د پاکستان د کورنیو چارو وزارت یوې نړیوالې مرستندویې ټولنې ته ویلي دي چې په قبایلي سیمو کې فعالیت بند کړي.
د بې سرحده ډاکټرانو ټولنې "MSF" پرون وویل چې د پاکستان د کورنیو چارو وزارت د دې ټولنې د فعالیت د جواز له تمدید څخه ډډه وکړه او په دې توګه نور نو نشي کولای چې د باجوړ ایجسنۍ په قبایلي سیمه کې اړو خلکو ته صحي مرستې ورسوي.
ام اس اف په یوه بیان کې ویلي چې له دې سره په باجوړ ایجسني کې د دې ټولنې څلور کلن فعالیت هم پای ته ورسېد.
دا ټولنه په باجوړ کې چې د وګړو شمېر یې له اوه نیم لکو اوړي ۱۲۰ کارکوونکي لري چې ټول پاکستانیان دي.
په پاکستان کې د ام اس اف د ټولنې مشر ازاد الیساندرو الوکو Azaad Alessandro Alocco وايي، د باجوړ په سیمو کې روغتیايي خدمات ډېر محدود دي او د دوی ډېری ناروغان حتی د ابتدايي روغتيايي خدماتو لپاره هم پیسې نه لري.
ښاغلی الوکو وايي، د ام اس اف روغتون خلکو ته وړیا او په لوړ کیفیت روغتیايي خدمات وړاندې کول او د دې ټولنې د فعالیت بندېدل به د باجوړ ایجنسۍ د خلکو پر روغتیايي وضعیت ناوړه او جدي اغېزې وکړي.
رویټرز خبري اژانس وايي چې په دې اړه یې د پاکستان د کورنیو چارو له وزارته د تبصرې غوښتنه وکړه خو دې وزارت له ځواب ورکولو ډډه وکړه.
دوه میاشتې مخکې د پاکستان حکومت دې خیریه ټولني ته چې مرکز یې په ژنیو کې دی وویل چې د قبایلو په بله ایجنسۍ- کرمه کې هم خپل ۱۴ کلن فعالیت بند کړي.
په تېره یوه لسیزه کې په ډېری قبایلي سیمو کې افراطي وسله والو ډلو د پاکستان له پوځ سره درنې جګړې کړې دي.
دې جګړو پر روغتیايي خدماتو، تعلیم او نورو برخو خورا ناوړه اغېز کړی دی.