شمالي کوریا وایي، یو پرمختللی هایدروجن بم یې چې په لېرې واټن ویشتونکو توغندیو کې لېږدول کېدای شي، په بریالیتوب سره ازمویلی دی.
داسي ښکاري چې دغه اټمي ازموینه د شمالي کوریا تر ټولو قوي ازموینه وه.
د شمالي کوریا دولتي رسنۍ نن یکشنه اعلان وکړ چې پیونګ یانګ شپږمه اټمي ازموینه په بریالیتوب سره ترسره کړه او هغه د دې هېواد د اټمي وسلو د پروګرام د بشپړولو لپاره یو ارزښتناک ګام و.
تر اوسه دغه ازموینه چې هغه دې د هایدروجن بم چاودنه وي، په خپلواکه توګه نه ده تایید شوې، خو د مخکنیو اټمي ازموینو په نسبت، هغه ډېره قوي وه او قدرت یې د امریکا هغه اټم بم ته ورته و چې د دوهمې نړیوالې جګړې په پای کې یې پر جاپان وغورځاوه.
د جاپان حکومت وویل، وروسته له هغې چې زلزله پېژندونکو یې د شمالي کوریا په هغه سیمه کې چې مخکې یې اټمي ازموینې ترسره کړې وې، د یوې قوي زلزلې ټکانونه ثبت کړل، تاییدوي چې دغه منزوی هېواد اټمي ازموینه ترسره کړې ده.
پیونګ یانګ له ۲۰۰۶ میلادي کال راهیسې اټمي ازموینو ته دوام ورکړی او د ملګروملتونو پرېکړه لیکونه یې تر پښو لاندې کړي دي.
شمالي کوریا د ۲۰۱۶ کال په جنوري کې ادعا کړې وه چې هایدروجن بم یې په بریالیتوب ازمویلی دی، خو لوېدیځو ماهرانو پرې شک څرګند کړی و او هغه یې د اټمي عناصرو چاودنه بللې وه.
د پیونګ یانګ له دې ازموینې وروسته د جنوبي کوریا د ملي امنیت شورا د ولسمشر مون جي ان په مشرۍ غونډه وکړه.
د ملي امنیت د شورا مشر چونګ فو یونګ وویل، سیول به د پیونګ د لامنزوي کېدو لپاره د ملګروملتونو د نویو بندیزونو په ګډون، له ټولو امکاناتو کار واخلي.
هغه زیاته کړه، له متحدو ایالتونو سره د اتحاد په چوکاټ کې به پر دې خبرې وکړي چې د متحدو ایالتونو تر ټولو پیاوړي ستراتیژیک پوځي جزوتامونه د کوریا په ټاپووزمه کې ځای پرځای شي.
د جاپان صدراعظم شینزو ابې دغه اټمي ازموینه بیخي د نه منلو وړ وبلله او ویې ویل:
"که شمالي کوریا اټمي ازموینې ته دوام ورکړي، دا بیخې د منلو نه ده او موږ به سخت اعتراض وکړو، موږ اوس د ملي امنیت شورا پیلوو چې معلومات راټول کړو او هغه وڅېړو."
د امریکا د متحدو ایالتونو د ملي امنیت سلاکار اېچ ار مک ماستر د جاپان د ملي امنیت د شورا له مشر شوتارو تانیوچي سره په ټیليفون خبرې وکړې او یو ځل بیا یې ډاډ ورکړ چې متحده ایالات د اټمي حملې د مخنیوي په ګډون، له جاپانه دفاع ته په کلکه ژمن دی.
دا څرګندونې د جاپان حکومت په یوه بیان کې کړې دي.
د چین د بهرنیو چارو وزارت له شمالي کوریا غوښتي چې خپل غلط اعمال ودروي او د ملګروملتونو د امنیت شورا د پرېکړه لیکونو درناوی وکړي.
د فرانسې ولسمشر ایمانوئل مکرون د شمالي کوریا د وروستي لمسوونکي اقدام په وړاندې د نړیوالې ټولنې د یوه پیاوړي ځواب غوښتنه کړې ده.
د ملګروملتونو د اټمي انرژۍ د ادارې مشر ویلي چې د شمالي کوریا وروستۍ اټمي ازموینه ډېره خواشینوونکې ده او هغه کاملاً ښیي چې دا هېواد د نړیوالو پرله پسې غوښتنو هېڅ پام نه کوي.