د لاسرسي لېنکونه

پنجشنبه ۲۹ وږی ۱۳۹۷ کابل ۱۰:۴۴

«FATF»سازمان د پاکستان په اړه خپل موقف تغیر کړ


په پاکستان کې سرچینې وايي، په نړۍ کې د تورو او غیر قانوني پېسو پر جریان د څارنې نړیوالې ادارې، فایننشل اکشن ټاسک فورس پرېکړه کړې چې پاکستان یو وار بیا د تروریستي ډلو د تمویل په ارتباط، د مشکوکو هېوادونو په "خړ" لېست کې شامل کړي.

فایننشل اکشن ټاسک فورس اداره په ۱۹۸۹مېلادي کال کې جوړه شوې او هدف يې په نړۍ کې د تورو پیسو د جریان او د تروریستي ډلو د مالي سرچینو بندول او همدا راز، د ډله ییزې وژنې د وسلو د پراختیا او نړیوال مالي سیسټم ته د تروریستي ډلو له لوري د ممکنو ګواښونو مخنیوی دی.

فایننشل اکشن ټاسک فورس نړیواله اداره یوازې پالیسي جوړوي او د مسئولو حکومتونو د فعالیتونو څارنه کوي څو د تورو پیسو د سپینولو او له نړیوال مالي سیسټمه د ناوړه استفادې مخنیوی وشي.

د پاکستان د دولت یوه لوړرتبه چارواکي او یوه ډیپلوماټ پرون جمعه رویټرز خبري اژانس ته ویلي چې د فایننشل اکشن ټاسک فورس غړي پردې پرېکړه سلا شوي دي.

د رویټرز په حواله، دا اقدام به د پاکستان اقتصاد او بانکي سیسټم ته سخته ضربه ورکړي او له واشنګټن سره د اسلام اباد نازک روابط به لا خراب کړي.

رویټرز لیکلي، له تروریستانود مالي ملاتړ له امله د مشکوکو هېوادونو په کتار کې د پاکستان شاملېدل، د واشنګټن د هغې پراخې ستراتیژۍ برخه ده چې هدف یې له هغو تروریستي ډلو سره چې د پاکستان له خاورې په هند او افغانستان کې حملې کوي، د اسلام اباد د ملاتړ ختمول دي.

یوه پاکستاني چارواکي او یوه ډیپلوماټ چې د مسئلې د حساسیت له امله، د دواړو هویت پټ ساتل شوی، رویټرز ته ویلي چې فایننشل اکشن ټاسک فورس نړیواله اداره سږ دوبی، د جون په میاشت کې غونډه لري او رسماً به پاکستان تر څارنې لاندې اعلان شي.

پاکستان مخکې هم، د فایننشل اکشن ټاسک فورس ادارې درې کاله د مشکوکو هېوادونو په لېست کې ثبت کړی و او په ۲۰۱۵مېلادي کال کې ور څخه ووت.

د پاکستان حکومت، د دې لپاره چې یو وار بیا د مشکوکو هېوادونو په لېست کې ونه ګڼل شي، د فبرورۍ پر ۱۴مه اعلان وکړ چې د حافظ سعید دوې ادارې، جماعت الدعوه او فلاح انسانیت فونډېشن تر خپل کنټرول لاندې کوي او شتمنۍ یې کنګل کوي.

حافظ سعید هغه څوک دی چې د هند په ممبی ښار کې په ۲۰۰۸ مېلادي کال کې په تروریستي حمله کې چې ۱۶۶تنه په کې ووژل شول، په لاس درلودلو تورن دی.

حافظ محمد سعید
حافظ محمد سعید

د پاکستان د بهرنیو چارو وزارت ویاند محمد فیصل، د فبرورۍ پر ۱۵په اسلام اباد کې خبریالانو ته وویل چې د فایننشل اکشن ټاسک فورس ادارې له لوري د مشکوکو هېوادونو په ګڼه کې راتلل به د پاکستان اقتصادي وده کمزورې کړي.

د پاکستان حکومت له نړیوالو غوښتنه کړې وه چې وخت ورکړي، د ځينې رپوټونو په حواله، پاکستان ته درې میاشتې وخت ورکړل شوی و.

خو رویټرز خبري اژانس د سرچینو په حواله ویلي چې د فایننشل اکشن ټاسک فورس غړو هېوادونو د پاکستان د تمې خلاف پرېکړه کړې ده.

د چین، ترکیې او د خلیج د همکارۍ شورا غړیو چې سعودي عربستان یې مشري کوي، تېره اوونۍ د پاکستان په برخه کې له داسې پرېکړې سره مخالفت څرګند کړی و، خو هغو پټو سرچینو چې رویټرز خبري اژانس خبرې ورسره کړي، ویلي چې د چین حکومت او د خلیج شورا غړي دولتونه د پاکستان له ملاتړه تېر شوي دي.

د یادونې وړ ده چې د پاکستان د حکومت رسمي سرچینو د رویټرز خبري اژانس د دې، نوي رپوټ په ارتباط غبرګون نه دی څرګند کړی.

د پالیسۍ جوړولو په دې نړیواله اداره کې ۳۵هېوادونه او د ملګرو ملتونو د سازمان په ګډون، ګڼ شمېر نړیوالې مالي ادارې او بانکونه غړیتوب لري.

چین د فایننشل اکشن ټاسک فورس نړیوالې ادارې غړی دی.

اسرائیل، سعودي عربستان او د خلیج د همکارۍ شورا یې څارونکي دي.

د فایننشل اکشن ټاسک فورس پرېکړه کونکی پلاوی، په کال کې درې غونډې کوي.

د هغوی راتلونکې غونډه د جون په میاشت کې ده.

XS
SM
MD
LG