د عبدالحکيم مجاهد لهخوا د طالبانو مقدس ګڼل او دوی ته د فرشتو خطاب کول د سولې عالي شورا له تُندو غبرګونونو سره مخ کړې او د افغانستان مشرانو جرګې يو شمېر غړي دغه شورا پنځم ستون ګڼي.
د مشرانو جرګې یو شمېر غړي وايي، د سولې عالي شورا کې ځینې څېرې د نظام خائنین دي او پرته د طالبانو له ملاتړه هېڅ لاسته راوړنه نهلري.
د مشرانو جرګې رئیس فضلالهادي مسلمیار د دغه جرګې د يکشنبې ورځې په عمومي ناسته کې د عبدالحکیم مجاهد څرګندونو ته په اشارې سره د هغو کسانو په مجازات کولو ټنیګار وکړ چې د افغانانو د قاتلینو اعمال توجیه کوي.
نوموړی وايي:
"خواشینی یم چې د افغانستان د نظام د دسترخوانه د يو چا له ادرسه یو ځل بیا یو غږ پورته شو او هغوی چې هره ورځ زموږ ملت وژني دوی ورته د فرشتو لقب ورکوي، له دوی نه باید پوښتنه وشي او څېړنې ترې وشي او د څېړنو په نتیجه کې باید خپله سزا وویني."
دا په داسې حال کې ده چې د سولې عالي شورا يو لیرې شوي غړي عبدالحکیم مجاهد درې ورځې وړاندې د ستراتيژیکو مطالعالاتو لهخوا په يوې جوړې شوې ناسته کې طالبان مقدس او د سولې فرشتې وبللې.
خو وروسته له ډېرو نیوکو نوموړي وویل چې د سولې د عالي شورا د پخواني رئیس برهانالدین رباني خبرې یې بیان کړي دي.
ولسمشرۍ ماڼۍ د ښاغلي عبدالحکیم مجاهد د دغو څرګندونو په غبرګون کې رسنیو ته په يوه رالېږلي اعلامیه کې په دې اړه د جدي پلټنو او پرېکړو خبره کړې ده.
په ورته وخت کې د اجرائیه ریاست مرستیال ویاند امید میثم ازادي راډیو ته تائید کړه چې ښاغلی مجاهد له خپلې دندې لیرې شوی دی.
د مشرانو جرګې غړې ګلالی اکبري د سولې عالي شورا پنځم ستون ګڼي او د دغې شورا په تعلیق ټینګار کوي.
ښاغلي اکبري زیاته کړه:
"پنځم ستون د سولې عالي شورا کې څه لاسته راوړنه او پایله لري، له دغې شورا څخه داسې کسان سر راپورته کوي چې طالبانو ته د سولې فرښتې وايي."
له دې وړاندې د سولې عالي شورا يوه بل غړي شهزاده شاهد د القاعده ډلې پخواني مشر اسامه بن لادن ته د شهید خطاب کړی و.
خو له دې ټولو سره-سره د مشرانو جرګې يوه بله غړې نبیله مصطفیزاده په کابل، کندهار او هلمند کې وروستیو خونړیو بریدونو ته په اشارې سره وايي، له هغو ډلو سره چې ماشومان، مېرمنې او ځوانان وژني د سولې خبرې هېڅ ګټه نهلري.
اغلې مصطفیزاده ټینګار کوي چې د سولې عالي شورا دروازه باید وتړل شي او د دغې شورا په پرېمانه پیسو دې افغان ځواکونه تجهیز شي.
خو د سولې عالي شورا ویاند امینالدین مظفري ازادي راډیو ته وویل، د دغې شورا مسؤلیت دا نهدی چې طالبان ضرور سولې ته راوبولي.
ښاغلي مظفري زیاته کړه:
"د سولې د عالي شورا مسؤلیت دا نهدی چې طالبان دې ضرور سولې ته راکاږي، بلکې مخالفینو ته د سولې لپاره د زمینې مساعدول دي، دا چې هغوی سوله نهکوي له هغوی نه باید وپوښتل شي چې ولې؟ موږ لاسته راوړنې لرو خو دې برخه کې چې موږ کومې هیلې لرو هغه لا نهدي پوره شوي."
د مشرانو جرګې يو بل غړی شیر محمد اخندزاده د عبدالحکیم مجاهد څرګندونو ته په اشارې وايي چې داسې شواهد لري چې د سولې عالي شورا د دغې شورا ځينو غړو ته وسلې ورکړي.
د دې په خبره د دوی د يو شمېر زامن د طالبانو د ډلې مشران وو او دوی په خپله د سولې له عالي شورا څخه پرېمانه پیسې ترلاسه کوي.
راپور: واصل وصال