ارزګان ولایت کې د ولایتي شورا مسؤلینو د یکشنبې په ورځ ازادي راډیو ته وویل چې په دغه ولایت کې څه باندې ۸۰ زره جریبه دولتي ځمکه له تېرو ۱۶ کلونو راهیسې د زورواکو په لاس کې ده.
د دې ولایت د ولایتي شورا رئیس امیر محمد بارکزی وايي، مرکز او ولسوالیو کې یو شمېر لوړپوړو چارواکو پخوانیو جهادي قوماندانانو پر دولتي ځمکو خېټه اچولې چې په خبرهیې د ارزګان ولایتي اداره په دې ولایت کې یو جریب دولتي ځمکه هم نهلري.
نوموړی وايي، ارزګان کې زیاتره ولایتي ادارې کرايي کورونو کې ورځنۍ چارې مخ ته وړي.
ښاغلي بارکزي زیاته کړه:
"ارزګان کې ۴۰۰۰، ۵۰۰۰ جریبه دولتي ځمکه یو کس غصب کړې، تاسې وګورئ ارزګان کې د پوهنتون د ودانۍ لپاره دولت اوس ځمکه نهلري، نو زموږ له مرکزي حکومته دا هیله ده چې دغه ځمکه دې د دغه زورواکو څخه واخلي."
بارکزی وايي، په دې اړه ولایتي ادارې کابل ته راپورونه ورکړي خو لا ځوابیې نهدی موندلی.
له دې سره په ولسي جرګه کې د ارزګان د خلکو استازي عبیدالله بارکزي ازادي راډیو ته وویل چې د ځمکو د غصب موضوع کې خپله ولایتي اداره ضعیفه ده او غاصبین هم ولایتي چارواکو سره نېږدې اړیکې لري.
نوموړي له دولته غوښته وکړه چې ژر دې دغه غاصبین د قانون منګولو ته وسپاري.
نوموړي زیاته کړه:
"ولایتي ادارې ته هم معلومه ده چې ارزګان ولایت کې دولتي ځمکه چا غصب کړې، د ارزګان هر یوه کس ته هم معلومه ده، خو دولت خپله نهغواړي چې د دغو زورواکو له منګولو دغه ځمکه خلاصه کړي."
په ورته وخت کې د ارزګان د والي مرستیال عبدالواحد پټان هم د ولایتي شورا دغه څرګندونې مني، وايي چې اوس ارزګان کې امنیتي حالات خراب دي او کله چې دې ولایت کې امن راشي نو ډېر ژر به د ځمکو غاصبین د قانون منګولو ته وسپارو.
پټان زیاته کړه:
"واقعیت دی چې ارزګان ولایت کې دولتي ځمکې د زورواکو لهخوا غصب شوي، زموږ ولایتي اداره خپله په دې اړه معلومات لري، هغه هم د هغه کسانو لهخوا غصب شوي چې قوماندانان وو او یا یې هم د لوړپوړو چارواکو سره نېږدې اړیکې درلودې."
پټان وايي چې اوسيې یو شمېر ځمکې د غاصبینو څخه خلاصې کړي چې پهکې عملاً پارکونه او دې ته ورته د نورو دولتي ودانیو د جوړېدو کارونه روان دي.
راپور: شریفالله شرافت
