په لوګر کې دونیم زره د دولسمو ټولګیو زدهکوونکو او هغو ځوانانو ته چې د کانکور د تېرو کلونو په ازموینو کې بېنتیجې پاتې شوي، د کانکور د تیاري شپږ میاشتنۍ زدهکړې ورکړل شوې.
د کانکور د تیاري زدهکړې چې په وړیا ډول په یاد ولایت کې د وطنوال ښوونیز مرکز لهخوا د ملي سوداګر انجینر عبدالرحمن وطنوال په مالي مرسته ورکړل شوي، فارغانيې تمه څرګندوي چې د سږني کال د کانکور په ازموینو کې به خپلو انتخابي پوهنځیو ته لاره پیدا کړي.
د کانکور د تیاري د پروګرامونو فارغانو څخه تېره ورځ په لوګر کې یو ازمایښتي امتحان هم واخیستل شو، تر څو د تاکلي کمېټې له لوري د دې پروګرام مؤثریت او ګټورتوب وارزول شي.
د امتحان صحنې ته د لوګر والي محمد حلیم فدايي، د ولایتی شورا رئیس او غړي، د پوهنې ریاست مسؤلین، ملي سوداګر او د یاد پروګرام تمویلونکی انجنیر عبدالرحمن وطنوال، د ادارو رئیسان، قومي مشرانو او یو شمېر ځايي اوسېدونکي هم ورغلي وو.
د لوګر والي محمد حلیم فدايي
د لوګر والي حلیم فدايي یاد پروګرام ډېر ګټور او د ځوانانو لپاره ضروري وباله ده وویل:
"تر بلې هرې ورځې د خوشالۍ ورځ ده ځکه په دې ځای کې د سعادت، علم، انسانیت، افغانیت او اسلامیت استازي راټول دي، زه د عبدالرحمن وطنوال او د نوموړي ښوونیز مرکز د مسؤلینو او د هغو استادانو چې د پوهنې د کیفیت د لوړولو هڅې کوي منندوی یم. نور تاجران دې هم د دوی په پل ، پل کېږدي، وطنوال صیب په نورو خلکو کې د پوهنې د ملاتړ مادي او معنوي انګېزه ایجاد کړې، هر هغه څوک چې د پوهنې په اړه انګېزه ایجادوي زموږ لپاره د پوهنې سرلاری او رهبر دی."
د لوګر والي وړاندې وویل، زموږ اساسي ستونزه دا ده چې د علم تر څنګ کسب ته توجه نهکوو، د بېکارۍ یو علت دا دی چې کسب ته په سپک نظر ګورو، که زموږ زدهکوونکي له یوې اکاډمیکې ادارې فارغېږي، کله چې بېکاره وي باید له کسب استفاده وکړي تر څو د بېکارۍ پر مهال خلکو ته دا انګېزه ورنهکړي چې علم په درد نهخوري.
د کانکور د تیاري د پروګرام یو تن زدهکوونکی احمد سیر وايي، د دې پروګرام له تعقیب وړاندې يې اصلاً د کانکور د ازموینې لپاره هېڅ ډول تیاری نهلاره، خو اوس باوري دی چې د خپلې خوښې وړ پوهنځي ته به بریالی کېږي.
د غونډې په پای کې انجنیر عبدالرحمن وطنوال په خپلو لنډو خبرو کې د پوهنې په ارزښت رڼا واچوله او له ټولو خلکو یې هیله وکړه چې په خپلو بچیانو زدهکړې وکړي.
یاده دې وي، وطنوال ښوونیز مرکز په تېرو دیارلسو کلونو کې د ۳۵ میلیونه افغانیو په قیمت ۲۲ زره ځوانانو ته د کانکور د تیاري زدهکړې ورکړي دي.
راپور: نجیبالله الوخېل