د پاکستان یو شمېر مدني فعالان او ځوانان چې د افغانستان او پاکستان ترمنځ د اړیکو د رغېدو په هدف کابل ته راغلي وايي، د دواړو هېوادونو ترمنځ بېباوریو ګڼو ستونزو ته لار هواره کړې.
د پاکستان مدني فعال احمد جاوید وايي، ترهګري د دواړو افغانستان او پاکستان له ولسونو قرباني اخلي او په کار ده چې د دغې پدیدې پر وړاندې ګډه مبارزه وشي.
نوموړي د چهارشنبې په ورځ «۱۳۹۶ کال د لیندۍ ۲۹» په کابل کې د افغانستان او پاکستان د ځوان سفیرانو په نامه کنفراس کې په دې اړه وویل:
"ترورېزم، افراطیت، ترهګري، فقر، بېکاري او ناامني هغه ستونزې دي چې د دواړو پاکستان او افغانستان ولسونه ترې ځورېږي او دغه ستونزې په یوازې ځان نهشي حلېدای، تر هغې چې په ګډه کار ونهکړو."
په دې وروستیو کې د افغانستان او پاکستان د اړیکو د ښه کېدو په هدف کابل ته د پاکستاني پلاوو تګ راتګ ډېر شوی دی.
د کابل او اسلاماباد اړیکې له شااوخوا دوو کالو راهیسې د بېلابېلو دلایلو له کبله خړې پړې دي.
افغان حکومت ادعا کوي چې پاکستان د ترهګرۍ پر وړاندې مبارزه کې رښتینې همکاري نهکوي او په افغانستان کې ډېری ترسره شوې حملې د پاکستان په خاوره کې طرح شوې دي.
پاکستان هم انتقاد کوي چې ګواکې د افغانستان خاوره د دوی پر ضد کارول کېږي هغه ادعا چې افغان حکومت بیا تل رد کړې ده.
له دې ټولو سره سره افغان مدني فعال سید محمود یزدانپرست بیا په دغې غونډه کې وویل، کابل ته د پاکستان پلاوو تګ راتګ به هغه مهال ګټه وکړي چې دوی پر خپل حکومت د سیاست د بدلون په اړه فشار راوړي.
دی وايي:
"واضح پیغام چې زهیې غواړم، د پاکستان ځوانانو ته ورکړم، هغه دا دی چې د مهربانۍ له مخې پر خپلو سیاستمدارانو فشار راوړئ او یو وړه حلقه چې خپلې ګټې غواړي، باید پرېنهښودل شي چې دوه لوی ملتونه په خپلو کې په جنګ واچوي."
په ورته وخت کې د اطلاعاتو او کلتور وزارت نشراتي معین سید اقا فاضل سانچارکي چې هغه هم د افغانستان او پاکستان د ځوان سفیرانو په نامه کنفراس کې ګډون کړی و، ټینګار وکړ چې که هر څوک په افغانستان او پاکستان کې له ترهګرۍ ملاتړ کوي باید ځوانانیې مخه ونیسي.
د ښاغلي سانچارکي په خبره افغانستان او پاکستان باید د یو بل په منلو سره خپلمنځي اختلافات د خبرو او ډیالوګ له لارې حل کړي.
راپور: محمد حدیث پردېس
