د سوریې ډموکراتیک ځواکونه چې کُردانیې مشري کوي او د امریکا ملاتړ ورسره دی، وايي په رقه کې د داعش د لسګونو پاتې وسلهوالو سره تر سختو جګړو وروستهیې پر دې ښار بشپړ کنټرول ترلاسه کړی دی.
رقه د اسلامي دولت په نوم د وسلهوالې ډلې یا داعش مهم مرکز ګڼل کېده.
د سوریې د ډموکراتیکو ځواکونو ویاند طلال سیلو د سې شنبې په ورځ وویل، په رقه کې پوځي عملیات پای ته رسېدلي، اوس په دې ښار کې د داعش د وسلهوالو د تښتېدلو ډلګیو د موندلو لپاره تصفیوي عملیات او له ماینونو څخه د سیمې پاکول پیلېږي.
د سوریې د ډموکراتیکو ځواکونو یو ویاند جهان احمد پرون د رقې ښار په سټډیوم کې د روېټرز خبري اژانس ته وویل:
"د فرات د قهر په نوم عملیات د رقې ښار د ازادۍ لپاره پیل شوي وو، د سوریې د ډموکراتیکو ځواکونو لهخوا چې کُردي ملېشو او زموږ تر مشرۍ لاندې نورو ځواکونو پهکې برخه لرله، په بریالیتوب پای ته ورسېدل. دا هم زموږ او هم د ټولې نړۍ لپاره تاریخي شېبې دي."
د سوریې د بشري حقونو د څار بریتانیا مېشتې ډلې هم ویلي چې د سوریې د ډموکراتیکو ځواکونو د هغو عملیاتو په ترڅ کې چې څلور میاشتې مخکې پیل شوي وو، د رقې ښار په بشپړه توګه له داعش وسلهوالو نیول شوی دی.
خو د امریکا پوځ وايي، احتمال لري چې د رقې ښار په سلو کې نوي برخه د داعش له وسلهوالو نیول شوي وي.
د امریکا په مشرۍ د ائتلاف ویاند ریان ډیلون وايي، لا هم د داعش وړې ډلې په رقه کې پاتې دي.
ریان ډیلون د ټولنیزو رسنیو له لارې په یو خپاره کړي بیان کې ویلي:
"زموږ شریکانو په سلو کې ۸۷ هغه سیمې چې مخکې د داعش د وسلهوالو په کنټرول کې وې، نیولې دي او شپږ نیم میلیونه وګړي یې ازاد کړي دي."
وروسته له هغې چې د داعش وسلهوالو او کورنیو تهیې د رقې له ښاره د وتلو اجازه ورکړل شوه، د سوریې ډموکراتیکو ځواکونو د اکټوبر په ۱۵مه نېټه ویلي وو، پر دې ښار د بشپړ کنټرول لپاره د عملیاتو وروستی پړاو یې پیل کړی دی.
د سوریې د بشري حقونو د څار ډله وايي، د رقې ښار د نیولو په څلور میاشتنیو عملیاتو کې ۳۲۵۰ کسان وژل شوي چې درېیمه برخهیې ملکي وګړي دي.
د رقې ښار چې د داعش د وسلهوالې ډلې پایتخت بلل کېده، له لاسه ورکولیې د دې ډلې لپاره دروند ګوزار ګڼل کېږي.
د داعش وسلهوالې ډلې په ۲۰۱۴ میلادي کال کې د سوریې او عراق شمالي برخې ونیولې، خو په همدې موده کې یې په دواړو هېوادونو کې ګڼې سیمې بېرته له لاسه ووتلې.