د کونړ سيند د څپانده کېدو له امله د ننګرهار د کامې ولسوالۍ د زاخېلو څخه په سلګونه کورنۍ کډه شوي دي.
هر کال د ګرمۍ په موسم کې سیندونه په مستۍ راځي، ځيني سیندونه کله کله دومره څپانده شي چې د نږدې سیمو زراعتي او د استوګنو ځایونه هم له ځانه سره لاندې کوي.
د تېرو کلونو په شان سږ کال هم د کونړ سیند په مستۍ راغلی چې له املهيې د زاخېلو سیمو په سلګونه کورنۍ نورو سیمو ته بېځایه شوي.
د کامې ولسوالۍ د زاخېلو اوسېدونکي هر یو ننګيالی او عبدالواحد یې په اړه وايي، د کونړ سیند د تېرو کلونو په پرتله ډېر زیات څپانده شوی دی او همدا لامل دی چې د دوی په سیمو کې د خلکو استوګن ځایونه او زراعتي ځمکې زياتې خرابه کړي.
دوی وايي:
"ننيې درېیمه ورځ ده چې د کامې ولسوالۍ په زاخېلو او دوه نورو کلیو باندې د کونړ سیند راغلی، سږ کال پهدې سیند کې د پخوا کلونو په پرتله اوبه زیاتې شوي او شااوخوا ۷۵۰ کوره د دې اوبو د زیاتېدو له امله کډه شوي."
"خپله زاخېلو ته ورغلم دا درېيمه ورځ ده چې کډې بارېږي، خو تر اوسه چا پوښتنه نهده کړې او ما خپله وليدل په زرګونه جریبه ځمکهيې لاندې کړې ده."
په ورته وخت کې د ننګرهار ولایتي اداره وايي، دوی د طبیعي پېښو پر مهال د چمتووالي ادارې ته دنده سپارلې چې د زیانمنو شویو کورنيو سره لازمه مرسته وکړي.
د ولایت ویاند عطالله خوګياڼي زیانمنو شویو کورنیو ته ډاډ ورکړ چې دوی ته به د اړتیا وړ بېړنۍ مرستې ورورسېږي.
دی وايي:
"د کامې د زاخېلو په سیمو کې د کونړ سیند اوبه زیاتې شوي او هلته یو شمېر کورنۍ بېځایه شوي، والي صیب د بېړنیو مرستو رسولو کمېټې ته دنده سپارلې چې د کامې ولسوالۍ زاخېلو سیمو ته بېړنۍ مرستې واستوي."
د طبیعي پېښو پر مهال د چمتووالي ادارې مسؤلین وايي، زیانمنو شویو سیمو تهيې د سروې ټيمونه استولي او کله چې څېړنې بشپړې کړي، سملاسي به یادو سیمو ته مرستې ورواستوي.
تېر کال هم د کونړ سیند د څپانده کېدو له امله په لسګونه کورونه او په زیاته اندازه زراعتي ځمکه اوبو لاندې کړې وه.
د سیمې خلک له ولایتي ادارې نه غواړي چې د مؤقتي مرستو پر ځای دې، د دوی د استوګن ځایونو او زراعتي ځمکو د خوندیتوب لپاره استنادي دېوالونه جوړ کړي.
راپور: شاه محمود شینواری