د افغانستان د کورنیو چارو او دفاع وزارتونو له ښوونځیو د سنګر په توګه د افغان پوځیانو ګټه اخیستنه رد کړه.
په داسې حال کې چې د افغانستان د پوهنې وزارت ادعا کړې چې د وسلهوالو مخالفینو سربېره افغان پوځیان هم له ۶۷ ښوونځیو څخه د سنګر په توګه ګټه اخلي، خو د کورنیو چارو وزارت دغه ادعا ردوي.
د دغه وزارت مرستیال ویاند نصرت رحیمي د سې شنبې په ورځ «۱۳۹۷ کال د وري ۲۸» ازادي راډيو ته وویل افغان پوځیان نه، بلکې وسلهوال مخالفین په ښوونځیو کې ځان پټوي او د افغان پوځیانو پر ضد جګړه کوي.
دی وايي:
"هېڅکله هم افغان امنیتي او دفاعي ځواکونو له ښوونځیو او جوماتونو استفاده نهده کړې او له ځینو سرچینو نه چې پهدې اړه کوم راپور خپور شوی، هغه موږ ردوو."
نوموړی زیاتوي، ټولو پوځي قوماندانانو ته لارښوونه شوې، که دښمن په ښوونځیو کې سنګر نیولی وي، له هغه سره په احتیاط برخورد وکړئ، څو د زیانونو مخه ونیول شي.
په دې وروستیو کې د پوهنې وزارت د خپرونو رئیس کبیر حقمل ویلي چې په ښوونځیو کې مورچلو او سنګر نیولو اندېښمن کړي دي.
نوموړی وايي، روان لمریز کال وسلهوالو مخالفینو یو شمېر ښوونځي سوځولي دي.
ښاغلي حمقل ازادي راډيو ته وویل، دغه وضعیت د دې لامل شوی چې یو شمېر زدهکوونکي ښوونځیو ته له تګه پاتې شي.
له دې سره په خوا کې د پوهنې وزارت وايي، له زرو څخه د زیاتو ښوونځیو تړل کېدل، بېوزلي، ناامني، د ښځینه ښوونکو کموالی او د ټولنې ناوړه دودونه د دې لامل شوي چې درې نیم میلیونه په شرایطو برابر افغان زدهکوونکي ښوونځيو ته له تګه پاتې شي چې د دغه شمېر ۷۵ سلنهیې نجونې دي.
په ورته وخت کې د دفاع وزارت د ویاند دفتر سرپرست محمد رادمنش هم له ښوونځیو څخه د سپر په توګه د افغان پوځیانو استفاده رد کړه.
وسلهوالو طالبانو هم پهدې اړه څه نهدي ویلي.
بلخوا د ولسي جرګې د پوهنې او لوړو زدهکړو کمېسیون ټینګار کوي چې پوهنه باید له سیاسي او پوځي لوبو لیرې وساتل شي.
د دغه کمېسیون مرستیال خلیلالله شهیدزاده له ازادي راډیو سره په خبرو کې له وسلهوالو مخالفینو وغوښتل چې هدف ته د رسېدو لپاره باید له پوهنې د یوې وسیلې په توګه کار وانهخلي.
دی وايي:
"تل زموږ غوښتنه او د خلکو ارزو دا وه چې ښوونځي دې له سیاسي او نظامي لوبو لیرې وي، ځکه چې زیانیې پاکو ماشومانو ته رسېږي، خو له بدهمرغه ناتعریف شوې جګړې په ښوونځیو، جوماتونو او د اوسېدو په ځایونو رحم نهکوي."
نوموړی ټینګار کوي چې له ښوونځیو د سنګر په توګه د ګټې اخیستنې لوی زیان ماشومانو او پوهنې ته رسېږي.
ښاغلی شهیدزاده زیاتوي چې د پوهنې زیانمنېدل د ټولنې پرمختګ ننګولای شي.
راپور: رحمتالله افغان
