د لاسرسي لېنکونه

دوشنبه ۵ وری ۱۳۹۸ کابل ۰۵:۴۸

دنیا: له زده‌کړو د ۳ نیم میلیونه ماشومانو محرومېدل د افغانستان تباهي ده


د کابل چاپ ورځپاڼو د نن ورځې اکثره لیکنې له ښوونځیو څخه د محرومو افغان ماشومانو په اړه د یونېسف راپور ته ځانګړې شوې دي.

  • سرخط

سرخط ورځپاڼه لیکي چې افغان حکومت د هېواد په بېلابېلو سیمو کې د تړل شویو ښوونځیو شمېر د زرو په شااوخوا کې ښيي، خو د ماشومانو له‎پاره د ملګرو ملتونو اداره یونېسف بیا وایي چې په افغانستان کې ۳،۷ میلیونه ماشومان له زده‎کړو محروم دي.

ورځپاڼې لیکلي دي چې په هېواد کې روانې ناامنۍ، فساد، ناوړه دودونه او رواجونه هغه ستونزې دي چې له ښوونځیو څخه‌یې د ماشومانو مخ اړولی دی.

ورځپاڼې لیکلي دي چې د یونېسف په راپور کې د هغو ماشومانو عمرونه چې له زده‎کړو محروم دي د ۷ او ۱۷ کلونو ترمنځ ښودل شوي دي.

ورځپاڼه لیکي:

د هېواد له جنوبي سیمو څخه ورته رسېدلي معلومات ښيي، هغه ماشومان چې ښوونځیو ته نه‌ځي، یا خو د وسله‎والو لیکو ته ځي او د نظام پر ضد جنګېږي، یا په ښارونو کې تر ځان درانه کارونه کوي او مافیایي ډلې ورڅخه ناوړه ګټه پورته کوي.

  • ملي ارمان

ملي ارمان ورځپاڼې بیا د یونېسف د راپور په استناد لیکلي دي چې له زده‎کړو بې‌برخې د ۳،۷ میلیونه ماشومانو له ډلې نه ۲،۷ میلیونه‌یې نجونې دي چې ۸۵ سلنه‌یې په کندهار، هلمند، وردک، زابل، پکتیکا او ارزګان کې دي.

ورځپاڼې وړاندې د پوهنې وزارت غبرګون راخیستی دی او لیکلي یې دي چې له زده‎کړو د ۳،۷ میلیونه ماشومانو بې‌برخې کېدل چې ۲،۲ میلیونه‌یې نجونې دي، یو ناورین دی.

ورځپاڼې د پوهنې وزارت د سرپرست په حواله لیکلي چې د ناامنیو زیاتېدل او له وخته مخکې د نجونو ودول هغه اساسي لاملونه دي چې ښوونځیو ته د نجونو د تګ مخنیوی کړی دی.

ورځپاڼې لیکلي دي، دا راپور داسې مهال خپور شوی دی چې همدا اوس د هېواد په ۲۲ ولایتونو کې جګړه روانه ده او وسله‎وال مخالفین له ښوونځیو څخه د مورچلو په توګه کار اخلي.

  • هېواد

هېواد دولتي ورځپاڼې لیکلي چې د وروستیو کلونو جګړو، د لوږې زیاتېدو او تعصب له ۲۰۰۲ میلادي کال نه نیولې تر ۲۰۱۶ میلادي کال پورې د پوهنې په برخه کې لاسته راوړنې له‌منځه وړې دي.

ورځپاڼې لیکلي دي چې د افغانستان د پوهنې وزارت د یونېسف په راپور کې له زده‎کړو د بې‌برخې ماشومانو پر ښودل شوې شمېرې اندېښنه څرګنده کړې ده.

ورځپاڼه لیکي چې د پوهنې سرپرست وزیر په دومره شمېر کې د ماشومانو له زده‎کړو محرومېدل د هېواد د راتلونکې له‎پاره خطرناکه بولي.

ورځپاڼې لیکلي دي چې د دغه راپور د خپرېدو پر مهال په کابل کې د کاناډا سفیر وویل چې افغان حکومت باید ښوونځیو ته له زده‎کړو د محرومو ماشومانو د بېرته ستنولو له‎پاره زیات کار وکړي.

  • دنیا

دنیا ورځپاڼې بیا د یونېسف راپور ته په اشارې لیکلي دي چې په هېواد کې روان جنګ د دې او نورو بدبختیو اصلي لامل دی.

ورځپاڼې لیکلي دي چې له زده‎کړو د درې نیم میلیونه ماشومانو محرومېدل، د افغانستان په څیر هېواد له‎پاره کومه عادي مسئله نه‎ده، بلکې یو جدي ناورین او تباهي ده او په‎کار ده چې له دغه حالته د خلاصون له‎پاره زیاتې هلې ځلې وشي.

ورځپاڼې لیکلي دي، که د جګړې زیانونه په سمه توګه درک نه‎شي، نو ممکن زموږ له ولسه تر دې هم زیاته قرباني واخلي.

ورځپاڼې لیکلي دي، که نن درې نیم میلیونه ماشومان له زده‎کړو بې‌برخې شوي دي او د انتخاباتو په څېر ملي بهیر له ستونزو سره مخامخ دی، نو په راتلونکي کې دغه شمېر دوه او درې برابره زیاتېږي.

ورځپاڼې په پای کې سپارښتنه کړې چې په هېواد کې د جګړې د پای ته رسولو له‎پاره چې د ټولو بدبختیو لامل ده، باید د هلمند د خلکو د خوځښت ملاتړ وشي.

XS
SM
MD
LG