متحده ایالاتو په سوریه کې د کیمیاوي وسلو د کارولو په اړه د تحقیقاتو لپاره نوې هلې ځلې پیل کړې دي.
په ملګرو ملتونو کې د امریکا سفیرې نیکي هیلي پرون وویل، دا له امنیت شورا غواړي چې یوې نوې تحقیقاتي کمېټې ته دنده وسپاري څو د سوریې په ختیځ ښار غوطا کې، په وروستیو څو اونیو کې د کلورین ګاز د ګڼو حملو له راپورونو وروسته معلومه کړي چې دا کیمیاوي حملې چا کړې دي.
مېرمن هېلي وویل دا هیله منه ده چې امنیت شورا به د راتلونکې اوونۍ په پیل کې په دې برخه کې اقداماتو ته رایې ورکړي.
په امنیت شورا کې یوه ډیپلوماټ ویلي، امکان نه لري چې روسیه به د امریکا د دې طرحې- چې د بې پرې، خپلواکو او مسلکي تحقیقاتو غوښتنه کوي ملاتړ وکړي.
روسیې د ملګرو ملتونو پر پخواني تحقیقاتي ټیم انتقاد کړی و او ویلي یې و چې د دې ډلې غړیو خپل راپورونه په ځینو مواردو کې پرته له دې چې د مشکوکو حملو سیمې ته سفر ورکړي، کره او موثق اسناد برابر کړي لیکلي دي.
د امریکا سفیره دا طرحه څو ورځې وروسته له هغه وړاندې کوي چې د سوریې د بشري حقونو د څار ټولنې وویل، د روانې اوونۍ په پیل کې د کلورین ګاز په یوه مشکوکه حمله کې یو ماشوم په تنفس کې د ستونزو له کبله مړ شو او ۱۳ نور کسان ناروغان شول.
د سوریې ولسمشر بشار اسد له کیمیاوي وسلو د کار اخیستو ټول تورونه رد کړي دي.
په نوامبر میاشت کې د ملګرو ملتونو مخکینۍ څېړنې وروسته له هغه بې نتیجې پای ته ورسېدې چې روسیې، د څېړونکي کمیټې د ماموریت د تمدید پرېکړه لیک ویټو کړ.
مسکو وايي، د څېړنو دا ډله چې د اکثرو کیمیاوي بریدونو پړه یې د بشار اسد پر حکومت اچولې وه، د دمشق د متحدانو په برخه کې بې پرې نه وه.
روسیې په جنوري میاشت کې له خپلې خوا یوه طرح وړاندې کړه چې د نویو څېړنو غوښتنه یې کوله خو دا طرح یې هېڅکله هم د امنیت شورا په غونډه کې رایو ته وړاندې نه کړه.
د روسیې دا پلان د امریکا او د امریکا د لویدیځو متحدانو له خوا ځکه رد شو چې د دوی په وینا په دې طرح کې د سوریې حکومت ته په څېړنو کې خورا زیات واک ورکړل شوی و.