د لاسرسي لېنکونه

پنجشنبه ۲۵ زمری ۱۳۹۷ کابل ۰۲:۱۹

فارن پالېسي: د ټرمپ تر وينا مخکې، د افغانستان له جبهې بد خبرونه!


يو شمېر نړيوالو رسنیو د افغانستان په اړه مقالې خپرې کړې دي.

  • واشنګټن پوسټ

واشنګټن پوسټ ورځپاڼې د افغانستان د سولې او په هېواد کې د زياتېدونکي تاوتریخوالي په اړه ليکلي دي.

د مقالې ليکوال وايي، د افغانستان د سولې خبرې د سې شنبې په ورځ هغه مهال له ناهيلۍ سره مخامخ شوې چې افغان چارواکو طالب مشرانو ته د ترديد پيغامونه ورکړل.

په مقاله کې راغلي چې دا پيغامونه وروسته له هغه خپاره شول چې په پلازمېنه کابل کې وسله‎والو سخت دريځو حملې وکړې او د امریکا ولسمشر ډونالد ټرمپ وويل، له طالبانو سره د سولې مذاکرات نه‎کوي.

ورځپاڼې د ولسمشر غني خبرو ته هم اشاره کړې او ويلي يې دي چې د دغو حملو د قربانيانو بدل به اخلي.

ښاغلي غني همداراز وويل، د افغانستان دښمنان باید پوه شي چې د افغانانو ولسمشر نه‌تسليمېږي.

واشنګټن پوسټ لیکلي:

د ټرمپ پالېسي دا وه چې د امريکا پوځ د افغانستان د ځواکونو روزنه زیاته کړي او د هغوی ظرفيتونه لوړ کړي، څو طالبان اړ کړي د مذاکراتو مېز ته کېني او ۱۶ کلنه جګړه پای ته ورسېږي.

خو د لیکوال په باور، ويل کېږي چې دا هدف ښايي کمزوری شي او د نظامي بريا پر لور تغيیر وکړي.

د افغانستان د جګړې د معلوماتو په اړه د امریکا پرېکړې ته هم یو شمېر رسنيو کتلي دي.

  • فارن پالېسي

فارن پالېسي خپرونې په دې عنوان یوه مقاله خپره کړې ده، "د ټرمپ تر وينا مخکې، د افغانستان له جبهې بد خبرونه!"

په مقاله کې راغلي چې د افغانستان حکومتي ځواکونه د طالبانو پر وړاندې د جګړې د تغيیر په خاطر له ننګونو سره مخامخ دي او امریکا هلې ځلې کوي چې په افغانستان کې د جګړې د پرمختګ په اړه د معلوماتو مخه ونيسي.

د خپرونې په وینا، د افغانستان د بيارغونې په برخه کې د امریکا ځانګړي پلټونکي اداره يا سيګار دې خبرې نا ارامه کړې ده.

دا ځکه چې ټاکل شوې وه دغه سرپلټونکی په افغانستان کې د نظامي عملیاتو په اړه معلومات خپاره کړي چې هېواد يې په‎کې ۱۵ زره سرتېري لري او د بمباریو د زياتېدو خبر يې تأييد کړی دی.

سيګار په خپل نوي راپور کې د جګړې د څرنګوالي په اړه ليکلي چې د امریکا پوځ له دې ادارې غوښتي چې هغه معلومات خپاره نه‎کړي چې د افغانستان څومره ځمکه د سخت دريځو په لاس کې ده.

د خپرونې په وينا، که څه هم دغه محرم اعلان شوي معلومات پټ نه‎دي او مخکې هم خپاره شوي دي، خو په افغانستان کې د غوڅ ملاتړ مأموریت د سې شنبې په ورځ وويل چې دغو معلوماتو ته په تېروتنه په محرمو معلوماتو کې ځای ورکړل شوی دی.

XS
SM
MD
LG