د لاسرسۍ وړ لېنکونه

تازه خبر
یکشنبه ۱۰ زمری ۱۴۰۰ کابل ۰۶:۰۷

نړۍ

استاینیتز: اسرائيل د ايران په اړه عرب هېوادونو سره پټ تماسونه نيولي

د اسرائيل د کابينې يوه وزير داسې اشارې ورکړي چې اسرائيل د ايران په اړه د ګډو اندېښنو په تړاو له سعودي عربستان او نورو عرب هېوادونو سره پټ تماسونه نيولي دي.

دا ظاهراً اول وار دى چې د اسرائيل يو عالي رتبه مقام د پټو معاملو خبره تائيدوي.

د اسرائيل د انرژۍ وزير یووال استاینیتز دا څرګندونې د اسرائيل د پوځ له راډيو سره په مرکه کې وکړې، خو د دغو تماسونو څرنګوالى يې مشخص نه‌کړ.

ښاغلي استاینیتز وويل:

"موږ له ګڼو اسلامي او عرب هېوادونو سره تماسونه لرو."

هغه د پټو تماسونو په برخه کې د سعودي عربستان او نورو اسلامي هېوادونو يادونه وکړه.

که څه هم د اسرائيل د صدراعظم له دفتره د نظر ورکولو غوښتنې شوي، خو دغه دفتر لا په دې اړه تبصره نه‌ده کړې.

د سعودي عربستان حکومت هم د اسرائيل د انرژۍ د وزير د څرګندونو په اړه څه نه‌دي ويلي.

اسرائيل او سعودي عربستان ايران ته، په منځني ختيځ کې د خپل امن لپاره د عمده خطر په سترګه ګوري.

په وروستيو کې د سنيانو په رهبرۍ د سعودي عربستان او د شيعه‌ګانو په رهبرۍ ايران ترمنځ د ځينو مسايلو له کبله کړکېچ اوج ته رسېدلى دى.

د ورځې تازه خبرونه دلته ولولئ

د جرمني یوه محکمه د نازي جرمني یو پخوانی ګارډ محاکمه کوي

زاکسین هاوسین کمپ

د جرمني یوې محکمې پرېکړه کړې چې د نازي جرمني یو پخوانی ګارډ چې عمر یې سل کاله دی، د روان کال په پای کې محاکمه کړي.

دا کس چې د حکومت د پرېکړې او د وګړو د شخصي محرمیت د قوانینو له مخې یې هویت نه دی افشا شوی، تورن دی چې د ۱۹۴۲ او ۱۹۴۵ کلونو ترمنځ یې د جرمني پلازمېنې برلین ته نژدې په زاکسین هاوسین Sachsenhausen په تجمع کمپ کې له درې نیم زرو د زیاتو کسانو په وژنه کې یې مرسته کړې.

د نیوروپین ولسوالۍ محکمې په ۲۰۱۹ میلادي کال کې حکم ورکړ چې د دوهمې نړیوالې جګړې له پای ته رسېدو ۷۶ کال وروسته نوموړی محاکمې ته راکاږي.

جرمنۍ ورځپانې ویلټ اَم سونتاګ نن شنبه (د زمري ۱۰مه) راپور ورکړ چې دا سل کلن تورن به په اکتوبر میاشت کې دا توان ولري چې د ورځې د دوو ساعتونو لپاره محاکمې ته د سوال ځواب لپاره حاضر شي.

عُمان کې د اسراییلو پر ټانکر برید؛ ایران د اسراییل ادعا رد کړه

د اسراییل او ایران ګډ بیرغونه

ایران د اسراییلو هغه ادعا رد کړې چې وايي، تهران د عُمان سواحلو ته نژدې د اسراییلو د تېلو پر یو اړوند ټانکر د تېرې سې شنبې ورځې په برید کې لاس لري.

په دې برید کې د دې ټانکر بېړۍ دوه کار کوونکي چې یو د بریتانیا او بل د رومانیا وګړي وو، ووژل شول.

دا بېړۍ چې مالک یې یو جاپانی شرکت دی او د لایبریا بیرغ پرې رپېده په لندن کې دېره اسراییلي شرکت زودیاک ګروپ اداره کاوه.

د ایران د بهرنیو چارو وزارت ویاند سعید خطی بزاده نن د اګسټ په لومړۍ نېټه په خپله اوونیزه خبري غونډه کې وویل چې ناامني، ترور او تاوتریخوالی اسراییلو جوړ کړی دی او زیاته یې کړه، د اسراییلو له خوا د دې تورونو هدف دا دی چې له حقایقو څخه پاملرنه بلې خوا ته شي.

له دې مخکې د اسراییلو صدراعظم نفتالي بینیت پر ایران تور ولګاوه چې ځان د دې پېښې له مسوولیته باسي.

د امریکا سمندري ځواک پرون په یوه بیان کې وویل چې د عُمان په ساحل کې یو ټانکر بېړۍ د بې پېلوټه الوتکې په برید کې په نښه شوې وه.

بیان یادونه کوي چې له برید وروسته یې دوه جنګي بېړۍ د مرستې لپاره د تیلو ویجاړ ټانکر ته ولېږلې څو تر خوندي ځایه یې بدرګه کړي.

بوسنیا کې د ملګرو ملتونو د استازي مشري 'شمیت' ته وسپارل شوه

کریستیان شمیت

په بوسنیا هرزګووینا کې د ملګرو ملتونو د ځانګړي استازي مشري نن یکشنبه (د زمري ۱۰مه) جرمني کریستیان شمیت ته وسپارل شوه.

شمېت د اتریشي ډيپلومات والنټین اینزکو پر ځای چې په تېرو ۱۲ کلونو کې یې پر دې دنده کار وکړ ټاکل شوی دی او دا په داسې حال کې ده چې په بوسنیا هرزګووینا کې دننه او بهر د ملګرو ملتونو د جګپوړې استازولۍ د برخلیک او کاري استقامتونو په اړه پوښتنې رابرسېره شوي.

د بوسنیا هرزګووینا لپاره د ملګرو ملتونو جګپوړې استازولي په ۱۹۹۵ کال کې د بالکان د سولې د موافقې پر اساس رامنځ ته شوه.

۶۳ کلن شمېت په جرمني کې د یوه هڅاند ایالاتي او فدرال سیاستوال په توګه د کار تجربه لري او له لانجمنو پرېکړو وېره نه لري.

امریکا: د اسراییلو پر ټانکر برید کې دوه تنه وژل شوي

ارشیف، عکس تزئیني بڼه لري

د امریکا سمندري ځواک وايي، د عمان په ساحل کې د اسراییل د تېلو پر یوه ټانکر د بې پېلوټه الوتکې په برید کې دوه تنه وژل شوي دي.

اسراییل دا برید چې د جمعې په ورځ وشو، د ایران له لوري بللی دی.

په برید کې د ټانکر دوه تنه عمله چې یوه د بریتانیا او بله د رومانیا وه، وژل شوي.

دا په وروستیو کلونو کې په دې سیمه کې پر یوې سوداګري بېړۍ لومړنی برید دی.

د امریکا سمندري ځواک ویلي چې له پېښې وروسته یې خپلې دوې جنګي بېړۍ د تیلو ټانکر ته د مرستې لپاره ولېږلې او هغه یې تر خوندي ځایه پورې بدرګه کړه.

د واشنګټن یوې محکمې یو ایرانی په غیرقانوني صادرولو تورن کړ

ارشیف

د امریکا په واشنګټن کې یوې محکمې یو ایرانی چې د کاناډا په مونتریال کې اوسي، په اټمي فعالیتونو کې د کارول کېدونکو وسایلو په غیرقانوني صادرولو تورن کړ.

د فاکس نیوز د راپور له مخې، محکمې ویلي چې رضا سرهنګپور کفراني د کاناډا او متحده عربي اماراتو له لارې د اټمي موادو د اندازه کولو وسایل ایران ته صادر کړي دي.

رضا سرهنګپور د امریکا د صادراتو د څارنې د قانون او د صادراتو په اړه د معلوماتو د نه وړاندې کولو د قانون په سرغړونې او دغه راز شپږ ځلي په پیسو سپینولو تورن شوی دی.

امریکا: روسي هککرانو د فدرالي څارنوالانو پر کمپیوټرونو سایبري برید کړی

ارشیف، عکس تزئیني بڼه لري

د امریکا د عدلیې وزارت ویلي، ۲۰۲۰ میلادي کال کې د مطرحو فدرالي څارنوالانو پر کمپیوټرونو سایبري برید د روسي هککرانو کار دی.

دغه وزارت ویلي، یوازې په نیویارک کې د څارنوالانو په څلورو دفترونو کې د اتیا فیصده کار کوونکو د ایمیل پر حسابونو برید شوی دی.

د عدلیې وزارت د جولای په ۳۰مه وویل چې دا سایبري بریدونه د تېرکال د مې میاشتې له اوومې د دسمبر تر ۲۷مې نېټې شوي دي.

د دوی په راپور کې راغلي چې روسیي هککران د لسګونه شخصي کمپنیو او د لږ تر لږه نهو دولتي ادارو حسابونو ته هم ننوتلي.

روسي چارواکو سملاسي په دې اړه څه نه دي ویلي.

ترکیې له اوره ویریدلي سیلانیان خوندي سیمو ته ولېږدول

د ترکیه د ایجن سمندرګي په ځنګله کې لګیدلی اور

ترکیې پرون شنبه (د زمري ۹مه) دغلته له اوره ویریدلي سیلانیان په بیړیو کې خوندي سیمو ته انتقال کړل.

ترکي رسنۍ وایي، دا ګام وروسته تر دې پورته شو چې د ایجین سمندرګي په ځنګله کې د بل شوي اور ګواښ تر هوټلونو ورسېد.

د ژغورنې دا عملیات د سمندر غاړې ځواکونو له خوا ترسره شوي دي، خو له شخصي بیړیو هم غوښتل شوي چې دې عملیاتو کې مرسته وکړي.

دا اور دوه ورځې وړاندې د ترکیې د توریستي ښارونو انتالیا، بودروم، مارماریس او مرسین په ځنګلونو کې ولګېد او باد یې لمن لا پسې پراخه کړه.

د ترکیې اناتولي خبري اژانس ویلي چې ولسمشر رجب طیب اردوغان په اور ځپلو سیمو کې عمومي فاجعه اعلان کړې او ویلي یې دي چې د دې پېښو د لاملونو په اړه به څیړنه کېږي.

په دې اور لګېدنه کې د ځنګله د دوو کار کوونکو په ګډون ۶ تنه وژل شوي دي.

د عراق پوځ: د جنازې پر مراسمو برید کې ځینې کسان وژل شوي

ارشیف

د عراق پوځ په یوه اعلامیه کې وویل، د دغه هېواد په شمال کې د جنازې پر مراسمو په برید کې ځینې کسان وژل شوي دي.

د عراق یوه امنیتي مسوول ویلي، د پولیسو او ملکیانو په ګډون اته کسان هغه وخت ووژل شول چې افراطي وسله والو د خلکو پر یوه ډله ډزې وکړې.

دغه چارواکي د نوم نه ښوولو په شرط ویلي چې دا برید داعش ډلې کړی دی.

دوې اوونۍ مخکې د عراق په پلازمېنه بغداد کې پر یوه بازار په ځانمرګي برید کې لږ تر لږه ۳۰ کسان وژل شوي او تر ۵۰ زیات نور ټپیان شوي وو.

بله حمله په جنورۍ میاشت کې شوې وه چې ۳۲ تنه یې وژلي او ۱۱۰ تنه نور ټپیان کړي وو.

د هغو دوو حملو مسوولیت داعش ډلې منلی و.

د عراق چارواکو د ۲۰۱۷میلادي کال په ډسمبر میاشت کې له داعش ډلې د زیاتو سیمو تر نیولو وروسته د دې افراطي ډلې په وړاندې د بریا اعلان کړی و.

له هغې راهیسې داعش ډله په عراق کې خال- خال حملې کوي.

د عمان سمندرګي کې پر ټانکر برید؛ امریکا: ښايي بې پیلوټه الوتکې کړی وي

ارشیف، عکس تزئیني بڼه لري

د امریکا د متحدو ایالاتونو سمندري ځواکونو نن شنبه (د زمري ۹مه) وویل، د دوی د متخصصانو په باور د عمان د خلیج په سواحلو کې د تېلو پر یوه ټانکر ښايي د بې پېلوټه الوتکې له خوا حمله شوي وي.

تر دې مخکې اسراییل د تېلو پر یوه ټانکر په برید کې ایران دخیل بللی و، خو ایران تر اوسه په رسمي ډول په دې باب څه نه دي ویلي.

په دې حمله کې دوه تنه وژل شوي چې ویل کېږي یو یې د رومانیا او بل د بریتانیا دی. د دې ټانکر چارې د اسراییل په لاس کې وې.

زودیاک شرکت چې مرکز یې په لندن کې دی، ویلي دي چې پر دې ټانکر د لایبریا بیرغ رپېده او د پنجشنبې په ورځ حمله پرې وشوه.

د اسراییل د بهرنیو چارو وزیر یاییر لاپید ایران په دې پیښه کې دخیل ګڼلی دی، ده خپل بریتانیایي سیال ته وویل چې په کار ده دې پیښې ته ځواب ورکړل شي.

ایران تر اوسه په رسمي ډول په دې باب څه نه دي ویلي.

العالم ټلوېزیون چې په عربي ژبه خپرونې کوي او د ایران د حکومت دی، د یوې نامعلومې سرچینې په وینا خبر ورکړی چې دا حمله په سوریه کې پر یوه هوایي ډګر د اسراییل د مشکوک برید په ځواب کې شوې ده.

قریشي: د پاکستان دښمنان د چینایي شرکتونو کار کوونکي په نښه کوي

د پاکستان د بهرنیو چارو وزیر شاه محمود قریشي

د پاکستان د بهرنیو چارو وزیر تور لګولی چې د ده د هېواد دښمنان، د چینایي شرکتونو کار کوونکي په نښه کوي.

شاه محمود قریشي پرته له دې چې د کوم ځانګړي هېواد نوم یاد کړي وویل، په کراچۍ ښار کې د چهارشنبې ورځې برید چې دوه چینايي کارګران یې ټپیان کړل او پر یوه بس د دوو اونیو مخکې چاودنه چې نهه چینايي وګړي یې ووژل د پاکستان روحیه نه شي کمزورې کولای.

د چهارشنبې ورځې د وسله وال برید په اړه د پاکستاني پولیسو په لومړني راپور کې ویل شوي و چې په دې پېښه کې یو تن ټپي شوي چینايی وګړی د کراچۍ د اټمي برښنا د بټۍ انجینر و، خو په دې پسې پولیسو په یوه بل راپور کې د اټمي بټۍ خبره واېستله او یوازې دومره یې وویل چې په برید کې دواړه وژل شوي چینایان د فابریکو کارګران وو.

چین په وروستیو څو کلونو کې په پاکستان کې د میلیاردونو ډالرو په ارزښت پانګونه کړې خو دې پانګونو د هغو بېلتونپالو ډلو مخالفتونه پارولي چې وايي، د دوی ولسونو ته د دې پروژو هېڅ ګټه نه رسېږي.

ترکیه کې له اویا په زیاتو سیمو کې اورونه لګېدلي

مدیترانې سمندرګي ته نژدې کې اورونه

د ترکیې په جنوب کې له تېرو دوو ورځو راهیسې د اور لګېدو دوام په سیمه کې د لسګونه کلیو او څو هوټلونه د وتلو باعث شو.

ترکي چارواکي وايي چې مدیترانې سمندرګي ته نژدې کې له اویا په زیاتو سیمو کې اورونه لګېدلي دي.

د ترکیې ولسمشر رجب طیب اردوغان پرون جمعه (د زمري ۸مه) وویل چې له دې ډلې په ۱۴ ځایونو کې اورونه لا هم بل دي.

انتالیا، مرمریز او موګله هغه ښارونه دي چې د راپورونو له مخې تر ټولو زیاته اورلګیدنه په کې شوې ده.

د ترکیې د ځنګلونو د ساتنې وزیر ویلي چې په لږ تر لږه ۷ ولایتونو کې د اور لګېدو پېښې شوي دي. د دې پېښو علت ظاهرا د هوا تودوخه بلل شوې ده.

د خلیج همکارۍ شورا: ایران دې د سیمې هېوادونو کورنیو چارو کې لاسوهنه ودروي

د خلیج د همکارۍ شورا یوه غونډه

د خلیج د همکارۍ شورا له ایران څخه وغوښتل چې د سیمې هېوادونو په کورنیو چارو کې لاسوهنه ودروي.

د خلیج د همکارۍ شورا سرمنشي نایف الحجرف پر ایران غږ وکړ چې د سیمې د هېوادونو په چارو کې د لاسوهنې د بس کولو ترڅنګ د «ترورېزم» ملاتړ ودروي.

ده د امریکا متحده ایالاتو او د خلیج د همکارۍ شورا ترمنځ همکارۍ د سیمې د امنیت او ثبات د پیاوړتیا لپاره اړینې وبللې.

سعودي عربستان او امریکا په ځلونو ایران تورن کړی چې حوثي یاغیانو ته وسلې ورکوي.

امریکا کې د بایډن تازه سپارښتنه: هر څوک چې کرونا واکسین کوي ۱۰۰ ډالره ورکړئ

د امریکا ولسمشر جو بایډن

د امریکا ولسمشر جو بایډن د خپل هېواد د ایالتونو والیانو ته سپارښتنه کړې چې د کرونا واکسین ته د خلکو د هڅولو لپاره هر چا ته چې واکسین کوي، ۱۰۰ ډالره ورکړي.

ده همداراز امر کړی، هغه دولتي کارکوونکي چې واکسین نه‌کوي باید پرله‌پسې ټستونه ورڅخه واخیستل شي او ماسک دې جبري شي.

د نویو مقرراتو پر اساس، که د فدرالي حکومت مأمورین د واکسین کارت ونه‌لري، باید تل ماسک ولري او مجبوره به وي چې پرله‌پسې ټسټ وکړي.

په متحده ایالاتو کې ۳۴۳ ملیون ډوزه واکسین تزریق شوی دی.

ترکیه کې اور لګېدو لږترلږه ۳ کسان مړه کړي او له ۱۰۰ زیات ټپیان دي

د ترکیې په جنوبي ساحل کې لګېدلی اور

د ترکیې په جنوبي ساحل کې د اور لګېدو په نتیجه کې لږترلږه ۳ کسان مړه شوي او تر ۱۰۰ زیات نور ټپیان شوي دي.

د مدیترانې سمندرګي په اوږدو کې د انتالیا په ختیځ کې دا تر ټولو پراخه اور لګېدنه بلل شوې ده.

په دې ځای کې خورا زیات هوټلونه او تفرېحي ځایونه شته.

دغه اور پرون پنجشنبه بل شو چې د مړه کولو لپاره‌یې په سلګونو اور وژونکي او څرخي الوتکې لاس په کار شوې دي.

بلېنکن: د اټمي موافقې پر سر ایران سره خبرې په نامحدود ډول دوام نه‌شي کولای

د امریکا د بهرنیو چارو وزیر انتوني بلېنکن پرون/ پنجشنبه په کوېټ کې یوې خبري غونډې ته د وینا پر مهال

د امریکا د بهرنیو چارو وزیر انتوني بلېنکن وايي، د اټمي موافقې پر سر له ایران سره د خبرو بهیر په نامحدود ډول دوام نه‌شي کولای او اوس هغه وخت دی چې ایران باید پرېکړه وکړي.

ده پرون/ پنجشنبه په کوېټ کې یوې خبري غونډې ته وویل، د امریکا متحده ایالاتو اټمي موافقې ته د بېرته ګرځېدو لپاره خپل ښه نیت او لېوالتیا ښوولې او اوس «توپ د ایران په میدان» کې دی.

ښاغلی بلېنکن زیاتوي: "حقیقت دا دی چې ایران باید پرېکړه وکړي، په دې اړه اساسي پرېکړه چې ایا غواړي خپلو ژمنو ته راوګرځي که نه، هېڅ انحراف دا اساسي واقعیت نه‌شي بدلولی. توپ د ایران په میدان کې دی، وبه ګورو چې دوی موافقې ته د بېرته راګرځېدو پرېکړې ته لازم چمتووالی لري که نه، موږ خبرو اترو ته ژمن یوو، خو دا بهیر په نامحدود ډول دوام نه‌شي کولای."

ایران او امریکا په موافقه کې د نورو شاملو غړو په منځکړیتوب د اتریش په پلازمېنه ویانا کې ۶ پړاوه غیر مستقیم خبرې کړي څو ایران په اټمي موافقه کې د خپلو ژمنو عملي کولو او د امریکا د بندیزونو نرمولو ته چمتو شي.

نور راوښيه

XS
SM
MD
LG