د لاسرسي لېنکونه

دوشنبه ۲۹ زمری ۱۳۹۷ کابل ۰۱:۵۵

پاکستاني طالبانو د خپل منځي اختلافاتو له امله د خپل نوي مشر ټاکنه ځنډولې


پاکستاني طالبانو د خپل نوي مشر ټاکنه ځنډولې او دا پرېکړه په داسې حال کې کېږي چې د پاکستاني طالبانو د دوو ګروپونو ترمنځ د نوي مشر د ټاکلو پرسر اختلاف رامنځته شوی دی.

د تحریک طالبان پاکستان TTP د پخواني مشر ملا فضل الله له وژل کېدو یوه اوونۍ وروسته په دې ډله کې د نوي مشر د ټاکلو پرسر اختلاف رابرسېره شوی دی.

ملا فضل الله
ملا فضل الله

د پاکستاني طالبانو غړو د جرمني خبري اژانس DPA ته ویلي چې دوه مهم ګروپونه چې دا ډله یې جوړه کړې، د مقابل لوري له کاندید سره مخالفت کوي او غواړي د دوی کاندید د ډلې مشر شي.

TTP له تېرې یوې لسیزې راهیسې د پاکستان د حکومت پرضد وسله واله مبارزه پیل کړې او د دې جګړې په ترڅ کې شااوخوا ۷۰ زره پاکستانیان وژل شوي دي.

ملا فضل الله چې په ۲۰۱۲ کال کې د نوبل د جایزې پر ګټونکې ملالې یوسفزۍ له حملې وروسته یې ډېر شهرت وګاټه، تېره اوونۍ په افغانستان کې د بې پیلوټه الوتکو په یوه حمله کې ووژل شو.

د پاکستاني طالبانو یوه غړي قاري نور له افغانستان څخه DPA اژانس ته ویلي چې د سوات اوسېدونکی عمر رحمان سواتی نېږدې و چې د پاکستاني طالبانو د مشر په توګه غوره شي، خو یو ناڅاپه له دې پرېکړې سره مخالفت وشو.

ویل کېږي چې د پاکستاني طالبانو یو بل مشر مفتي نورولي محسود هم غواړي د دې ډلې مشر شي.

د TTP یوه بل غړي DPA اژانس ته ویلي چې نورولي محسود د افغان طالبانو له حقاني شبکې سره نېږدې اړيکې لري.

دا سرچینې وايي، حقاني شبکه چې په پاکستان کې مرکزونه لري او د پاکستان له پوځي استخباراتي ادارې ISI سره د اړیکو په لرلو تورنه ده، هم د مفتي نورولي ملاتړ کوي.

د ازادي راډیو کارپوه ابوبکر صدیق چې په سیمه کې د ترورېستي ډلو تحولات له نېږدې څاري، وايي چې د قبایلي سیمو وسله وال د سواتي ملا فضل الله له وژل کېدو وروسته، غواړي چې یوځل بیا د پاکستاني طالبانو مشري ترلاسه کړي.

نوموړي وویل:

"چې کله په وزیرستاني طالبانو کې په ځانګړي ډول، ډېر د محسودو مشران ووژل شول، نو دا برخه ډېره کمزورې شوه او مشري یې د سوات او د جنوب خوا ته د نورو سیمو لکه د باجوړ، مومند او نورو سیمو مشرانو ته انتقال شوه، نو اوس چې فضل الله وژل شوی، د محسودو برخه چې ډېر پلویان یې د قبایلي سیمو په خاص ډول د وزیرستان دي، غواړي چې دا مشرتابه بېرته لاس ته راوړي."

DPA د پاکستاني طالبانو د سرچینو په حواله زیاتوي چې د دې ډلې هغه څانګه چې په افغانستان کې دېره ده، ښايي یو بل کاندید وړاندې کړي، څو په TTP کې د احتمالي اختلاف مخه ونیسي، په TTP کې شاملو ګروپونو مخکې له دې چې ملا فضل الله یې مشري په غاړه واخلي، په خپلو کې خونړۍ جګړې کړې دي.

XS
SM
MD
LG