د لاسرسۍ وړ لېنکونه

تازه خبر
پنجشنبه ۱۴ زمری ۱۴۰۰ کابل ۰۱:۲۴

نړۍ

روسیه وايي ترکیې ته د دافع هوا سیسټم پر ورکولو غور کوي 

مسکو وايي دوی ښايي ترکیې ته د دافع هوا د سیستم پر ورکولو غور وکړي.

د کرملین ویاند ډیمیټري پیسکوف د جمعې په ورځ د روسیې خبري اژانسونو ته وویل، دا موضوع د دې اوونۍ په سر کې په استانبول کې د روسیې د ولسمشر ویلادیمیر پوتین او د هغه د ترکي سیال رجب طیب اردوغان ترمنځ ملاقات کې یاده شوه.

پیسکوف د دواړو هېوادونو د مشرانو ترمنځ د اکټوبر د لسمې نېټې دې خبرو اترو ته په اشارې وايي، د توغندیو د بېلابېلو دفاعي سیستمونو یادونه وشوه او په دې خبرې وشوې چې که چېرې ترکیه وغواړي روسیه به ددې سیسټم د ورکولو پر بېلابېلو لارو غور وکړي.

بل خوا د ترکیې یو خصوصي تلویزوني چینل د ترکیې د بهرنیو چارو د وزارت د یوې سرچینې په حواله د دې اوونۍ په پیل کې ویلي وو چې انقره د روسیې د وړاندیز منلو ته چمتو ده، ځکه ترکیه غواړي د اوږده واټن د هوايي دفاع سیستم ولري.

د تېرکال په نومبر کې د ترکیې له خوا د روسیې د یوې جیټ الوتکې نسکورولو د روسیې او ترکیې ترمنځ له سړې جګړې را وروسته تر ټولو ناوړه کړکېچ رامنځ ته کړی و، خو اوس د دواړو هېوادونو اړیکې په ناڅاپي ډول تودې شوې دي.

د ورځې تازه خبرونه دلته ولولئ

امریکا: ایران هغه بېړۍ یرغمل کړې وه چې د پاناما بیرغ پرې رپېده 

د امریکا د بهرنیو چارو وزارت ویاند نېډ پرایس

امریکایي چارواکي ګمان کوي چې عمان خلیج کې ایراني ځواکونو هغه بېړۍ یرغمل کړې وه چې د پاناما بیرغ پرې رپېده.

د امریکا د بهرنیو چارو وزارت ویاند نېډ پرایس ویلي، هغه کسان چې دا بیړۍ یې پرون چهارشنبه (د زمري ۱۳مه برمته کړې وه ایرانیان و، خو په خبره یې سملاسي داسې حالت کې نه دي چې دا خبره تایید کړي.

د بریتانیا سمندري ځواکونو پرون وویل، د متحده عربي اماراتو ساحل ته نژدې دا بېړۍ چې قیر په کې بار و، له برمته کېدو وروسته بېرته خوشې شوې ده.

د ایران سپاه پاسداران انقلاب بیا ویلي، دوی دې پېښه کې لاس نه لري.

روسیه کې دوه خبري چینلونه چې پر کرملین یې نیوکې کولې، تړل شوي

کرملین ماڼۍ

د روسیې د رسنیو چارواکو دغه هېواد کې دوه خبري چینلونه چې پر کرملین یې نیوکې کولې، تړلي دي.

د 'Open Media' او 'MBKH' په نوم دغو چینلونو پرون وویل چې کاروونکي یې د دوی وېب پاڼو ته لاس رسی نه لري.

دوی ویلي، تراوسه یې د چارواکو له خوا هېڅ داسې معلومات نه دي ترلاسه کړي چې وښيي، ولې یې د دوی رسنۍ تړلې دي.

د ازادو رسنیو پر وړاندې د روسیې دا تازه ګام داسې مهال پورته کېږي چې دغه هېواد کې راتلونکې سېپټمبر میاشت پارلماني ټاکنې کېږي.

دا دوه خبري چینلونه د کرملین د منتقد میخایل خودورکوسکي له خوا حمایه کېږي، نوموړی روسیه کې له لس کلن زندان وروسته لندن ته تللی دی.

امریکا: د ایران اټمي موافقې په اړه د خبرو ۷م پړاو کې ګډون ته چمتو یو

د امریکا د بهرنیو چارو وزارت ویاند نېډ پرایس

د امریکا د بهرنیو چارو وزارت وايي، واشنګټن تیار دی چې په ویانا کې د ایران د اټمي موافقې په اړه د خبرو اترو په اووم پړاو کې ګډون وکړي.

د دغه وزارت ویاند نېډ پرایس وویل، په زغرده یې ویلي چې لا هم په دې باور دی چې د تل لپاره او په حقیقي معنی د اټمي وسلې له ترلاسه کولو د ایران راګرځول یې په ګټه دي او خبرې اترې په دې برخه کې تر ټولو اغېزمنه لار ده.

د امریکا د بهرنیو چارو وزارت ویاند ټینګار وکړ چې د ایران حکومت باید په خپل سیستم کې دننه پرېکړه وکړي چې کومه لار غوره کوي؟

ده دا هم وویل چې ټول په دې سره سلا دي چې ایران باید هېڅکله اټمي وسله ترلاسه نه کړي.

بریتانیا: عمان خلیج کې بېړۍ تښتونکي له یوې بېړۍ وتلي

ارشیف، عکس تزئیني بڼه لري

د بریتانیا سمندري ځواک ویلي چې په عمان خلیج کې د متحده عربي اماراتو سواحلو ته نژدې بېړۍ تښتونکي له یوې بېړۍ وتلي دي.

هغوی وروسته له دې ووتل چې د بریتانیا د سمندري سوداګرۍ د امنیت ادارې تېره شپه د بیړۍ تښتول کېدو د احتمال خبر ورکړ.

لوېډ لېست او دریاد ګلوبل شرکتونو ویلي چې تښتونکو غوښتل چې هغه بېړۍ وتښتوي چې قیر په کې بار وو او د پاناما بیرغ پرې ځوړند و.

امریکا او نورو هېوادونو ترلاسه کړي لرغوني اثار عراق ته وسپارل

د عراق ځینې لرغوني اثار

هغه څه باندې ۱۷زره لرغوني اثار چې د امریکا له متحدو ایالاتونو او نورو هېوادونو ترلاسه شوي وو، بېرته د عراق د کلتور وزارت ته وسپارل شول.

د عراق حکومت پرون د دغو اثارو د تسلیمۍ پرمهال دا د دغه هېواد په تاریخ کې د لرغونو اثارو د ستنولو تر ټولو پراخ مورد بللی دی.

د عراق صدراعظم مصطفی کاظمي ویلي، د دغو اثارو لویه برخه څلور زره کاله لرغونتیا لري چې امریکا ته یې په وروستي سفر کې تسلیم کړي دي.

د عراق د بهرنیو چارو وزیر، فواد حسین پرون د کلتور له وزیر سره یوځای یوه کنفرانس ته وویل، نور اثار له جاپان، هالنډ او ایټالیا څخه ترلاسه شوي دي.

له ۲۰۰۳میلادي کال راهیسې د جګړې او بې ثباتۍ پرمهال د عراق ګڼ انتیک او لرغوني اثار لوټ شول.

د اوکراین پولیس وايي د بلاروس د فعال ویتال شیشو د مشکوک قتل قضیه څېړي

د اوکراین د کورنیو چارو وزیر د بلاروس د فعال ویتال شیشو د مشکوک قتل قضیې په اړه د څرګندونو پر مهال

د اوکراین پولیسو نن وویل چې دوی د بلاروس د فعال ویتال شیشو د مشکوک قتل قضیه څېړي.

د ویتال شیشو جسد په پلازمېنه کیف کې خپل کور ته نږدې وموندل شو.

د بلاروس کور په نوم د شیشو غیر دولتي مؤسسه له هغو خلکو سره چې د الکساندر لوکاشینکا د رژیم له ځورونو او زور زیاتي څخه تښتېدلي دي، مرسته کوي.

په بلاروس کې د ۲۰۲۰ کال په اګسټ کې د ولسمشرۍ تر انتخاباتو وروسته چې په‌کې لوکاشینکا د شپږم دور لپاره بریالی اعلان شو، پراخې مظاهرې وشوې او دا مظاهرې د لوکاشینکا له لوري سختې وځپل شوې.

ویتال شیشو پرون په کیف کې ورک شو او نن د کیف په یوه پارک کې د ده مړی راځوړند پیدا شو.

بلاروس کې یو خبریال لوکاشېنکا ته د سپکاوي په تور په بند محکوم شو

د بلاروس مستبد واکمن الکساندر لوکاشېنکا

په بلاروس کې یو خبریال د دې هېواد مستبد واکمن الکساندر لوکاشېنکا ته د سپکاوي په تور په اتلس میاشتې بند محکوم شو.

د سیارها هارد زیویچ په اړه د محکمې پرونی (د زمري ۱۱مه) حکم پر رسنیو او د بشري حقونو پر فعالانو د بلاروس د رژیم د پراخو ځپونکو اقداماتو یوه برخه ده.

۵۰ کلن هاردزیویچ چې د پلازمېنې مېنسک په ۳۰۰ کیل ومترۍ کې د دراهیښین ښار اوسېدونکی دی، د شپاړلس سوه ۱۶۰۰ امریکايي ډالرو په نغدي جریمه هم محکوم شوی دی.

څارنوالانو ویلي دي چې دې خبریال د ټلیګرام شبکې د خبرو اترو په یوه ګروپ کې لوکاشینکا ته سپکاوی کړی دی.

د بشري حقونو مدافع ډلو سیارها هارد زیویچ سیاسي محبوس بللی او د ده پر وړاندې د لوکاشینکا د رژیم اقدام یې غندلی دی.

د ترکیې ځنګلونو کې اور لګېدنه؛ تر اوسه ۸ کسان وژل شوي

د ترکیې په ځنګلونو کې لګیدلی اور

د ترکیې په ځنګلونو کې د اور لګېدو د دوام له کبله تر اوسه د لږ تر لږه اتو کسانو د مړینې خبر ورکړل شوی دی.

د ترکیې د جنوب په ځنګلونو کې دا اور اووه ورځې مخکې ولګېد چې په ترڅ کې تر ډېره د دې هېواد ساحلي ښارونه چې د کال په دې موسم کې سیلانیان ورته راځي، زیانمن شول.

د ترکیې د ځنګلونو وزیر باقر پاګدیمیرلي پرون د اګسټ په دوهمه وویل چې دوی تر دې دمه په ۱۲۵ ساحو کې لګېدلی اور کنټرول کړی دی.

نوموړي زیاته کړه چې د دې اور د لګېدو علتونه سخته تودوخه او تُند بادونه دي.

د راپورونو له مخې د متضررو سیمو زرګونه اوسېدونکو خپل کورونه پریښي او یو شمېر سیلانیان هم له خپلو هوټلونو څخه وتلي او ځانونه یې امن ځایونو ته رسولي دي.

اروپايي ټولنې ویلي دي چې د اور وژنې درې الوتکې د مرستې لپاره ترکیې ته استوي.

انقره وايي چې له اوکراین، روسیې، ایران او آذربایجان څخه یې هم د اور وژنې د الوتکو غوښتنه کړې ده.

د المپیک نړیواله کمېټه وايي د بلاروس منتقده لوبغاړې اوس بشپړ خوندیتوب کې ده

د بلاروس د حکومت منتقده لوبغاړې کریسټینا تسیمانوسکایا

د المپیک نړیواله کمېټه (IOC) وايي د بلاروس د حکومت منتقده لوبغاړې کریسټینا تسیمانوسکایا چې په زور خپل هېواد ته لېږل کېده اوس په بشپړ خوندیتوب کې ده.

کریسټینا تسیمانوسکایا چې تمه وه نن په المپیک کې ولوبېږي د بلاروس د روزونکو له‌خوا اړ ایستل شوې وه چې په یوه پرواز کې بېرته بلاروس ته ستنه شي.

که څه هم روزونکو ویلي چې د هغې روحي حالت ښه نه‌و او د ډاکترانو په توصیه‌یې دا کار کړی، خو کریسټینا په خپل انستاګرام باندې د بلاروس په المپیک کمېټې او چارواکو له دې خاطره انتقاد کړی و چې د ډوپېنګ د ازموینې د وسایلو د نشتوالي له امله ګڼې ښځې المپيک ته له راتلو بې‌برخې شوې.

دې بلاروسۍ لوبغاړې د پناه غوښتنه کړې او د ملګرو ملتونو د کډوالو عالي کمېشنرۍ له‌خوا یې غوښتنه پروسس کېږي. د چک جمهوریت او پولنډ اعلان وکړ چې دوی چمتو دي هغې ته ویزه ورکړي.

د بلاروس اجنټانو د یکشنبې په ورځ د اګسټ په لومړۍ کریسټینا د هغې د خوښې خلاف هوایي ډګر ته بوتله، مګر جاپاني پولیسو د هغې د جبري ایستلو مخه ونیوله.

ترکیه کې د ځنګلي سیمو د اورلګېدنې په دوام د مړو شمېره شپږ تنو ته لوړه شو

ترکیه کې د ځنګلي سیمو اورلګېدنه

په ترکیه کې د ځنګلي سیمو د اورلګېدنې په دوام د مړو شمېره شپږ تنو ته لوړه شوې او زرګونه د خپلو کورونو پرېښودو ته اړ شوي.

روېټرز راپور ورکړی چې اور وژونکي لاهم په ساحلي ښارونو مانوګات او مارماریس کې د اور د قابو کولو لپاره کار کوي.

د ترکیې د ځنګلونو وزیر بیکر پاکدیمیرلي په وینا، په دې سیمو کې اورونه لاهم د سختې تودوخې او باد له امله روان دي.

د ترکیې د ځنګلونو وزارت اعلان کړی چې په تېرو څو ورځو کې د ۱۱۲ سیمو څخه چې اورونه په‌کې بل دي د شااوخوا ۱۰۷ سیمو اورونه تر یکشنبې پورې کنټرول شوي.

په ترکیه کې پراخه اورونه چې درې ورځې دمخه د ترکیې سیاحتي ښارونو او ځنګلي سیمو لکه انتالیا، بودوروم، مارماریس او مرسین کې پیل شوي، په زرګونه سیلانیان د دې سیمو د هوټلونو او تفرېح ځایونو پرېښودو ته اړ کړي.

د المپیک لوبې؛ چین د مډالونو په حساب تر امریکا مخکې شو

المپيک لوبو کې د (ښی-کین) چین، روسیې او جنوبي کوریا لوبغاړې

د توکیو په المپیک کې چین د مډالونو په حساب پرون یو دم تر امریکا مخکې شو.

امریکا تر پرون اګسټ لومړۍ پورې د سرو زرو، سپینو زرو او برنزو د مډالونو په اساس لومړی و، خو چین په څو برخو کې اتلولي ترلاسه کړه او د سرو څلورو مډالونو په توپیر یې لومړی کتار ترې ونیوه.

په المپيکي لوبو کې د سرو زرو د مډالونو شمېر د نورو مډالونو تر شمېر څو چنده اهمیت لري او د هېوادونو په درجه‌بندۍ کې خورا رول لوبوي.

دمګړۍ چینايي لوبغاړي ټول ۵۳ مډالونه لري چې په‌کې د سرو زرو ۲۴ مډالونه شامل دي.

امریکا که څه هم ۶۰ مډاله لري، خو ۲۰ یې د سرو زرو دي او په دې حساب دوهمه ده. کوربه جاپان بیا ۳۱ مډالونه لري چې له نیمايي زیات یعنې ۱۷یې د سرو زرو دي.

د توکیو المپیکي لوبې د جولای په ۲۳مه پیل او د اګسټ په اتمه ختمېږي.

له مدیترانې سمندرګي اووښتونکي تر ۷۰۰ زیات کسان وژغورل شول

ارشیف

یو مرستندوی بنسټ وايي، تر ۷۰۰ زیات کسان چې هڅه‌یې کوله په وړو کښتیو کې له مدیترانې سمندرګي واوړي، ژغورل شوي دي.

د اېس‌اواېس مدیتراني (SOS Mediterranee) په نوم مرستندویې ډلې پرون ویلي چې د ژغورنې ډېری عملیات د لیبیا او مالتا سواحلو ته څېرمه شوي دي.

اېس‌اواېس مدیتراني ډله وايي، دغه پناه غوښتونکي د لرګیو په کښتیو کې سپاره وو چې د دوی مرستندویې کښتۍ د دوی مرستې ته ورغلې.

راپورونه وايي په کښتیو کې سپاره پناه غوښتونکي د لیبیا او تونس وګړي وو چې هڅه‌یې کوله ځانونه د اروپايي ټولنې غړو هېوادونو ته ورسوي.

د ملګرو ملتونو په حواله په روان میلادي کال کې د مدیترانې په مرکزي برخو کې ۹۳۰ پناه غوښتونکي مړه شوي دي.

جرمني کې پر مظاهرو له بندیز سره سره زرګونه کسان سړکونو ته په اعتراض راوتي

ارشیف، جرمني کې مظاهرې

په جرمني کې پر ځینو مظاهرو له رسمي بندیز سره سره په زرګونه کسان په پلازمېنه برلین کې لارو سړکونو ته په اعتراض راووتل.

دوی د حکومت پر هغو مقرراتو اعتراض وکړ چې د کرونا ویروس د خپرېدو د مخنیوي لپاره‌یې لګولي دي.

پولیسو پرون وویل چې ځینو مظاهره‌چیانو پولیس ځورولي او حمله‌یې ورباندې کړې او د برلین په ځینو برخو کې د ټرافیکو د جریان د ګډوډۍ لپاره‌یې د څنګلارو خنډونه ټېل وهلي دي.

د پولیسو یوه ویاند وویل چې شااوخوا ۵،۰۰۰ کسانو په مظاهره کې برخه اخیستې وه چې تر ۶۰۰ زیات‌یې نیول شوي دي.

لبنان کې د پنځو وژل شویو ډله کې د حزب‌الله ډلې درې غړي هم شامل دي

د حزب‌الله ډلې بیرغ

د لبنان د پلازمېنې بیروت په جنوب کې د پنځو وژل شویو په ډله کې د حزب‌الله ډلې درې غړي هم شامل دي.

د لبنان امنیتي چارواکي وايي، دغه کسان پرون په هغه حمله کې وژل شوي چې د دې ډلې د یوه وژل شوي غړي د جنازې پر مراسمو وشوه.

پرون د لبنان د دې شیعه ډلې د غړو او ځایي سني اوسېدونکو ترمنځ په وسله‌واله نښته کې چې په خلده سیمه کې وشوه، ګڼ نور کسان ټپیان شوي دي.

ایران د حزب‌الله ډلې ملاتړ کوي.

د جنازې مراسم د حزب‌الله ډلې د هغه غړي و چې تر دې یوه شپه مخکې وژل شوی و.

پاکستان کې د پولیو واکسین د ټیم دوه ساتونکي پولیس په نښه کړل

ارشیف، پېښور کې د پولیو واکسین ټیم سره ساتونکي پولیس

پاکستاني چارواکي وايي وسله‌والو بریدګرو د پاکستان دوه هغه پولیس افسران په نښه کړي چې د پولیو واکسین د ټیم امنیت‌یې ساته.

برید موټرسایکل سپرو کسانو پرون په پېښور ښار کې کړی دی.

د برید په نتیجه کې د پاکستان د پولیسو یو افسر وژل شوی او يو بل ټپي دی.

د واکسین د ټیم غړو ته زیان نه‌دی رسېدلی.

دا پېښه پرون د خېبر پښتونخوا په مرکز پېښور کې شوې ده.

تحریک طالبان پاکستان (TTP) د دغه برید مسؤلیت منلی دی.

پاکستان د جولای په ۳۰مه د پولیو واکسین پنځه ورځنی کمپاین پیل کړ او تمه کېږي چې په خېبر پښتونخوا کې درې ملیونه او اووه لکه ماشومان د پولیو په وړاندې واکسین شي.

نور راوښيه

XS
SM
MD
LG