د لاسرسي لېنکونه

شنبه ۲۷ لړم ۱۳۹۶ کابل ۱۰:۰۳

پسرلی: افغانستان کې پاکستاني سوداګر هوسا خو افغان سوداګر هلته ځورېږي


په داسې حال کې چې افغان حکومت د پاکستاني پانګه‎والو او سوداګرو لپاره په افغانستان کې زیاتې اسانتیاوې رامنځته کړي خو پاکستان د تل په څېر افغان پانګه‎والو او سوداګرو ته په دغه هېواد کې ستونزې پیدا کړې دي.

د افغانستان د سوداګرۍ او صنایعو خونې ویاند صیام‌الدین پسرلي د دې مطلب په څرګندولو سره د يکشنبې په ورځ ازادي راډیو ته وویل چې اوس هم افغان سوداګر په پاکستان کې د پیسو اخیستلو او ځورولو په ګډون له ګڼو ستونزو سره مخ دي.

د افغانستان د سوداګرۍ او صنایعو خونې ویاند صیام الدین پسرلی
د افغانستان د سوداګرۍ او صنایعو خونې ویاند صیام الدین پسرلی

نوموړی وايي:

"افغانستان د پاکستاني پانګه‎والو او شرکتونو لپاره ډېرې اسانتیاوې په نظر کې نیولي او دوی له هېڅ ډول ستونزو سره مخ نه‎دي خو مقابل کې پاکستان د دې تر څنګ چې د افغان پانګه‎والو لپاره اسانتیاوې په نظر کې نه‎دي نیولي، بلکې له دوی سره ډېر ناوړه چلند کېږي، ستونزې ورته جوړېږي او پیسې ورڅخه په زوره اخیستل کېږي."

ښاغلی پسرلی ټینګار کوي چې یاده موضوع افغان سوداګرو ته د زغم وړ نه‎ده او افغان حکومت باید دې برخه کې د پاکستان په وړاندې خپل دريځ روښانه کړي.

د افغانستان د سوداګرۍ او صنایعو خونې د معلوماتو له مخې افغانستان په کلني ډول پاکستان ته د ۶۰۰ میلیونه ډالرو په ارزښت صادرات او له پاکستانه د ۹۰۰ میلیونه ډالرو په شااوخوا کې واردات لري.

پاکستان شااوخوا دوه میاشتې وړاندې په سند ایالت کې له خونړۍ چاودنې وروسته له افغانستان سره د تورخم او سپین‎بولدک په شمول د تګ راتګ ټولې لارې د دې هېواد د چارواکو په وینا د امنیتي اندېښنو له کبله د يوې میاشتې څخه ډېره موده وتړلې چې د دواړو خواوو سوداګرو ته‌يې ډېر زیانونه واړول.

دا په داسې حال کې ده چې په وروستیو کې افغان حکومت د ترانسپورټ او ترانزیټ برخه کې د ستونزو د هواري په هدف اروپایي هېوادونو او چین ته د رسېدو لپاره د اقینې بندر، د لاجورد لار او د حیرتانو بندر د ورېښمو لار د اوسپنې پټلۍ پرانیستلې.

په ورته وخت کې د افغانستان د سوداګرۍ او صنایعو وزارت د پاکستان په‌شمول له ټولو هېوادونو د ښو سوداګریزو اړیکو خبره کوي او له پاکستانه غواړي چې دې برخه کې د نړیوالو اصولو سره سم چلند وکړي.

د دغه وزارت ویاند مسافر قوقندي د یکشنبې په ورځ ازادي راډیو ته وویل چې نېږدې راتلونکي کې به له پاکستاني لوري سره په دې اړه ناسته ولري او یادې ستونزې به په جدي توګه مطرح کړي.

د افغانستان د سوداګرۍ او صنایعو وزارت ویاند مسافر قوقندي
د افغانستان د سوداګرۍ او صنایعو وزارت ویاند مسافر قوقندي

نوموړی وايي:

"زیاتره ستونزې هوارې شوي او نېږدې راتلونکي کې به د اپټیکا راتلونکې ناسته ترسره شي او هغه ستونزې چې دې برخه کې موجودې دي د افغانستان له لوري په جدي توګه يو په يو مطرح کېږي او زموږ لیدلوری په دې اړه دا دی چې د سیمې د هېوادونو سره چې کوم سیاست موږ لرو دوی هم زموږ د سوداګرۍ برخه کې همدا شان سیاست ولري."

د اقتصادي چارو کارپوه سید قیاس سعیدي وايي، حکومتونه باید سوداګریزې اړیکې په سیاست پورې ونه‎تړي او سوداګري له سیاسته لیرې وساتي.

ښاغلی سعیدي وايي، که پاکستان افغان سوداګرو ته په پاکستان کې ستونزې جوړوي نو افغان حکومت باید په دې برخه کې چوپ پاتې نه‎شي او خپل غږ نړیوالو ته ورسوي.

راپور: واصل وصال

XS
SM
MD
LG