د امریکا متحده ایالاتو ولسمشر یو ځل بیا د افغانستان د سولهییزې راتلونکې لپاره د ګډ کار ژمنه وکړه.
د نړۍ دوو مهمو قدرتونو امریکا او چین د افغانستان د سولې لپاره پر خپلو ژمنو ټینګار وکړ.
د امریکا ولسمشر ډونالد ټرمپ چې اوس په پیکنګ کې دی، نن سهار له خپل چینایي سیال سره د سوداګریزو او نورو مسایلو تر څنګ د ترورېزم ګواښ ته اشاره وکړه او هغهیې د ټولې نړۍ لپاره خطرناک وباله.
ډونالد ټرمپ له ولسمشر شي جین پینګ سره تر خبرو وروسته خبریالانو ته وویل چې د افغانستان د سولهییزې راتلونکې لپاره باید کار وشي او د ترورېزم د خطر مخه ونیول شي.
دی وايي:
"ولسمشر شي او ما دغهراز ژمنه وکړه چې د افغانستان د سولهییزې راتلونکې لپاره کار وکړو. ترورېستان د ټول بشریت لپاره یو ګواښ دی او موږ به د افراطي اسلامپاله ترورېزم مخه نیسو."
د امریکا ولسمشر چې په ۱۲ ورځني سفر اسیایي هېوادونو ته تللی دی، د چهارشنبې په ورځ چین ته ورسېد.
امریکا او چین دواړه د افغانستان د سولې په څلور اړخیزو خبرو کې مهم رول لوبوي.
افغانستان، پاکستان، چین او امریکا د افغانستان د حکومت او وسلهوالو طالبانو ترمنځ د سولې د خبرو په اړه د څلور اړخیزو غونډو لړۍ د ۲۰۱۶ میلادي کال په لومړیو کې له اسلاماباده پیل کړه، خو د همدې کال په مې میاشت کې د افغان طالبانو د مشر ملا اختر محمد منصور تر وژلو وروسته، دا لړۍ له څرګندې پایلې پرته ختمه شوه.
ملا منصور د پاکستان په بلوچستان ایالت کې د امریکا د بېپیلوټه الوتکې په برید کې ووژل شو.
د افغانستان حکومت او د سولې عالي شورا پر پاکستان تور پورې کړ چې له وعدې سره سمیې د وسلهوالو طالبانو استازي د سولې په مذاکرو کې د ګډون لپاره قانع نهکړل.
خو اسلاماباد دا تورونه رد کړل او وايي چې د افغانانو په مشرۍ د سولې لپاره د هرې هڅې ملاتړ کوي.
تر ډېر ځنډ وروسته د روان میلادي کال د اکټوبر په نیمایي کې د عمان په پلازمېنه مسقط کې د امریکا او چین پهشمول د دغې څلور اړخېزې غونډې شپږمه ناسته وشوه چې بیا یې هم څرګندې پایلې نهدرلودې.
امریکا په وار-وار په افغانستان کې د سولې او ثبات راوستلو په هدف د سیمې او مخصوصاً د ګاونډي پاکستان پر همکارۍ ټینګار کړی دی.
