په ملګرو ملتونو کې د امريکا متحدو ايالتونو سفيرې پر امنيت شورا انتقاد وکړ، چې د ايران په وړاندې په اقداماتو کې پاتې راغلې ده.
په ملګرو ملتونو کې د امريکا سفيرې نيکي هيلي هم پر ايران او هم پر امنيت شورا انتقاد وکړ.
هغې وويل، ايران د ملګرو ملتونو د امنيت شورا له بنديزونو او پرېکړه ليکونو سرغړونه کړې، خو امنيت شورا يې په وړاندې په اقداماتو کې پاتې راغلې ده.
نيکي هيلي د امنيت شورا په پرونۍ غونډه کې په دې باب څرګندونې وکړې:
"امنيت شورا د ايران د دغو سرغړونو په ځواب کې حتى په کوچنيو اقداماتو کې هم پاتې راغلې ده."
نيکي هيلي زياته کړه، ايران ته بايد وويل شي چې موږ د ملګرو ملتونو له پرېکړه ليکونو د دوى ناوړه سرغړونې نه شو زغملاى:
"موږ بايد د امنيت شورا په حيث د ٢٢٣١ شمېره مقررو تر شا ودرېږو، دغه مقررې په سختۍ عملي کړو او ايران ته وښيو چې د ملګرو ملتونو له امنيت شورا د دوى ناوړه تخطي نه شو زغملاى، دا اقدامات يو دليل لري، دغه شورا بايد دا اقدامات عملي کړي."
يونيم کال مخکې د يوه تړون له مخې له ايرانه د ملګرو ملتونو زيات بنديزونه ليرې کړاى شول.
د هغه تړون پر اساس چې د تهران او د نړۍ د شپږو ځواکمنو هېوادونو ترمنځ ورباندې سلا وشوه، ايران خپل اټمي پروګرام محدود کړ.
د امنيت شورا په پرونۍ غونډه کې د ملګرو ملتونو د سياسي چارو مشر جېفري فيلټمن امنيت شورا ته د ملګرو ملتونو د سرمنشي د يوه راپور پر اساس معلومات وړاندې کړل.
د سرمنشي دغه راپور د ايران په وړاندې د پاتې بنديزونو د عملي کېدو په باب و.
بلخوا په ملګرو ملتونو کې د بريتانيا د سفير مرستيال پيټر وېلسن د نيکي هيلي څرګندونې تائيد کړې او ويې ويل، له هغو بنديزونو چې د ميزاييلو د ازموينې او د وسلو د لېږد له کبله تهران لګول شوي، د ايران د سرغړونو چاره په کار ده.
په ملګرو ملتونو کې د امريکا سفيرې نيکي هيلي ايران تورن کړ چې د منځني ختيځ په بې ثباتۍ کې ورانوونکى نقش لري.
په دې غونډه کې د ايران په وړاندې د امنيت شورا کوم غړي هېواد د کوم اقدام پېشنهاد ونه کړ، خو ډيپلوماتان وايي روسيه او چين چې په امنيت شورا کې د رايو د رد يا ويټو حق لري، ښايي له نورو اقداماتو سره موافقه ونه کړي.
د امريکا د ولسمشر ډونالد ټرمپ اداره چې له تهران سره پر اټمي موضوع شوې موافقه ارزوي، مخکې يې دغه موافقه ”غميزه“ بللې وه.
خو په ملګرو ملتونو کې د امريکا سفيرې وويل، تر هغو چې د اټمي موافقې بياکتنه بشپړه شوې نه وي، موږ به پر خپلو تعهداتو ولاړ پاتې شو او تمه لرو چې ايران هم ورته کار وکړي.
