د لاسرسۍ وړ لېنکونه

تازه خبر
پنجشنبه ۹ وری ۱۴۰۳ کابل ۰۸:۵۹

د امریکا د استازو جرګې په ایران کې له حکومت ضد اعتراضونو نه ملاتړ وکړ


د امریکا استازو جرګې د یوه پرېکړه‌لیک په تصویبولو سره په ایران کې د حکومت ضد پراخو اعتراضونو نه ملاتړ کړی او د حکومت له‌خوا ځپنه‌یې په کلکه غندلې ده.

د امریکا د استازو جرګې له‌خوا په دغه پرېکړه‌لیک کې چې د سې شنبې په ورځ «۱۳۹۶ کال د مرغومې ۱۹» تقریباً په بشپړ اکثریت تصویب شو، په دې معنی چې د دې جرګې ۴۱۵ غړو ورته مثبته او یوازې دوو منفي رأیه ورکړه، په ایران کې د حکومت ضد معترضینو ملاتړ شوی او د تهران له‌خوا د ځپنې اقدامات غندل شوي دي.

په پرېکړه‌لیک کې ویل شوي چې دا جرګه د ایران د خلکو چې د یوه مستبد او فاسد رژیم په وړاندې قانوني او سوله‌ییز اعتراضونه مخ ته وړي، ولاړه ده او د ایران د خلکو په وړاندې د حکومت له لوري له بشري حقونو څخه جدي سرغړونې په کلکه غندي.

پرېکړه‌لیک همداراز د ولسمشر ټرمپ له ادارې غواړي چې په ایران کې له بشري حقونو پر سرغړونکو نوي بندیزونه ولګوي.

د استازو جرګې د بهرنیو اړیکو د کمېټې مشر اېډ رایس «Ed Royce» وویل د دې تر څنګ چې د ایران له خلکو سره درېږو باید دا روښانه کړو چې دوی زموږ د بندیزونو قرباني نه‌شي بلکې په دغو بندیزونو کې باید مستبد او بې‌ثباته رژیم په نښه شي نه د ایران خلک.

د استازو جرګې د بهرنیو اړیکو د کمېټې مشر اېډ رایس.
د استازو جرګې د بهرنیو اړیکو د کمېټې مشر اېډ رایس.

د دغه د حکومت ضد اعتراضونو په ترڅ کې چې د تېر کال د ډسمبر د میاشتې له ۲۸ راهیسې پیل شوي، تر اوسه ۲۲ تنه وژل شوي او په سلګونه کسان نیول شوي دي.

پرون د ایران د پارلمان یوه غړي وویل چې شااوخوا ۳۷۰۰ کسان نیول شوي دي.

د پارلمان د اصلاح غوښتونکي غړي محمود صادقي له لوري دغه شمېره له هغې ډېره لوړه ده چې حکومتي چارواکو تر اوسه رسماً ورکړې ده.

په عین حال کې د ایران ستر مذهبي مشر ایات‌الله علی خامنه‌اي بیا ادعا وکړه چې تهران هغه دسیسه چې د ده په وینا د امریکا د متحده ایالاتو او بریتانیا له‌خوا په ایران کې ناارامیو ته د لمن وهلو لپاره ترتیب شوې وه، شنډه کړه.

په ایران کې حکومت ضد اعتراضونه.
په ایران کې حکومت ضد اعتراضونه.

د امریکا متحده ایالاتو او نورو بهرنیو هېوادونو چې د ایران ستر مذهبي مشر تورن کړي، دغه ادعا رد کړې ده.

په ایران کې پیل شوي د حکومت ضد پراخ اعتراضونه په لسګونه ښارونو کې شوي دي.

پراخه بې‌کاري او اداري فساد اصلي عوامل دي چې معترضین‌یې لارو کوڅو ته را ایستلي دي.

XS
SM
MD
LG