د غزني والي عبدالکبیر متین وايي، د دې ولایت د سقوط لپاره د وسلهوالو طالبانو پلان شنډ شوی دی.
متین څرګنده کړه چې د "سلطان" په نوم پوځي عملیات د یکشنبې په ورځ پای ته ورسېدل او تمه لري چې امنیتي ستونزې به ورسره کمې شي.
عبدالکبیر متین دا خبر هم رد کړ چې وسلهوالو طالبانو غزني کې خلکو ته د پراخو حملو خبرداری ورکړی او ویېویل چې ولسي خلکو ته د هغوی خبرداری نوې خبره نهده.
ښاغلي متین د وسلهوالو طالبانو پسرلنیو عملیاتو ته چې د "عمري" په نوم پيل شوي وو، په اشاره کې څرګنده کړه چې د دې ولایت خلکو ته له ډېرې مودې راهیسې ګواښونه کېږي خو وسلهوالو پرمختګ نهدی کړی.
هغه زیاته کړه چې ۲۰ ورځې دمخه غزني کې د وسلهوالو طالبانو پر ضد عملیات پیل شول او په پایله کې درنه مرګ ژوبله ورواوښته.
عبدالکبیر متین زیاته کړه:
"غزني کې په وروستیو عملیاتو کې ۵۳۸ وسلهوال ووژل او زخمیان شول چې د هغوی د مړو شمېر ۳۷۰ او د زخمیانو ۱۶۸ ته رسېږي. په دې عملیاتو کې د هغوی وسلې او نور جنګي وسایل هم نیول شوي یا تخریب شوي دي. په دې عملیاتو کې په خواشینۍ وایم چې لږ تر لږه ۹۹ تنه زموږ د امنیتي ځواکونو له ډلې وژل شوي او زخمیان دي."
د غزني والي زیاته کړه چې د "سلطان" په نوم پوځي عملیات د دې ولایت د اندړو، ګیرو اودهیک ولسوالیو په شاوخوا کې شوي چې د پکتیکا لاره هم ورسره پرانیستل شوې ده.
هغه څرګنده کړه چې غزني کې د امنیتي وضعیت د ښه کولو لپاره له قومي مشرانو او د خلکو له استازو سره خبرې کوي او له دې لارې د وسلهوالو طالبانو او نورو ډلو لپاره د فعالیت ساحې د محدودولو هڅې یې پيل کړي دي.
عبدالکبیر متین وايي:
"زموږ ټوله تکیه پر پوځي عملیاتو نهده بلکې موږ له خپلو خلکو سره هم په تماس کې یو او هڅه کوو چې په ټول ولایت کې امنیت ټینګ شي. موږ دلته له دیني عالمانو، قومي مشرانو د خلکو له استازو سره پر خبرو او مشورو زیاته اتکا کوو او له هغوی غواړو چې د ځان د خپلو کورنیو او بچیانو لپاره د امنیت په ټینګولو کې مرسته وکړي."
وسلهوالو طالبانو تر اوسه غزني کې د وروستیو پوځي عملیاتو په اړه څه نهدي ویلي خو د افغانستان ملي دفاع او کورنیو چارو وزارتونو تر دې مخکې ویلي وو چې د "شفق ۲" په نوم وروستیو پوځي عملیاتو کې هم غزني ولایت شامل کړی و.
امنیتي ادارې وايي چې د مني او ژمي په میاشتو کې به پراخ پوځي عملیات وشي.
