د لاسرسي لېنکونه

یکشنبه ۳۰ تله ۱۳۹۶ کابل ۱۰:۴۷

پاکستان ۶۵ کاله وروسته د کرکټ ټسټ لوبو کې وېسټ انډیز ته ماتې ورکړه


د پاکستان او وېسټ انډیز د کرکټ ملي لوبډلو تر منځ د درېيو ټسټ لوبو وروستۍ لوبه د یکشنبې په ورځ ناوخته د وېسټ انډیز په ډومینیکا ښار کې پای ته ورسېده.

د پاکستان د کرکټ لوبډلې دغه پنځه ورځنۍ لوبه تر یوې په زړه پورې لوبې وروسته وېسټ انډیز ته په ۱۰۱ منډو ماتې ورکړه او هم‌یې د درېيو ټسټ لوبو لړۍ په‎خپل نوم کړه.

پاکستان په دغې لوبه کې وېسټ انډیز ته د ګټلو لپاره د ۳۰۴ منډو هدف ورکړی و، خو د وېسټ انډیز ټولو لوبغاړو یوازې ۲۰۲ منډې جوړې کړې.

دا تر ۶۵ کلونو وروسته لومړی ځل دی چې پاکستان د کرکټ ټسټ لوبو کې وېسټ انډیز ته پر خپله خاوره ماتې ورکړې ده.

که څه هم پاکستانۍ لوبډلې د دغه ټسټ لوبې په دوهم اننګز کې یوازې د ۱۷۴ منډو تر جوړولو وروسته وېسټ انډیز ته د لوبې بلنه ورکړه، خو د دغې لوبډلې یوه لوبغاړي هم د پاکستانیو توپ اچوونکو ښه مقابله ونه‌کړای شوه.

د وېسټ انډیز له‎خوا یوازې روسټین چیز د ۱۰۱ منډو په جوړولو هڅه وکړه چې دغه لوبه بې‌نتیجې پای ته ورسوي، خو بریالی نه‌شو.

له روسټین چیز پرته د وېسټ انډیز دوو نورو لوبغاړو هیټمیر او هولډر د پاکستان د توپ اچونې لږ مقاومت وکړ او هر یوه په ترتیب ۲۵ او ۲۲ منډې جوړې کړې، خو له دوی دواړو پرته د وېسټ انډیز نورو لوبغاړو چندان مسؤلانه لوبه ونه‌کړه.

د پاکستان له‎خوا په دوهم اننګز کې یاسر شاه ۵، حسن علي او محمد عامر او محمد عباس د وېسټ انډیز ۱-۱ لوبغاړي وسوځول.

د پاکستان له‌خوا یاسر شاه د سیریز غوره لوبغاړی ونومول شو.

هغه په دغې لوبه کې په مجموعي ډول ۲۵ کسان سوځولي وو.

د پاکستان د کرکټ ملي لوبډلې د وېسټ انډیز پر خاوره ۲۶ ټسټ لوبې لوبولي چې په دغو کې پاکستان یوازې ۷ لوبې ګټلي، ۱۲ کې یې ماتې خوړلې او ۷ له کومې نتیجې پرته پای ته رسېدلي دي.

د یادونې وړ ده چې په وېسټ انډیز کې د پاکستان د کرکټ ټیم دوو مهمو لوبغاړو کپتان مصباح‌الحق او یونس خان خپلې وروستۍ لوبې ولوبولې.

دغو دواړو لوبغاړو وېسټ انډیز ته تر تلو مخکې له نړیوال کرکټه د تقاعد اعلان کړی و او دا یې خپلې وروستۍ لوبې بللې وې.

راپور: ذبیح مومند

XS
SM
MD
LG