د ارزګان ولایت سیمهییز چارواکي وايي، له شااوخوا درېیو میاشتو وروستهيې روغتیايي مرکزونو پرانیستل شول.
ولایتي چارواکي د روغتیايي مرکزونو د خلاصولو خبر پر داسې مهال رسنیو ته ورکوي چې شااوخوا درې میاشتې مخکې وسلهوالو طالبانو په دې هدف روغتیايي مرکزونه تړلي وو چې خلکو ته یوازې تش په نوم خدمات وړاندې کوي او دغهراز يې ویلي وو چې تر هغو به روغتیايي مرکزونه خلاص نهکړي، څو چې يې غوښتنې نهوي منل شوي او خلکو ته په سمه توګه صحي خدمات وړاندې نهکړل شي.
طالبانو سره د روغتیايي مرکزونو د پرانیستې مسئله د«AHDS» مؤسسې حل کړه.
وسلهوالو طالبانو همداراز ۱۰ ورځې وړاندې د «AHDS» مؤسسې دفتر هم په دې هدف وتاړه چې د دوی غوښتنې یې نهدي منلي.
د ارزګان مرستیال والي عبدالواحد پټان که څه هم دا ونهویل چې وسلهوال طالبانيې څنګه راضي کړل چې روغتیايي مرکزونو تهيې د فعالیت اجازه ورکړه، خو وايي چې په دغه ولایت کې ټول روغتیايي مرکزونه د ناروغانو پر مخ خلاص شوي او په نورماله توګهيې فعالیتونه پیل کړي دي.
نوموړي زیاته کړه چې له دې وروسته به یاده مؤسسه له پخوا په ښه کیفیت خدمات وړاندې کوي او هڅه به وکړي چې روغتیايي مرکزونه نور هم ډېر کړي.
ښاغلي پټان وویل:
"تاسو ته معلومه ده چې له تېرو څو میاشتو راهیسې وسلهوالو طالبانو تر خپل کنټرول لاندې سیمو کې پر خلکو ظلمونه کول او د ناروغانو پر مخيې روغتیايي مرکزونه وتړل، خو له ډېرو هلو ځلو وروسته بېرته موږ روغتیايي مرکزونه د ناروغانو پر مخ خلاص کړل چې د «AHDS» مؤسسې دا ستونزه حل کړې ده."
دا په داسې حال کې ده چې په ارزګان ولایت کې ۵۹ روغتیايي مرکزونه شته چې له ډلې يې ۵۰ د طالبانو تر واک لاندې سیمو کې دي.
له دې سره د دغه ولایت د عامې روغتیا ریاست هم دا مني، خو وايي چې د روغتیايي مرکزونو د خلاصون په برخه کې د وسلهوالو طالبانو ۸۰ سلنه غوښتنې منل شوي او پاتې نور بهيې هم ومنل شي.
په دغه ولایت کې د عامې روغتیا د ځايي ادارې مسؤل ډاکتر خان اغا میاخېل ازادي راډيو ته وویل:
"زه نن د ارزګان ولایت خلکو ته زېری ورکوم چې موږ له وسلهوالو طالبانو سره خپله ستونزه حل کړې او روغتیايي مرکزونه مو بېرته پرانیستي، ځکه مرکزي ادارې د هغوی ۸۰ سلنه غوښتنې منلي او موږ به ډېر ژر خپل خدمات پیل کړو."
وسلهوالو طالبانو تر اوسه په دې اړه څه نهدي ویلي.
د یادونې وړ ده چې د مسؤلینو په خبره د دغه ولایت شااوخوا ۹۰ سلنه خاوره د وسلهوالو طالبانو تر ولکې لاندې ده چې خلکيې له روغتیايي خدماتو، ښوونې او روزنې او پرمختیايي پروژو څخه بېبرخې دي.
راپور: شریفالله شرافت
