د افغانستان لویه څارنوالي وايي، ۳۸ څارنوالان چې تېرکال په فساد کې د لاس لرلو په تور نیول شوي وو، محاکمه شول.
لوی څارنوال فرید حمیدی د سې شنبې په ورځ په کابل کې په یوه خبري ناسته کې وویل، لویې څارنوالۍ د فساد په وړاندې مبارزه له همدغې ادارې پیل کړې او هر څوک چې د اداري فساد هڅه وکړي، و به نه بخښل شي.
د ده په خبره د فساد ټولې قضیې به په دقت سره وڅېړل شي.
ښاغلي حمیدي وویل:
"موږ په تېر یوه کال کې ۳۸ څارنوالان او خپل یو شمېر همکاران باالفعل په فساد کي نیولي دي، قضیو تهیې رسیدنه شوې او محکمې یې په اړه تصمیم نیولی دی، ښايي دغه مسئله د ځینو نه وي خوښه او داسې فکر کوي چې خلک به وايي چې په دې اداره کې فساد موجود دی، خو موږ رښتینې او زړهوره مبارزه لومړی له خپله ځانه پیلوو."
د افغانستان د لوی څارنوال په خبره، پر دغو قضیو سربېره، په وروستي یوه کال کې په دې اداره کې د اداري فساد ۹۰۸ قضیې ثبت شوي چې ۴۰۵ وروستۍ شوي دي.
د لویې څارنوالۍ د مسؤلینو د معلوماتو له مخې، د درنو جرمونو قضیو ته د رسېدنې عدلي او قضايي مرکز چې شااوخوا اووه میاشتې مخکې فعال شو، تر اوسهیې په دغه مرکز کې د فساد ۱۳ قضیې له محاکماتي پړاونو ايستلې دي.
د افغانستان لوی څارنوال ویلي چې د دغو قضیو د اجراتو له امله باید دوه مېلیارده افغانۍ د دولت بودجې ته ورشي.
د اداري فساد پر وړاندې د مبارزې په عدلي او قضاي مرکز کې تر اوسه د کورنیو چارو وزارت د یوه جنرال په ګډون ځینې دولتي چارواکي محاکمه شوي دي.
د افغانستان د شفافیت د څار بنسټ که څه هم د فساد پر وړاندې د لویې څارنوالۍ مبارزه ستايي، خو وايي چې د اداري فساد د دوسیو د کره څېړنو لپاره باید ډېر کار وشي.
د دغه بنسټ رئیس اکرام افضلي په دې اړه ازادي راډیو ته وویل:
"په دې کې شک نشته چې لویې څارنوالۍ پهدې وروستیو کې د فساد پر ضد جدیت ښودلی او یو څه قضیېیې تعقیب کړي دي، خو په دې برخه کې زیات جدیت ته اړتیا شته او د فساد نورو دوسیو ته هم باید رسېدنه وشي."
ښاغلی افضلي وايي، په لویه څارنوالۍ کې دننه هغه کسان چې فساد ته زمینې برابروي، باید په ګوته او ونیول شي.
د ده په خبره، د فساد د دوسیو د ښه څېړلو لپاره په کار ده چې مدني بنسټونه هم د دغو دوسیو څېړل وڅاري.
راپور: خان محمد سیند
