د افغانستان د اوبو او انرژۍ وزیر وايي، د اوبو د شاوخوا ۴۰ بندونو د پروژې جوړونې کارونه بشپړ شوي دي.
علي احمد عثماني چې د دوشنبې په ورځ یې د ولسي جرګې په استماعیه غونډه کې د اوبو د اهمیت په اړه څرګندونې کولې وویل، حکومت هڅه کوي چې اوبه مدیریت کړي او باید په کور دننه له دغو پلانونو ملاتړ وشي.
نوموړی وايي:
"باید د افغانستان د اوبو د منابعو د مدیریت له پروګرامه جدي ملاتړ وشي، توپير نهکوي چې څوک د اوبو او انرژۍ وزیر دی وزیر له صلاحیت او ملاتړ پرته هېڅ ډول کار نهشي کولای."
ښاغلي عثماني زیاته کړه، د نوې مطالعې له مخې افغانستان ۴۰ میلیارده متره مکعبه د ځمکې د سطحې اوبه لري او د ځمکې لاندې اوبو د معلوملو لپاره څېړنې لا نهدي بشپړې شوي.
د اوبو او انرژۍ وزیر دغه شان وویل چې په ایران کې له اوبو ناوړه ګټې اخېستنې او د چاپيرالي ستونزو له امله دغه هېواد د اوبو له کمښت سره مخ دی، خو ایران باید د اوبو له ابزاري ډپیلوماسۍ څخه کار وا نه خلي.
د ده په خبره ایران له افغانستان سره د اوبو د مشترکو حوزو اوبه کنټرول کړي او لسګونه بندونه یې پرې جوړ کړي دي.
دا په داسې حال کې ده چې شاوخوا دوه نیمې اوونۍ وړاندې د ایران ولسمشر حسن روحاني په تهران کې په یوه نړیوال کنفرانس کې ویلي و چې د کمال خان، کجکي او سلما بندونو د جوړېدو پر وړاندې بې تفاوته نهشي پاتې کېدای.
د ښاغلي روحاني دغو څرګندونو د افغان حکومت، سیاسي کړیو، شخصیتونو، مدني ټولنو او خلکو تُند غبرګونونه راوپارول.
د افغانستان د ولسي جرګې رئیس عبدالروف ابراهیمي د ښاغلي عثماني له څرګندونو وروسته وویل چې ملي ګټو ته په کتو دوی د افغان حکومت له هغو هڅو ملاتړ کوي چې غواړي د اوبو منابع مدیریت کړي.
ښاغلي ابراهیمي زیاته کړه:
"زه د ولسي جرګې په استازیتوب د هېواد د ملي ګتو څخه د دفاع لپاره د اوبو له ښه مدیریته چې د افغانستان د ملت پانګه ده د وزیر صاحب له غوښتنو ملاتړ کوم."
د حقوقي چارو افغان کارپوهان هم په دې نظر دي چې افغان حکومت د خپلو اوبو د مدیریت حق لري او په دې برخه کې یې د ایران د ولسمشر حسن روحاني وروستۍ خبرې د افغانستان په چارو کې د نوموړي ښکاره لاس وهنه ګڼلې وه.
راپور: رحمت الله افغان
