د ترکمنستان پلاوي په کابل کې له ولسمشر اشرف غني سره وکتل او د افغانستان د امنیتي وضعیت په اړهیې اندېښنه څرګنده کړه.
د ترکمنستان د صدراعظم مرستیال او د بهرنیو چارو وزیر رشید مرادوف په کابل کې له ولسمشر اشرف غني سره د کتلو پر مهال وویل چې د افغانستان امنیت د عشقاباد هیله ده.
رشید مرادوف زیاته کړه چې کله د افغانستان د امنیت په باره کې ناسمې خبرې اوري ترکمنستان اندېښمن کېږي.
د افغانستان د ولسمشر مرستیال ویاند دوا خان مینهپال ازادي راډیو ته وویل چې جمهور رئیس د امنیت برخه کې د ترکمنستان پلاوي ته ډاډ ورکړ.
نوموړي وویل:
"د هېواد ولسمشر دغه پلاوي ته وویل چې د افغانستان حکومت له ناټو او نړیوالې ټولنې سره په همغږۍ څلور کلن امنیتي پلان جوړ کړی دی چې راتلونکو څلورو کلونو کې به د مشخصو اهدافو لپاره کار کوي. په څلورو کلونو کې به زموږ د ځانګړو ځواکونو شمېر دوه برابره کېږي او زموږ د هوایي ځواکونو عملیاتي ظرفیت به لوړ شي او د هېواد اکثره ناامنه سیمې به د حکومت تر واک لاندې راځي."
په ارګ کې د چهارشنبې ورځې غونډه کې د افغانستان ولسمشر ټاپي پروژه یاده کړه او د اقینې د بندر د پرانیستو مسئلې تهیې اشاره وکړه.
مینهپال وایي:
"ولسمشر د ټاپي د کارونو د پرمختګ په اړه، د اقینې بندر د پرانیستلو، تر تورغونډۍ بندر پورې د رېل د کرښې د رارسېدلو په خاطر له هغوی څخه مننه وکړه او دا یې په سیمه کې د دواړو هېوادو تر منځ د پراخو همکاریو څرګند دلایل وبلل."
د ترکمنستان د صدراعظم مرستیال او د بهرنیو چارو وزیر هم د ټاپي پر اهمیت خبرې وکړې او ویېویل چې د دې پروژې له پلي کېدو سره به په سیمه کې اقتصادي همکارۍ پراخې شي او امنیت به هم ورسره ټینګ شي.
ټاپي پروژه د ۲۰۱۵ کال د ډسمبر په ۱۳مه په ترکمنستان کې د افغانستان او ترکمنستان ولسمشرانو رسماً پرانیسته.
پر دې پایپ لاین کار روان دی او کله چې ۱۴۷ کېلو متره په ترکمنستان کې بشپړ شي د افغانستان خاورې ته به داخل شي او د هرات، فراه، هلمند او کندهار د ولایتونو له لارې به پاکستان ته او بیا هند ته ګاز انتقال کړي.
په افغانستان کې د دې پروژې د سروې، ډیزاین او د انجنیري کارونه د (ای- اېل- اېف) په نوم یوه جرمني شرکت ته سپارل شوي دي.