د کابل چاپ ورځپاڼو د نن ورځې اکثره تبصرې بیا هم په افغانستان کې د سولې پر روانو هڅو، د روانې جګړې په اړه د دیني عالمانو د فتواو او د پاکستان د رول ته ځانګړي کړي دي.
- سرخط
سرخط ورځپاڼې په خپله سرلیکنه کې د جنوبي او منځنۍ اسیا لهپاره د امریکا د بهرنیو چارو وزارت د مرستیالې پهدې څرګندونو بحث کړی چې پاکستان باید د افغانستان د سولې په برخه کې جدي همکاري وکړي او طالبان د سولې خبرو ته راولي.
ورځپاڼې لیکلي دي چې دا څرګندونې داسې مهال شوي دي چې د روانی اوونۍ په پای کې په سعودي عربستان کې د افغان جګړې په اړه د نړۍ د دیني عالمانو یوه غونډه هم جوړېږي.
ورځپاڼې لیکلي دي چې د سولې عالي شورا ځینو غړو له طالبانو هم غوښتي وو چې پهدې غونډه کې برخه واخلي او د نړۍ دیني عالمانو ته دې د خپلې جګړې په اړه قناعت ورکړي.
ورځپاڼه لیکي چې د سولې عالي شورا تمه لري چې پاکستان به طالبان مجبوره کړي چې پهدې غونډه کې ګډون وکړي، خو د ورځپاڼې په وینا له بهرامه ښادي حرامه ده او پاکستان به تر وروستۍ شېبې پورې له ترهګرو او طالبانو لاس وانهخلي.
ورځپاڼې په پای کې دې نتیجې ته رسیدلې ده چې د سولې د خبرو پر ځای دې له پاکستانه د طالبانو شړل وغوښتلی شي.
- دنیا
خو دنیا ورځپاڼې بیا د سولې په تړاو روانو هڅو ته په اشارې لیکلي دي چې اوسمهال دغه هڅې د پخوا په پرتله څو برابره زیاتې شوي دي او داسې ښکاري چې هرڅه د یو منظم پلان له مخې مخته ځي.
ورځپاڼې وړاندې په اندونیزیا کې د افغان، پاکستاني او اندونیزیایي عالمانو، په کابل کې د شاوخوا درېیو زرو عالمانو غونډو ته اشاره کړې چې پهکې روانه جګړه حرامه بلل شوې ده.
ورځپاڼه لیکي:
د دې غونډو هوا او فضا لا سړه شوې نهده چې دا دی په سعودي عربستان کې د اسلامي کنفرانس په نوښت بله غونډه د جوړېدو په حال کې ده چې پهکې د افغانستان روانه جګړه د اسلامي شریعت له مخې وارزولی شي.
ورځپاڼې لیکلي دي چې دغو هڅو داسې مهال زور اخېستی دی چې طالبانو د افغان حکومت پر وړاندې پر جګړې ټینګار کړی او هغه یې د اسلام له نظره روا بللې ده چې د ورځپاڼې په وینا د سولې له نظره غیر منطقي بلل کېږي.
د ورځپاڼې په وینا که طالبان د سولې لهپاره له روانو هڅو سره سم او منطقي چلند ونهکړي، نو د سولې لهپاره رامنځته شوی فرصت به هم لهمنځه ولاړ شي.
- هېواد
هېواد دولتي ورځپاڼې هم په افغانستان کې د سولې د روانو هڅو په اړه له پاکستانه د امریکا پر غوښتنو بحث کړی او لیکلي دي چې امریکا له پاکستانه د افغان سولې په اړه د جدي اقداماتو غوښتنه کوي.
ورځپاڼې وړاندې د جنوبي او منځنۍ اسیا لهپاره د امریکا د بهرنیو چارو وزارت د مرستیالې الیس ولز په حواله لیکلي دي چې امریکا له پاکستانه وغواړي څو له افغان حکومت سره د طالبانو د خبرو په هکله دې، دوامداره او برخلیک ټاکونکي هڅې وکړي.
ورځپاڼې لیکلي دي چې مېرمن ولز ویلي دي چې اسلاماباد باید طالب مشران وشړي او له افغان حکومت سره د خبرو لهپاره دې پر هغوی فشارونه زیات کړي.
خو ورځپاڼې دا هم لیکلي دي چې دا څرګندونې داسې مهال کېږي چې طالبانو یو ځلي بیا د سولې وړاندیز رد کړی دی.
- ویسا
ویسا ورځپاڼې بیا د خپل لومړي مخ په یو مطلب کې لیکلي دي چې په سعودي عربستان کې د نړۍ د دیني عالمانو غونډه د افغان حکومت پر وړاندیز او د سعودي عربستان د شاهي کورنۍ په کوربهتوب پلان شوې ده.
ورځپاڼې لیکلي دي چې د پاکستان په ګډون د نړۍ د ۳۷ اسلامي هېوادونو دیني عالمانو منلې ده چې پهدې غونډه کې به ګډون کوي او د افغانستان روانه جګړه د شریعت له مخې ارزوي.
ورځپاڼې وړاندې د دې غونډې په اړه د سولې د عالي شورا نظر راخېستی او لیکلي دي چې د سولې عالي شورا په افغانستان کې د سولې لهپاره د اسلامي هېوادونو اجماع او په تېره بیا د سعودي عربستان ملاتړ د هېواد په روان وضعیت مثبت اغېز پرې باسي.
ورځپاڼې لیکلي دي چې له څه مودې راهیسې افغان حکومت په هېواد کې د سولې د هڅو لهپاره د سیمې او نړۍ د هېوادونو د ملاتړ د ترلاسه کولو لهپاره بېلابېلې هڅې پیل کړي دي.
د ورځپاڼې په وینا په کابل کې د هېواد د دیني عالمانو وروستۍ غونډه چې پهکې روانه جګړه ناروا وبلل شوه، په اندونیزیا کې د افغان، پاکستاني او اندونیزیایي عالمانو غونډه د دغو هڅو بېلګې دي.