د جګړه ځپلي یمن د پلازمېنې اوسېدونکي له یوې خوا د سعودي عربستان په مشرۍ د ائتلاف د بمباریو او له بلېخوا د سیالو ډلو ترمنځ د نښتو له وېرې له خپلو کورونو نهشي راوتلی.
تېره شپه په داسې حال کې چې د سعودي عربستان په مشرۍ ائتلاف د یمن په پلازمېنه صنعا کې د حوثي یاغیانو پر مرکزونو بمباري کوله ډېري خلکو شپه د کورونو په تاکاویو کې سهار کړه.
په صنعا کې د کډوالو لپاره د ناروې شورا په نوم د خیریه ټولنې یوې غړې سوزي وان میګان «Suze van Meegen» نن دوشنبه «۱۳۹۶ کال د لیندۍ ۱۳» وویل چې د تشدد د پېښو له کبله د بشري مرستو عملیات په بشپړ ډول ځنډېدلي او د مرستندویو ټولنو کارکوونکي په خپلو کورونو کې بند پاتې دي.
مېرمن میګان وايي، په صنعا کې اوسمهال هېڅڅوک خوندي نهدي او زیاتوي چې د درنو توپونو غږونه اورېدل کېږي او د دوی د خوندیتوب لپاره هېڅ ضمانت هم نهشته.
په صنعا کې د ایران پلویو ملېشو او پخواني ولسمشر علي عبدالله صالح ته د وفادارو ځواکونو ترمنځ له تېرې اوونۍ راهیسې درنې جګړې پیل شوي.
دا نښتې ښيي چې د دې دوو ډلو ترمنځ ائتلاف خورا حساس دی او هره شېبه ماتېدای شي.
دې دوو ډلو د هغه حکومت پر ضد چې نړیوالې ټولنې په رسمیت پېژندلی او د سعودي عربستان په مشرۍ د ائتلاف په وړاندې لاس یو کړی.
د دې ائتلاف له ماتېدو سره سم د سعودي په مشرۍ ائتلاف د صالح په پلوي د حوثي یاغیانو پر مرکزونو بمبارۍ زیاتې کړي.
د سره صلیب د نړیوالې کمېټې "ICRC" یوه سیمهییز مشر رابرټ مردیني پر خپله ټویټر پاڼه کې لیکلي چې د ښار په منځ کې بمبارۍ او د درنو توپونو ډزې روانې دي، یمنیان له وېرې له خپلو کورونو نهشي راوتلی او د څښاک اوبو، صحي خدماتو، خوړو او د سونګ موادو ته لاسرسی په کمېدو دی.
د ایران د پلوي حوثي او نورو هغو ډلو وسلهوالو چې له صالح سرهیې لاس یو کړی، په ۲۰۱۴ میلادي کال کې پلازمېنه صنعا ونیوله، خو حوثیانو د پلازمېنې په شمال او صالح ته وفادارو ځواکونو په جنوب کې ځای ونیو او ځکه نو جګړې اوس د ښار په سیاسي حوزه کې چې د وزیرانو کورونه او سفارتونه پهکې دي، متمرکزې دي او د ښار د ملکي اوسېدونکو اړیکې له بهر سره پرې شوي.
د سعودي په مشرۍ ائتلاف د ۲۰۱۵ له مارچ میاشتې راهیسې د حوثي یاغیانو پر ضد هوايي حملې پیل کړي او وروستهیې هلته ځمکني عملیات هم پیل کړل.
دې بېګټې جګړې تر اوسه له ۱۰ زرو زیات ملکي وګړي وژلي او درې میلیونه خلکیې د خپلو کورونو پرېښودو ته اړ کړي دي.
یمن چې پخوا هم د عربي نړۍ له خورا بېوزلو هېوادونو و، اوس د قحطۍ پر څنډه ولاړ او د وبا له ناروغۍ سره لاس او ګرېوان دی.