په داسې حال کې چې په دې وروستیو کې د کابل او اسلاماباد تر منځ اړیکې ترینګلې شوې دي خو افغان خکومتیې د ښه کېدلو هیله لري.
د افغانستان اجرائیه ریاست وايي چې یاد وضعیت د دغو دواړو هېوادونو په ګټه نهدی.
د اجرائیه رئیس ویاند مجیبالرحمن رحیمي د پنجشنبې په ورځ کابل کې یوې خبري غونډې ته وویل چې د پولو تړل، په کډوالو د فشارونو زیاتول او له ترورېزمه د بهرني سیاست په توګه استفاده د هېڅ هېواد په ګټه نهده.
ښاغلي رحیمي زیاته کړه:
"موږ له پاکستانه تل غوښتي چې له ترورېزمه ملاتړ ته پای ورکړي، ولې له بده مرغه زموږ دې غوښتنو کله هم مثبت ځواب نهدی تر لاسه کړی، اوس زموږ اړیکې په ښه وضعیت کې نهدي خو دا د پاکستان حکومت پر مثبتو اقداماتو پورې اړه لري څو وکولای شو ستونزې حل کړو."
ښاغلی رحیمي وايي، افغان حکومت کله هم د ستونزو غوښتونکی نهدی خو په ورته وخت کې یې ټينګار په دې دی چې په ګډو همکاریو سره باید د دواړو هېوادونو امنیتي ستونزو ته حللارې پیدا او عملي اقدامات وشي.
کابل ډېر وخت افغانستان کې د کېدونکو امنیتي پېښو په تړاو پاکستان تورن کړی، ویلي یې دي چې د افغان حکومت وسلهوالې مخالفه ډلې په هغه هېواد کې مرکزونه لري.
له دې وړاندې د پاکستان لهخوا هم پر افغانستان ورته تورونه لګېدلي او دا هغه څه دي چې له املهیې له نېږدې شلو ورځو راهیسې د دواړو هېوادونو تر منځ د تګ راتګ ټولې ځمکنۍ لارې تړل شوې دي.
یوازې د سې شنبې او چهارشنبې په ورځ د هغو افغان او پاکستاني مساپرو پر مخ لارې خلاصې شوې کوم چې په پاسپورټونو یو د بل هېواد ته تللي او هلته بند پاتې وو.
په ورته وخت کې د چهارشنبې په ورځ یوې حکومتي سرچېنې د نوم نهیادولو په شرط ازادي راډيو ته وویل چې د پاکستان د سرحدي سرغړونو او نورو کړنو په اړه افغان حکومت د ملګرو ملتونو امنیت شورا ته هم خپل شکایت لیک لېږلی دی.
خو پوښتنه دا ده چې د ترینګلو دغو اړیکو د بیا عادي کېدو لپاره کابل له اسلاماباده د کومو مثبتو اقداماتو غوښتونکی دی.
د چارو څېړونکی عبدالرؤف جرأت وايي، پاکستان ته ښايي چې د څلور اړخیزه غونډو په پرېکړو اقدام وکړي او د ښه او بد ترورېست توپیر لهمنځه یوسي.
ښاغلي جرأت زیاته کړه:
"د دواړو هېوادونو د ګاونډيتوب اصل له مخې هم لازمه ده چې دا دوه هېوادونه یو بل ته د همکارۍ لاس ورکړي خو د پاکستان صداقت باندې ټول افغانان شک لري، دوی عملاً د افغانستان له دښمنانو سره مرسته کوي نو ځکه د ملامتۍ لویه ګوته هم پاکستان ته نیول کېږي بل دا چې هغه هېواد د څلور اړخیزه غونډو په هېڅ ژمنو عمل نهدی کړی او دې کارونو وضعیت خراب کړ."
ښاغلی جرأت وايي، وروسته له دې چې اسلاماباد د افغان سولې په اړه د افغانستان، پاکستان، چین او امریکا د څلور اړخېزې غونډې پرېکړې عملي نهکړې د ملي وحدت حکومت باور په هغه هېواد خورا کم شو.
له دې سره د ملي وحدت حکومت مشرانو د تېرو دوو کلونو راهیسې پاکستان ته د بیا- بیا بلنو سره-سره تګ ته زړه نهدی ښه کړی او ټينګار یې په دې دی چې هغه هېواد باید د افغانستان پر وړاندې له دوه ګوني سیاسته لاس واخلي.
راپور: یوسف خان ځدراڼ