نامعلومو وسلهوالو یو ځل بیا د خېبر پښتونخوا په کوهاټ او د سند ایالت په مرکز کراچۍ کې پر پولیسو بریدونه کړي چې په نتیجه کې یې ۶ پولیس وژل شوي دي.
لومړۍ پېښه د یکشنبې په شپه ناوخته د خېبر پښتونخوا لیرې پرتې سیمې کوهاټ په لاچۍ کې شوې چې د پولیس چارواکو په وینا نامعلومو وسلهوالو د پولیسو پر یوه کاروان برید کړی چې په ترڅ کې یې د لاچۍ د پولیسو یو ځايي مشر یا «SHO» په ګډون لږ تر لږه ۴ پولیس وژل شوي.
د لاچۍ د پولیسو یوه جګپوړي چارواکي ډي اېس پي رضا خان رسنیو ته ویلي چې د پولیسو دغه کاروان په کمالخېل سیمه کې تر عملیاتو وروسته پرانډس لویې لارې راروان و چې په کمین کې ناستو نامعلومو وسلهوالو پرې ناتاره ډزې وکړې او زیاتوي چې د پولیسو په ځوابي ډزو کې وسلهوال د پېښې له ځایه وتښتېدل.
لاچي د خېبر پښتونخوا له مرکز پېښور نه نېږدې ۵۶ کېلو متره شمال ته پرته د کوهاټ ضلعې هغه سیمه ده چې د کوهاټ غرونهیې له نیمه قبایلي سیمې درې ادمخېل سره نښلوي چېرته چې تر پوځي عملیاتو مخکې وسلهوال طالبان فعال وو.
د رضا خان په خبره چې په لاچي کې یې پر پولیسو تر برید وروسته په سیمه کې تلاشي عملیات هم کړي، خو تر دې دمهیې د پېښې په تړاو د چا د نیولو خبر نهدی ورکړی.
بلخوا نامعلومو وسلهوالو تېره شپه د سند ایالت په مرکز کراچۍ کې هم د پولیسو پر یوه موټر برید کړی او لږ تر لږه ۲ پولیسیې وژلي او ۱یې ټپي کړی دی.
د کراچۍ د پولیسو د یوه مشر مشتاق مهر په وینا، نامعلومو وسلهوالو هغه د کراچۍ ښار د دهوراجي په بهادر سیمه کې د پولیسو موټر برید وکړ چې پولیس په سیمه کې د ګزمې په حال کې وو.
ښاغلي مهر په دې اړه د پېښې په ځای کې له رسنیو سره په خبرو کې وویل:
"په لومړنیو تحقیقاتو کې دا معلومه شوې چې دغه برید څلور کسانو کړی چې په دوو موټر سایکلونو ناست وو او د پولیسو پر موبایل تر ډزو وروسته د پېښې له ځایه تښتېدلي دي. "
پولیس چارواکو دغه پېښه په کراچۍ کې د وسلهوالو لهخوا د روانو هدفي وژنو لړۍ بللې او وايي چې د پېښې تحقیقاتیې پیل او د بریدګرو د نیولو هڅې یې روانې کړې دي.
د سند صوبې اعلی وزیر مراد عليشاه او والي په کراچۍ کې پر پولیسو برید غندلی او اړوندو ادارو تهیې د بېړنیو تحقیقاتو امر ورکړی دی.
د یادونې وړ ده چې تر دې دمه لا په کوهاټ او کراچۍ کې پر پولیسو د برید مسؤلیت کومې وسلهوالې ډلې پر غاړه نهدی اخیستی.
راپور: ذبیح مومند