افغان حکومت په ۲۰۱۷ میلادي کال کې د یوه پروګرام د پلي کولو له لارې په دولتي ارګانونو کې څه باندې ۱۰ زرو کسانو ته د کار زمینه برابروي.
د افغانستان د کار او ټولینزو چارو وزارت اعلان کړی چې دغه پروګرام د افغان ولسمشر په امر د چارو د ادارې لهخوا عملي کېږي خو تر دې دمه یې د پلي کولو کار وروستي شوي نه دي.
د دغه وزارت ویاند عبدالفتاح اشرف احمدزي د یکشنبې په ورځ ازادي راډیو ته وویل چې په دغه پروګرام کې هغو کسانو ته د کار زمینه برابرېږي چې له بېکاري زورېږي.
نوموړی وايي:
"په دغې پروسه کې د یو لکو شاوخوا کې د کسانو غوښتنلیکونه را ټولېږي او له دغې ډلې بیا ۱۰ زره کسان له ازموینې وروسته غوره کېږي او په هرو برخو کې چې کاري تجربه او لوړ تحصیلات لري په همغو اړوندو ادارو کې به وګمارل شي."
د افغانستان د کار او ټولنیزو چارو وزارت ویاند وايي چې له دغه پروګرام څخه هېڅ یو ولایت محروم نه پاتې کېږي.
په افغانستان کې له ناامنۍڅخه وروسته د خلکو جدي ستونزه بې روزګاري ده.
دغه ستونزه د دې لامل شوې چې په وروستیو کلونو کې یو شمېر ځوانان او ان کورنۍ خپل هېواد پریږدي.
د کار او ټولنیزو چارو وزارت د شمېرو له مخې اوس مهال په هېواد کې ۱،۹ میلیونه کسان مطلق وزګار دي او په وقفهیې ډول د وزګارو خلکو شمېر۱.۴ میلیونو کسانو ته رسېږي.
د دغه وزارت چارواکي وايي چې د ۱۰ زرو کسانو لپاره د کار زمینې برابرول د بېکارۍ د کچې د ټيټوالي لپاره د افغان حکومت یوه ښه هڅه ده.
د ولسي جرګې یو شمېر غړي په دې باور دي چې د افغان حکومت د تازه پروګرام پلي کول کولای شي چې بهرینو هېوادونو ته د کارکولو په هدف د ځوانانو تګ کم کړي.
د ولسي جرګې یوه استازي محمد نذیز احمدزي د یکشنبې په ورځ ازادي راډیو ته وویل چې د دغه پروګرام په پلي کولو سره باید مسلکي او مستحقو ځوانانو ته کار ورکړل شي.
ښاغلي احمدزي وویل:
"کار باید په عادلانه او مساویانه ډول ځوانانو ته ورکړل شي دا ډول ونه شي چې د واسطهدار خلک په کار وګمارل شي او غریبانو ته کار ورنهکړل شي."
ښاغلي احمدزي په دولتي ارګانونو کې د۱۰ زرو کسانو د استخدامولو لپاره د یوه بې طرفه او مسلکي کمېسیون جوړول مهم بولي.
د نوموړي په خبره په دغه کمېسیون کې باید مسلکي کسانو ته غړیتوب ورکړل شي څوخپل کار په شفافیت پر مخ یوسي.
راپور: مرضیه احمدزۍ
