په ټولنیزو شبکو کې د یوې ښځې د وهلو د ویډیو له خپرېدو وروسته د تخار د والي ویاند وايي، دغه ښځه ۲۲ کلنه ده او د کورنیو د غړیو لهخوا وهل شوې ټکول شوې ده.
سنتالله تیمور د جمعې په ورځ ازادي راډیو ته وویل، په ویډیو کې یو سیمهییز قوماندان هم لیدل کېږي چې دی هم د دغې ښځې د کورنۍ غړی دی.
د تیمور په خبره دغه پېښه د تخار ولایت د چاهاب ولسوالۍ د رباط حمیدالدین په کلي کې رامنځته شوې ده.
دی د دغې پېښې په اړه د لومړیو معلوماتو له مخې وايي:
"د دغې ښځې کور ته یو ځوان ننوتی و او شاوخوا درې ساعته په دغه کور کې و. د ښځې د کور غړي خبرېږي چې ښځه او ځوان یوازې دي، ښځه بهر کوي او وهي يې. کوم سپینږیري چې په ویډیو کې لیدل کېږي د ښځې خسر او نور ټول يې د کورنۍ غړي دي."
مګر کوم هلک چې له دې ښځې سره لیدل شوی له برخلیکه یې نه دی خبر او داسې ښکاري چې په دې صحرايي محکمه کې نه دی وهل شوی.
د تخار د والي ویاند وايي، د دغې ښځې مېړه له څو کلونو راهیسې په ایران کې اوسېږي.
دی د دغې ښځې د روغتیا په اړه څه نه وايي خو وايي، ژوندۍ ده او اوس د چاهاب په ولسوالۍ کې د خپل میړه په کور کې اوسېږي.
د تیمور د لومړیو معلوماتو له مخې دغه پېښه شاوخوا یوه نیمه میاشت وړاندې، د قوس په میاشت کې رامنځته شوې ده.
دا چې د سیمې خلک مخابراتي خدمتونو ته کافي لاسرسی نهلري، ونه توانېدو چې د پېښې په اړه عیني شاهدان وپوښتو، خو د بدخشان ولایت د شهر بزرګ ولسوالۍ د ګردنې د کلي اوسیدونکی فیضالرحمن چې کلی یې د پېښې ځای ته نېږدې دی، د عیني شاهدانو له خولې وايي، دغه ښځه د سیمې د یو شمېر ملا امامانو د فتوا او د یو سیمهییز قوماندان په حکم په صحرايي محکمه کې وهل شوې ده.
نوموړی وايي:
"یو دوه ملا امامان وو او قوماندان فیض، ملایانو فتوا ورکړه او قوماندان فیض د اجرائیه مسؤل په توګه، دوه ښځې وهلي ټکولي دي. پر دغې قضېې ۱۰-۱۵ ورځې تېرېږي."
د فیسبوک په خپرې شوې ویډیو کې لیدل کېږي چې یو شمېر کسان چې کوتکونه یې په لاسونو کې دي، په واورینه فضا کې لومړی دغې ښځې ته ښکنځل کوي او بیا یې د اللهاکبر په شعارونو سره په کوتکونو وهي.
ښځه چیغې نه وهي، خو یو سړی یې په لګته وهي او پر ځمکه یې غورځوي.
په افغانستان کې دغه ډول صحرايي محکمې بې ساري نهدي.
پخوا تر دې شاوخوا دوه کاله مخکې د غور په ولایت کې د رخشانې په نامه یوه نجلۍ له کوره د تېښتې په جرم په یوې صحرايي محکمې کې ووژل شوه او په کابل ښار کې د فرخندې په نامه بله نجلۍ، د قران د سوځولو په تور، په وهلو ټکولو وژل شوې ده.
د افغانستان د بشر د حقونو د خپلواک کمېسیون ویاند بلال صدیقي د دغې پېښې په غبرګون کې د جمعې په ورځ ازادي راډیو ته وویل، د تخار ولایت د چاهاب د ولسوالۍ د پېښې عاملین باید ژر تر ژره ونیول شي.
نوموړی وايي:
"موږ اندېښمن یو او هیله لرو چې د افغانستان دولت د قانون د حاکمیت او د خپلسرو محکمو د مخنیوي په خاطر، هر اړخېز اقدامات وکړي او هېچا ته اجازه ورنهکړي چې صحرايي محکمې جوړې کړي."
د تخار د والي ویاند سنتالله تیمور وايي، د سیمې د لېرې والي له امله دولت تر اوسه په دې اړه اقدام نهدی کړی، خو د ده په خبره د چاهاب ولسوال ته سپارښتنه شوې چې د پېښې د څېړلو لپاره یو پلاوی واستوي او د هغو کسانو د نیولو اقدام وکړي چې په ویډیو کې لیدل کېږي.
راپور: خان محمد سیند