د جرمني ولسمشر فرانک والټر اشټاینمایر په مسکو کې له خپل روسي سیال ولادیمیر پوتین سره د لیدو پر مهال ویلي چې دواړه هېوادونه د ترینګلو اړیکو له کبله ناخوښ دي او دواړه لوري اړتیا لري چې د دې اړیکو د ښهوالي لپاره کار وکړي.
وروسته له هغه چې په ۲۰۱۴ میلادي کال کې روسیې د اوکراین کریمیا سیمه الحاق کړه او مسکو د اوکراین په ختیځ کې د بېلتون غوښتونکو په ملاتړ تورن شو، له روسیې سره د لوېدیځو هېوادونو اړیکې خرابې شوې.
فرانک والټر اشټاینمایر د چهارشنبې په ورځ په مسکو کې له ولسمشر پوتین سره په خبرو کې وویل چې له رامنځته شوي فرصت څخه باید د دواړو هېوادونو د اړیکو د ښه کولو لپاره ګټه واخیستل شي.
دی وايي:
"زه ډاډه یم چې موږ د هغو ناخوالو سره د مبارزې اړتیا لرو چې په وروستیو کلونو کې زموږ د هېوادونو ترمنځ راپورته شوي دي او د دې کار لپاره موږ له یو بل سره د خبرو اترو هڅو ته اړتیا لرو. دواړه لوري باید د هغو شخړو د هواري هڅه وکړو چې موږ یې سره بېل کړي یو."
له ۲۰۱۰ میلادي کال راوروسته لومړی ځل دی چې د جرمني ولسمشر داسې مهال روسیې ته سفر کوي چې د مسکو او لوېدیځ ترمنځ اړیکې خرابې دي.
د چهارشنبې ورځې په لیدنه کې د روسیې ولسمشر ولادیمیر پوتین د اشټاینمایر په ځواب کې وویل:
"ښاغلی ولسمشره، تاسو زموږ د دوه اړخیزو اړیکو په پروسه کې ډېر عمیق ښکېل وئ. ډېر کلونه تاسو د حکومت جوړونې مشري کوله او وروسته د اوږدې مودې لپاره د بهرنیو چارو وزیر او د صدراعظم مرستیال وئ. تاسو په ټولو موضوعاتو پوهېږئ."
کرملېن ویلي، پوتین او اشټاینمایر پلان کړه چې د دواړو هېوادونو پر اړیکو، د پرمختګونو پر څرنګوالي او هم د نورو نړیوالو مسایلو په اړه بحث وکړي.
اشټاینمایر چې یو تشریفاتي مشر دی د تېرې ورځې په سر کې د پخواني شوروي اتحاد له مشر میخایل ګورباچف سره هم ولیدل.
د امریکا متحده ایالات، اروپایي ټولنې او نورو لوېدیځو هېوادونو له اوکراین څخه د کریمیا سیمې د الحاق او د اوکراین په ختیځ کې د بېلتون غوښتونکو د ملاتړ له کبله پر روسیې بندیزونه ولګول.
د ۲۰۱۴ میلادي کال په سپټمبر او د ۲۰۱۵ میلادي کال په فبرورۍ کې د منسک تړون د یوې برخې په توګه ډېری د اوربند معاملې ونهتوانېدلې دغه شخړې هوارې کړي.
اشټاینمایر له اوږدې مودې راهیسې له مسکو سره د اړیکو د ښه کېدو غوښتنه کوله او د هغه د سوسیال ډموکرات ګوند پر مسکو د اروپایي ټولنې د بندیزونو د تدریجي کمولو غوښتنه کړې ده.
