د افغانستان ولسي جرګې د حکومت له لوري د ۱۲ معرفي شویو نوماند وزیرانو له ډلې ۱۱ ته د تأیيد رأیه ورکړه، خو نرګس نهان چې د کانونو او پټرولیم وزارت ته نومانده وه، له جرګې د باور رأیه تر لاسه نهکړه.
ولسي جرګې د روانې اوونۍ له پیله د یادو نوماند وزیرانو پرواګرامونه واورېدل او د دوشنبې په ورځ «۱۳۹۶ کال د لیندۍ ۱۳» ورته صندوقونه کېښودل او رأیې یې ورکړې.
د ولسي جرګې رئيس عبدالرؤف ابراهیمي
د ولسي جرګې رئیس عبدالرؤف ابراهيمي بریالیو وزیرانو ته د مبارکۍ تر څنګ د رأیې ورکونې د بهیر نتیجه داسې اعلان کړه:
"۱۲ نوماند وزیران چې د حکومت له لوري ولسي جرګې ته معرفي شوي وو، له ډلې يې ۱۱ وزیرانو د ولسي جرګې اعتماد خپل کړ او د وزیرانو په توګه وپېژندل شول، خو له بده مرغه د کانونو او پټرولیم وزارت ته نومانده نرګس نهان ونهتوانېده چې «۱+۵۰» رأیې ترلاسه کړي."
د ولسي جرګې د دوشنبې د ورځې په ناسته کې ۲۲۳ وکیلانو حضور درلود او د بریالیتوب لپاره نوماند وزیران اړ وو چې له ډلې یې د ۱۱۳ وکیلانو د تأیید رأیې خپلې او «۱+۵۰» پوره کړي.
د دوشنبې د ورځې په رأیه اچونه کې:
- طارقشاه بهرامي د ۱۴۱ تأیید رأیو سره د دفاع وزیر
- نصیر احمد درانی د ۱۴۴ تأیید رأیو سره د کرنې او مالدارۍ وزیر
- مجیبالرحمن کریمي د ۱۲۹ تأیيد رأیو سره د کلیو او پراختیا وزیر
- یما یاري د ۱۵۶ تأیيد رأیو سره فواید عامې وزیر
- فیضالله ذکي د ۱۲۶ تأیيد رأیو سره د کار او ټولنیزو چارو، شهیدانو او معلولینو وزیر
- شهزاد ګل اریوبي د ۱۱۵ تأیيد رأیو سره د مخابراتو او معلوماتي تکنالوژۍ وزیر
- ویس احمد برمک د ۱۷۳ تأیید رأیو سره د کورنیو چارو وزیر
- مصطفی مستور د ۱۵۵ تأیيد رأیو سره د اقتصاد وزیر
- محمد شفیق ګل اغا شیرزی د ۱۵۸ تأیيد رأیو سره د سرحدونو، قومونو او قبایلو وزیر
- نجیبالله خواجه عمري د ۱۲۴ تأیيد رأیو سره د لوړو زدهکړو وزیر
- وحید طهماسي د ۱۴۹ تأیید رأیو سره د ټرانسپورت وزیر
«۱+۵۰» رأيې پوره او د وزیرانو په توګه وپېژندل شول.
خو نرګس نهان چې د کانونو او پټرولیم وزارت ته نومانده وه، د ۱۰۷ تائيد رأیو په خپلولو سره ونهتوانېده چې «۱+۵۰» رأيې پوره او یاد وزارت ته بریالۍ شي.
دغه ۱۲ نوماند وزیران د تېرې اوونۍ د شنبې په ورځ د ولسمشر د دوهم مرستیال سرور دانش له لوري ولسي جرګې ته د تأیید رأیې د خپلولو په هدف معرفي شوي وو.
ښاغلي دانش د ولسي جرګې په غونډه کې وویل، دا کسان د تجربې او لیاقت له مخې ټاکل شوي او د جرګې له غړو يې وغوښتل چې شرایطو ته په پام سره د کابینې د بشپړېدو په هدف دوی ته د باور رأیه ورکړي.
په ورته وخت کې د افغانستان جمهوري ریاست د ولسي جرګې د دې پرېکړې هرکلی کړی دی.
د ولسمشر مرستیال ویاند دوا خان مینهپال
د ولسمشر مرستیال ویاند دوا خان مینهپال په دې اړه ازادي راډيو ته وویل:
"موږ د ولسي جرګې د دې پرېکړې هرکلی کوو چې زموږ اکثریت کاندید وزیرانو تهيې د اعتماد رأیه ورکړه، زموږ هیله هم همدا وه چې ولسي جرګه دغو کاندید وزیرانو ته چې وړتیا او تخصصيې درلود او د افغانانو خدمتيې یوازنۍ هیله ده، رأیه ورکړي."
د افغانستان ولسي جرګې له حکومته وغوښتل چې د نرګس نهان د کانونو او پټرولیم وزارت لپاره بل نوماند وزیر او دغهشان د بهرنیو چارو، پوهنې او اطلاعاتو او فرهنګ وزارتونو په ګډون، د سترې محکمې د عالي شورا غړي هم دې جرګې ته د رأیې ورکونې لپاره معرفي کړي.
د حقوقي چارو افغان کارپوه کبیر رنجبر د ولسي جرګې دغه پرېکړه په دولتي ادارو کې د سرپرستۍ د دوام د پای ته رسېدو او د ستونزو د هواري لپاره مهمه بولي، خو وايي ولسي جرګې باید د کانونو او پټرولیم وزارت نوماندې ته چې د دغه وزارت لپارهيې ښه پروګرامونه هم لرل، د تائيد رأیه ورکړې وی.
راپور: اکرامالله اکرام
- جزئیات قبلی
ولسي جرګې نن دوشنبه له یوې کاندید وزیرې پرته نورو ټولو ۱۱ کاندید وزیرانو ته د باور رأیې ورکړې.
د افغانستان حکومت د وزارتونو لپاره له دغو کاندیدانو؛
- طارقشاه بهرامي - دفاع وزارت
- ویس احمد برمک - کورنیو چارو وزارت
- نصیر احمد دراني - کرنې وزارت
- مجیبالرحمن کریمي - د کلیو د پراختیا او بیارغونې وزارت
- مصطفی مستور - اقتصاد وزارت
- شهزاد ګل اریوبي - د مخابراتو او معلوماتي ټکنالوژۍ وزارت
- ګل اغا شیرزی - د قومونو او قبایلو چارو وزارت
- فیضالله ذکي - د کار او ټولنیزو چارو وزارت
- حمید طهماسي - د ټرانسپورت وزارت
- نجیبالله خواجه عمري - د لوړو زدهکړو وزارت
- یما یاري - د فواید عامې وزارت
لپاره وتوانېدل چې د ولسي جرګې د باور رأیې ترلاسه کړي.
یوازې د کانونو او پټرولیم وزارت لپاره کاندیده نرګس نهان ونهتوانېده چې د ۲۲۳ حاضرو وکیلانو نه ټاکلې ۱۷۳ د باور رأیې خپلې کړي.
حکومت تر اوسه د بهرنیو چارو، پوهنې او اطلاعاتو او فرهنګ وزارتونو لپاره کاندید وزیران ولسي جرګې ته نهدي معرفي کړي.
ولسي جرګه له حکومته غواړي چې ډېر ژر د دغو پاتې ۳ وزارتونو لپاره هم نوماند وزیران وروپېژني.