په افغانستان کې مېشت امریکایي ځواکونه وایي چې په شمال کې یې د چین او تاجکستان پولو ته څېرمه د طالبانو د روزنې مرکزونه او د ختیځ ترکستان د اسلامي غورځنګ د ترورېستي سازمان ملاتړ کوونکې شبکې تر هوايي بریدونو لاندې نیولې دي.
امریکایي ځواکونو د یوه بیان په خپرولو سره ویلي دي چې دغه بریدونه له افغانستان سره مرسته کوي، څو خپل ګاونډیان قانع کړي چې خاورهیې د هغو ترورېستانو لپاره خوندي ځای نهدی چې غواړي د دغه هېواد له پولو په ګاونډیو هېوادونو کې عملیات وکړي.
په بیان کې په افغانستان کې د امریکایي ځواکونو د قوماندان جنرال جان نېکلسن په حواله ویل شوي دي:
"دلته د هېڅ یوې ترورېستي ډلې لپاره خوندي ځای نهشته، موږ چې دوی په هر ځای کې ووینو، په نښه بهیې کړو. موږ به په ټول هېواد کې د دوی تعقیب ته دوام ورکړو."
د ختیځ ترکستان اسلامي غورځنګ یو ترورېستي سازمان دی چې د چین په لوېدیځ کې د اویغور توکم په بېلتونپاله ډلو کې ریښې لري.
د ختیځ ترکستان د اسلامي غورځنګ جنګیالي په افغانستان کې د القاعده او طالبانو په لیکو کې جنګېدلي دي او په چین کې دننه او بهر په څو بېلابېلو ترورېستي فعالیتونو کې د ښکېلتیا له کبله ګرم بلل شوي دي.
د ۲۰۰۲ میلادي کال په مې میاشت کې د ختیځ ترکستان د اسلامي غورځنګ دوه غړي چې په قرغستان کې یې د امریکا په سفارت د برید پلان درلود له قرغزستان نه چین ته ډیپورټ کړای شول.
دوی په بدخشان او په ټوله کې سرحدي سیمه کې د طالبانو ملاتړ له ځانه سره درلود، چین تهیې یو امنیتي ګواښ پېښ کړی وو.
په بیان کې ویل شوي دي چې په وروستیو میاشتو کې په شمال کې د طالبانو، داعش او نورو ترورېستي ډلو پر ضد چې هڅه کوي ځان ته په شمال کې یو خوندي ځای ومومي د افغان دفاعي او امنیتي ځواکونو عملیات زیات شوي دي.
په بیان کې دا هم ویل شوي دي چې په وروستیو کې افغان کمانډویي ځواکونو د ۲۰۹ شاهین قول اردو سره په نږدې همغږۍ کې د کندز ښار په شمال کې طالبانو ته د دوی په مرکزونو کې ماتې ورکړه او د کندز ښار یې د وسلهوالو له ګواښه خوندي کړ.
د امریکایي ځواکونو د هوایي عملیاتو د قوماندان مرستیال جنرال جېمز هکر د فبروري د میاشتې په اوومه نېټه په یوه خبري غونډه کې وویل چې د جنګ او افکارو ازمیښت دی.
دی وایي چې افغان پوځ د هرې ورځې په تېرېدو سره لا غښتلی کېږي.
په بیان کې په افغاستان کې د امریکایي ځواکونو د قوماندان جنرال جان نیکلسن په حواله ویل شوي دي چې موږ له افغانستان سره یوو او له افغانانو سره به پاتې شو.