افغان حکومت وايي، د افغانستان په جنوب، شمال او ختيځ کې وروستيو ناامنيو د بېځايه شويو کورنيو شمېر زيات کړى دى.
د کډوالو او راستنېدونکو چارو وزارت وايي، زياتې کورنۍ د روانو جګړو او تر يوه حده د طبيعي پېښو له کبله په هلمند، کندز، ننګرهار، فارياب، سرپل او ارزګان کې بېځايه شوي دي.
په دغه وزارت کې د بېځايه شوېو وضعيت ته د رسېدنې عمومي رئيس مهرخدا صبار د بېځايه شويو کورنيو د شمېر په اړه ازادي راډيو ته وويل:
"تر ٢٨ زرو ډېرې کورنۍ د روان لمريز کال له حمل مياشتې تر اوسه بېځايه شوي دي. د سروې له مخې په وروستيو کې د سرپل ولايت په صياد ولسوالۍ کې روانې ناامنۍ د ٤٧٠ نورو کورنيو د بېځايه کېدو سبب شوې."
د کډوالو او راستنېدونکو چارو وزارت تېره اوونۍ په هېواد کې د بېځايه شوېو کورنيو شمېر ٢١ زره ښوولى وو.
د سرپل ولايت له صياد ولسوالۍ څخه د وروستيو جګړو له کبله بېځايه شويو کسانو ازادي راډيو ته ويلي چې په بد وضعيت کې شپې ورځې تېروي.
په کابل کې د ملګرو ملتونو د ښځو د څانګې مشرې ريباکه ټاويرس تېره سې شنبه په کابل کې يوې غونډې ته وويل، افغانستان د نړۍ په سطحه دوېيم هېواد دى چې د جګړو له کبله ډېرې کورنۍ په کې بېځايه شوي دي.
د کډوالو او راستنېدونکو چارو وزارت وايي، له بېځايه شويو سره تر وسه- وسه لومړنۍ مرستې شوي دي.
نړيوالو ادارو ويلي په ٢٠١٦میلادي کال کې په افغانستان کې يو نيم میليون افغانان بېځايه شوي وو.