د کونړ د سرکاڼو ولسوالۍ اوسېدونکي وايي، نن سهار پاکستانۍ هليکوپټرې له ډیورند کرښې را اوښتې دي او د سرکاڼو ولسوالۍ پر اړوندو سیمو يې بمبار کړی دی.
دوی وايي، د دوشنبې ورځې په سهار څه باندې اووه بجې د پاکستانیو هوايي ځواکونو درېیو هلېکوپټرو د یادې ولسوالۍ پر ګلابپړۍ او ننګه سر سیمو بمبار کړی دی.
د سرکاڼو اوسېدونکي حاجي زرګل ازادي راډیو ته وویل:
"سهار پاکستانۍ هليکوپټرې را اوښتې دي، د بهار اباد پورې يې پروازونه کول او بمبار يې د ګلابپړۍ او ننګه سر یې کاوه."
هغه وايي، د تېرې شپې نه یو ځل بیا پاکستانیو ځواکونو د توپونو خولې د دوی سیمې ته مخامخ کړي او تر اوسهيې لسګونه ګولۍ راوېشتلي.
نوموړي زیاته کړه:
"د شپې نه بریدونه شروع شوي دي، هغوی په ډېسي او د غټو توپونو یو سل او دوه دېرش ګولۍ راویشتي دي د شونکړۍ، ګلابپړۍ او ننګه سر باندې لګېدلي دي."
زرګل وايي، د تازه بریدونو شل ورځې پوره شوي چې پهکې یو شمېر عام وګړي وژل شوي او په زیات شمېر کې کورنۍ د خپلو کورونو پرېښودو ته اړې شوې دي.
د دغو خلکو په وینا د پاکستان د تېرو ورځو راکټي بریدونو له امله د یادې سیمې اوسېدونکي کډه شوي و او د نن ورځې د راکټي بریدونو او بمباریو په پایله کې چا ته ځاني زیان نهدی رسېدلی.
کونړ امنيه قوماندان پاسوال جمعهګل همت ازادي راډیو ته وویل چې پاکستانیو هلیکوپټرو د ډیورند پر کرښه پروازونه او بمبار کړی خو دوی ته دا نهده جوته چې دغه بمبار د پولې کومې خوا ته شوی، دوی وايي، په دې اړه پلټنې کوي.
نوموړي زیاته کړه:
"هغو طیارو چې د ډیورند پر فرضي کرښه پروازونه کړي، د ملي اردو او سرحدي ځواکونهيې څېړنه کوي چې دغه بریدونه د افغانستان په خاوره کې شوي دي او که بلې غاړې ته شوي، کېدای شي د محل د خلکو خبرې هم یو څه رښتیا وي."
هغه وايي، هر څوک چې د افغانستان پر خاوره برید کوي دوی يې ځواب ورکولو ته چمتووالی لري:
"زموږ ټول ځواکونه ځواب ورکولو ته چمتو دي، ولسمشر موږ ته امر کړی چې په کلکه د خپلې خاورې او خلکو دفاع وکړو."
خلک وايي، په یوه اوونۍ کې دا دوهم ځل دی چې پاکستانۍ هليکوپټرې له پولې راوړي او د سرکاڼو د ولسوالۍ په هوا کې پروازونه کوي، خو تر اوسه دولتي چارواکو د دغو سرغړونو تائید نهدی کړی.
راپور: روحالله انوري
