د اسپانیې د بهرنیو چارو وزیر تایید کړې چې په بامیان کې د دې هېواد اتباع وژل شوي دي.

پیدرو سانچیز تېره شپه په خپله ایکس‌پاڼه لیکلي، د اسپانوي وګړو د وژل کېدو په اړه خواشینی شوی٬ خو نوموړي دا نه‌دي لیکلي چې په دې پېښه وژل شوي بهرني سیلانیان ټول اسپانویان دي او که نه.

بل‌خوا رویټرز خبري اژانس د اسپانیا د بهرنیو چارو وزارت په حواله راپور ورکړی چې تېره ورځ جمعه د دې هېواد درې وګړي په بامیان کې وژل شوي او یو بل ټپي دی.

د طالبانو حکومت وايي، د دې پېښې سره په تړاو یې ۴ تنه نیولي دي.

لا تر اوسه چا د دې حملې مسوولیت نه‌دی منلی.

د افغانستان د ازادۍ جبهه ادعا کوي چې په کابل کې یې د طالبانو د مشر په ساتونکو برید کې د هغوی درې تنه وژلي او یو بل یې ټپي کړی دی.

دې جبهې تېره شپه ناوخته په خپله ایکس‌پاڼه لیکلي، چریکیانو یې دا برید پرون ماښام د کابل د شاه دو شمشېره جومات تر څېرمه د ارګ په موقتي کمربند کې د ملاهبت‌الله د ځانګړي ځواک په وسله‌والو وکړ.

دا په داسې حال کې ده چې د طالبانو حکومتي چارواکو منلې چې د دوی مشر له څو ورځو راهیسې په کابل کې دی او د والیانو په یوه غونډه کې یې هم ګډون کړی دی.

د طالبانو حکومت د کورنیو چارو وزارت د لوګر په محمداغې ولسوالۍ کې د تېرې شپې چاودنه په سیمه د پخوانیو چاودېدونکو توکو د چاودنې پایله ګڼي.

د دې وزارت ویاند عبدالمتین قانع په خپله ایکس‌پاڼه لیکلي، تېره شپه ۱۲نیمې بجې د د دوی ځانګړو ځواکونو د تعلیمي مرکز "شکار قلعه" ته نږدې یوه اندازه پخواني چاودېدونکي توکي چې په یو ځای کې ایښودل شوي و، د دوی د یوه عسکر د بې‌ احتیاطۍ له امله چاودېدلي دي.

قانع زیاته کړې چې په دې چاودنه کې چا زیان نه‌دی رسېدلی.

خو په ټولنیزو رسنیو کې خپرې شوې وېډیوګانې او معلومات ښيي چې چاودنه زوروه او ان تر لېرې سیمو کې د ځینو کورونو ښېښې ماتې کړي دي.

د افغانستان کرکټ بورډ وايي، د کرکټ ملي لوبډله به په ویسټ انډیز کې د راروان نړیوال جام لپاره خپل لس ورځنی تمریناتي کمپ پیل کړي.

د دغه بورډ ویاند سید نسیم سادات پرون ازادي راډیو ته وویل، ملي لوبډله ویسټ انډیز ته تللې ده.

هغه وايي: "د افغانستان هغه لوبغاړي به چې په آي‌پي‌ایل IPL کې لوبېدل ډېر ژر له ملي لوبډلې سره یوځای شي. مخکې تر دې چې دوی خپلې رسمي لوبې وکړي، دوی به په ویسټ انډیز کې لس ورځې تمرینات وکړي. افغان ټیم دوې دوستانه لوبې هم لري، چې یوه له عمان او بله له سکاټلنډ سره ده."

په نړیوال شل اووره جام کې به، د افغانستان لومړۍ رسمي لوبه د جون میاشتې پر څلورمه له یوګانډا سره وي، بیا به له نیوزیلنډ، پاپوانیوګیني او ویسټ انډیز سره لوبې کوي.

په جنوبي افریقا کې په یوه نړېدلې ودانۍ کې د بیارغونې د نږدې شلو تري تم شویو کارګرو د موندنې لپاره د پلټنې عملیات، چې له دوو اوونیو روان وو، پرون جمعه پای ته ورسېدل.

دا عملیات د چارواکو په غوښتنه پرون پای ته ورسول شول.

چارواکي وايي، د یوې پنځه پوړیزې ودانۍ د نړېدو په پېښه کې ۳۳ کسان مړه شول او د ۱۹ نورو کارګرو د برخلیک په باب معلومات نه وو.

چارواکي فکر کوي، دغه کسان به د مې میاشتې پر شپږمه د دې نیم کاره ودانۍ تر نړېدو وروسته تر کنډوالو لاندې شوې وي.

دغه ودانۍ چې د رغونې کارونه یې روان وو، د جنوبي افریقا په جنوبي ښار جورج کې ونړېده.

په لبنان کې د اسراییل په تازه حمله کې د وژل شویو کسانو شمېر درېیو ته رسېدلی او په پېښه کې ګڼ نور ټپیان شوي دي.

د لبنان یوې امنیتي سرچینې د جرمني خبري اژانس ته ویلي، په دې حمله کې چې پرون جمعه د لبنان په جنوبي ښارګوټي صیدا کې وشوه، د ایران له ملاتړه د برخمنې حزب‌الله ډلې یو غړی او دوه سوریايي کارګران وژل شوي دي.

صیدا ښارګوټی د اسراییل د شمالي سرحد په ۵۵ کیلومترۍ کې پروت دی.

د لبنان حزب‌الله ډلې هم د خپل یوه غړي وژل کېدل تایید کړي دي.

د اسراییل پوځ د حملې خبر تایید کړی او وايي، د حزب‌الله ډلې د هوايي دفاع هغه سنګر یې ویشتلی چې د اسراییل جنګي جېټ الوتکو ته یې خطر پېښ کړی و.

د ایران پولیسو پرون جمعه اعلان وکړ چې د درېیو اروپايي وګړو په ګډون یې تر ۲۵۰ زیات کسان د شیطان د عبادت یا شیطان پرستۍ په تور نیولي دي.

ایرنا دولتي اژانس د پولیسو د اعلامیې په حواله راپور ورکړی چې د "شیطان پرستۍ" د یوې شبکې دغه غړي د پلازمېنې تهران په لوېدیځ کې نیول شوي دي.

د ایران د پولیسو په وینا، په "شهریار" ښارګوټي کې د شیطان د عبادت د دودولو په تور دغه کسان تر پېژندنې وروسته نیول شوي چې په هغوی کې ۱۴۶ نارینه او ۱۱۵ ښځې شاملې دي.

پولیس وايي، دغه کسان په نامطلوب وضعیت کې وو چې پر کالیو، سر، مخ او وېښتانو یې د شیطان د پرستش ځانګړې نښې لیدل کېږي.

د ۲۰۰۹م کال په جولای میاشت کې هم د ایران پولیسو درې کسان په شمال لوېدیځ ولایت اردبیل کې د شیطان د عبادت کولو په تور نیولي وو.

ځینو ایراني رسنیو راپور ورکړی چې د طالبانو د صنعت او سوداګرۍ سرپرست وزیر ویلي، د طالبانو حکومت پر دې غور کوي چې له ایران سره د صادراتو او وارداتو اندازه ۱۰ میلیارد ډالرو ته ورسوي.

د ایران "ایسنا" او "عصر ایران" رسنیو پرون لیکلي چې نورالدین عزیزي د کازان فورم د پنځلسمې غونډې پر مهال د ایران د حلال صنعت د نندارتون د کتنې پر مهال دا خبره کړې ده.

د راپور له مخې، د طالبانو د صنعت او سوداګرۍ سرپرست وزیر ویلي، دوی غواړي د افغانستان پر پولو د ګمرکونو کاري موده ۲۴ ساعته کړي چې ورسره واردات او صادرات چټک شي.

د طالبانو د صنعت او سوداګرۍ وزارت ویاند عبدالسلام جواد مخکې ویلي وو چې په ۲۰۲۳م کال کې له ایران سره د افغانستان د سوداګرۍ اندازه یو میلیارد او ۷۳۹ میلیون ډالرو ته رسېدلې وه.

د ده په وینا، په دې اندازه ۲۹ میلیونه ډالره د افغانستان صادرات او پاتې یو میلیارد او ۷۱۰ میلیون ډالره له ایران څخه افغانستان ته د وارداتو اندازه وه.

د افغانستان لپاره د ایران د ولسمشر ځانګړی استازی او سفیر حسن کاظمي قُمي وايي، لا هم د سیمې د لیرې هېوادونو اقدامات د افغانستان د لانجې په حل کې ګټور نه دي تمام شوي.

قُمي دا خبره د افغانستان لپاره د ایټالیا له ځانګړي استازي جان­فرانکو پیټروزیلا سره په کتنه کړې ده.

قُمي پرون په خپله ایکس­پاڼه کې لیکلي چې په افغانستان کې د ناوړه وضعیت دوام، ښايي د اروپا لپاره د ګواښونو سرچینه شي.

د افغانستان لپاره د ایران د ولسمشر ځانګړي استازي لیکلي چې په دې کتنه کې یې د دوحې د درېیمې غونډې پر موضوعاتو هم خبرې وکړې.

د افغانستان لپاره د ملګرو ملتونو د سرمنشي ځانګړې استازې روزا اوتنبایووا په مارچ میاشت کې ویلي وو چې د دوحې د درېیمې غونډې لپاره چمتووالی روان دی.

پر افغانستان د دوحې دویمه غونډه د فبروري پر ۱۸مه او ۱۹مه شوې وه چې د ۲۵ هېوادونو او نړیوالو سازمانونو استازو په کې برخه اخیستې وه.

د ملګرو متلونو یو چارواکی وايي، په افغانستان کې هره ورځ چاودنې لږ تر لږه دوه کسان یا وژني یا هم ټپيان کوي.

د سولې د عملیاتو لپاره د ملګرو ملتونو د سرمنشي مرستیال ژان پیر لاکروا پرون پر خپله ایکس‌پاڼه لیکلي چې په هرو لسو تلفاتو کې ۸ یې د ماشومانو وي.

لاکروا لیکلي، خوشحاله دی چې افغانستان ته یې د خپل وروستي سفر پر مهال له هغو کسانو سره کتلي چې د دغه تهدید د کمولو او په وړاندې یې د اقدام هڅه کوي.

د ملګرو ملتونو دغه چارواکي لیکلي چې یوناما او شریکان یې د خپلو ژغورونکو بشري چارو د پرمخ بېولو لپاره ملاتړ ته اړتیا لري.

په افغانستان کې وخت ناوخت د پخواني شوروي اتحاد د مهال یا هم په تېرو شلو کلونو کې د طالبانو له‌خوا د ځای پر ځای شویو بمونو یا هم ناچاوده وسیلو په چاودنو کې خلکو ته مرګ‌ژوبله اوړي.