د لاسرسي لېنکونه

شنبه ۲۷ زمری ۱۳۹۷ کابل ۱۱:۲۶

سولې شورا: طالبان دې له راغلې نړېوالې اجماع له فرصته ګټه پورته کړي


د افغانستان د سولې عالي شورا هيله لري چې د افغانستان د سولې او پخلاينې پر مسئله وروستي بحثونه به د دولت له عمده مخالفې ډلې وسله‎والو طالبانو سره د روغې جوړې سبب شي.

له وسله‎والو طالبانو سره د سولې او پخلاينې په اړه د خوشبينيو او بدبينيو په منځ کې د سولې عالي شورا له دې ډلې سره د سولې امکان ته هيله مندي وښوده.

د دغې شورا وياند امين الدين مظفري تېره شپه ازادي راډيو ته وويل، په دې برخه کې يوه سيمه‎ييزه او نړيواله اجماع راغلې او وسله‎وال طالبان بايد له دغه فرصته ګټه واخلي.

د سولې د عالي شورا وياند امين الدين مظفري
د سولې د عالي شورا وياند امين الدين مظفري

تر دې مخکې په ملګرو ملتونو کې د امريکا سفيرې نېکي هېلي تېره اوونۍ په نيويارک کې د ملګرو ملتونو په مقر کې وويل، موږ تر بل هر وخت له وسله‎والو طالبانو سره د مذاکرو او سولې پروسې ته ورنېږدې شوي يو.

خو د امريکا د بهرنيو چارو وزارت مرستيال جان جي. سالیون «John J. Sullivan» د جمعې په ورځ ناوخته د ملګرو ملتونو په امنيت شورا کې د افغانستان په اړه جوړې شوې غونډې ته وويل، افغان حکومت له طالبانو سره د سولې مذاکراتو ته لېوال دى، خو طالبانو کومه لېوالتيا نه‎ده ښوولې.

د وسله‎والو طالبانو ډله چې پر دوو برخو وېشل شوې تر اوسه له افغان حکومت سره رسماً د سولې مذاکرو ته نه‎ده حاضر شوې.

وسله وال طالبان
وسله وال طالبان

ښاغلي سالیون وويل، دا وضعيت بايد بدل شي. هغه پېشنهاد وکړ چې د طالبانو د منزوي کولو او د هغوى د مالي سرچينو پر له‎منځه وړلو دې کار وشي.

په کندهار کې د سولې د کاروان غړى احمدشاه سپر وايي، د افغانستان او جنوبي اسيا لپاره د امريکا متحدو ايالتونو نوې ستراتيژۍ پر وسله‎والو طالبانو فشار زيات کړى او ښايي د سولې خبرو ته يې مجبور کړي.

ولسمشر محمد اشرف غني تېره چهارشنبه په کابل کې د سولې يوې مشورتي غونډې ته د وينا پرمهال وسله‎والو طالبانو ته په خطاب کې وويل چې د پرديو له اختيار څخه دې ځان وباسي او بين الافغاني مذاکرو ته دې حاضر شي.

XS
SM
MD
LG