د فرانسې ولسمشر ایمانوئل مکرون او د اسرائیل صدراعظم بنیامین نتنیاهو پرون د پاریس په ایلیس ماڼۍ کې په خپله کتنه کې د منځني ختیځ پر مسایلو خبرې وکړې.
ښاغلي مکرون په دې کتنه کې د منځني ختیځ د سولې د بهیر د پیل لپاره چې له درېیو کلونو را په دې خوا ځنډيدلی دی د فلسطین او اسرائیلو د دوو دولتونو د جوړېدو له لارې- داسې چې بیت المقدس د فلسطین پلازمېنه وي، د فرانسې پر دایمي دریځ ټینګار وکړ او څرګنده یې کړه چې څو میاشتې وروسته به د اسرائیلو په بلنه هغه هېواد ته سفر وکړي.
بیت المقدس چې اسرائیل او فلسطین دواړه یې د خپلو پلازمېنو په توګه غواړي، هغه لانجمنه موضوع ده چې په اړه یې له څو لسیزو راهیسې اوږده بحثونه شوي دي.
ښاغلي مکرون همدا راز وویل چې د لبنان د شیعه ډلې حزبالله د تجهیز له پلوه د اسرائیلو په اندیښنه کې شریک دی.
مکرون زیاته کړه چې فرانسه په لبنان کې د ټولو اقلیتونو حقونو ته په پام سره ثبات غواړي.
له اسرائیلو سره د حزبالله اوږده دښمني وروسته له هغه لا زیاته شوه چې ډونالډ ټرمپ د امریکا ولسمشر شو او د حزبالله د اصلي ملاتړ کوونکې ایران پرضد یې تُندې څرګندونې وکړې.
د حزبالله مشر تېره میاشت وویل چې دا ډله کولای شي د خپلو توغندیو په وسیله د اسرائیل ټول پوځي تأسیسات په نښه کړي.
د اسرائیلو صدراعظم بنیامین نتنیاهو د هغو ګواښونو پر زیاتېدو اندیښنه وښوده چې د افراطي اسلامپالو ډلو لهخوا اسرائیلو ته ورپېښ دي.
دی وايي:
"په دې وروستیو کې د هغو تُندلارو قوتونو پیاوړتیا وینو چې نه یوازې د یهودي تمدن بلکې د اسرائیلو د دولت ویجاړول غواړي. پر دې سربېره دوی غواړي هر هغه څوک لهمنځه یوسي چې د دوی په وړاندې درېږي که یهودان وي، که عیسويان یا مسلمانان ټول د دوی له وحشته زیانمن شوي دي. "
د نتنیاهو سفر د دوهمې نړیوالې جګړې پرمهال په فرانسه کې په ډلهییز ډول د یهودانو د نیولو له کلیزې سره برابر و.
په ۱۹۴۲ کال کې شاوخوا ۱۳ زره یهودان د نازي جرمني له لارښوونې سره سم په فرانسه کې ونیول شول او د پاریس د بایسکل ځغلولو یوه لوبغالي ته له لېږدېدو وروسته د اشویتز په نوم په پولنډ کې د ډلهییزې وژنې کمپ ته واستول شول.
