروړى دى.
د امريکا متحده ايالاتو د بهرنيو چارو وزير مايک پامپيو د دوشنبې په ورځ له «CNBC» ټلوېزيون سره په مرکه کې ويلي چې امريکا په تمه ده، څو د پاکستان له نوي حکومت سره تعامل وکړي چې نوى صدراعظم عمران خان بهيې تشکيل کړي.
خو ښاغلي پامپيو وويل، دا به منطقي نهوي چې پاکستان دې د پيسو نړيوال صندوق له دغو مالي مرستو په استفاده، هغو چينايي وګړو او شرکتونو ته پيسې ورکړي چې پاکستان ورڅخه پوروړى دى.
مايک پامپيو په دې مرکه کې وويل:
"مه خطا وځئ، موږ به هر هغه څه چې د پيسو نړيوال صندوقيې ترسره کوي، له نږدې څارو."
د امريکا د بهرنيو چارو وزير وويل، دا به منطقي نهوي چې د پيسو نړيوال صندوق يا «IMF» پيسې او ورسره د امريکا هغه ډالر چې د «IMF» د مالي مرستو برخه جوړوي، د چينايي پور ورکوونکو او خپله د چين جېب ته لاړ شي.
فايننشل ټايمز ورځپاڼې د يکشنبې په ورځ راپور ورکړى و چې د پاکستان د مالي چارو عالي رتبه چارواکو نوي ټاکل کېدونکي صدراعظم ته پېشنهاد کړى چې له «IMF» څخه د ١٢ میلیارده ډالرو په ارزښت د مالي مرستې غوښتنه وکړي.
د دغې نړیوالې مالي مؤسسې یوه ویاند ویلي چې تر اوسه په دې اړه د پاکستان لهخوا له دوى کومه غوښتنه نهده شوې، نه هم پر دې مسئلې له پاکستاني چارواکو سره خبرې شوې دي.
پاکستان له ١٩٨٠ میلادي کال راهيسې د پيسو له نړيوال صندوق څخه ١٤ مالي پروګرامونه ترلاسه کړي دي.
پاکستان هڅه کوي چې د خپل پولي واحد پر سر ولاړ شوى کړکېچ حل کړي او دا د نوي حکومت په وړاندې يو له لويو چنلجونو ګڼل کېږي.
پاکستان چې د چين پنځه میلیارده ډالر پور ورباندې دى، د بهرنیو اسعارو په وړاندې د خپل پولي واحد د ثبات لپاره د نورو یو ميلیارد ډالرو غوښتونکی دی.