په کابل کې یو شمېر ځوانانو د افغان حکومت د سولې له هڅو ملاتړ وکړ او ویېویل چې حکومت باید د سولې د ټینګښت لپاره نهستړې کېدونکې هلې ځلې وکړي.
د پکتیکا ولایت یو شمېر ځوانان د افغان حکومت او حزباسلامي تر منځ روغه جوړه مهم ګام بولي او وايي چې دې کار په افغانستان کې ثبات ټینګېدو ته خوشبینه کړي دي.
دوی چې شمېر یې لسګونو کسانو ته رسېده د پنجشنبې په ورځ په کابل کې سره راغونډ شوي وو او ویلیې چې ډېری افغانان د سولې د بهیر ملاتړ کوي نو حکومت باید دې هڅو ته دوام ورکړي.
د غونډې یوه جوړونکي محمد ابراهیم افضلي دې ناستې ته وویل، د دې وخت راغلی چې هر څوک د سولې د سفیر په حیث کار وکړي.
ښاغلي افضلي زیاته کړه:
"څلوېښت کاله کېږي چې په دې هېواد کې جنګ دی هره ورځ زموږ او تاسې ځوانان متأثره دي نو باید موږ تاسې ټول له ځانه د سولې سفیران جوړ کړو، څو دا هېواد د دې بدبختۍ او جنګ نه خلاص کړو."
د ځوانانو د چارو معین کمال سادات دې غونډې ته وویل چې د سولې لپاره به د ځوانانو په مټ یو ملي کمپاین پیل کړي څو د دې بهیر په وړاندې شته ځيني شکونه کم شي.
ښاغلي سادات زیاته کړه:
"موږ ځوانان یو او د سولې لپاره به ملي کمپاین پیلوو دا ملي کمپاین به د خپل ځان، کورنیو، کلیو، ولسوالیو، ولایتونو او افغانستان په کچه وي دا به هر ځای وي څو هر چاته د سولې پیغام او بلنه ورسېږي."
دا په داسې حال کې ده چې افغان حکومت تېره پنجشنبه د حزباسلامي له مشر ګلبدین حکمتیار سره د سولې تفاهملیک لاسلیک کړ.
حزب اسلامي سره د سولې خبرو له وروستي کېدو سره په بېلابېلو ولایتونو او کابل کې د حکومت او حزباسلامي تر منځ د پخلاینې له دې بهیره د خلکو هرکلي غونډې کېږي او دا ګام یو تاریخي پرمختګ یادوي.
خو د دې تر څنګ بیا ځیني ګوندونه او ټولنې اندېښنه څرګندوي چې حکومت باید د سولې په بدل کې عدالت قرباني نهکړي.
د جګړو د قربانیانو لپاره د عدالت غوښتنې غورځنګ غړو د پنجشنبې په ورځ د کابل په شهرنو پارک کې په همدې اړه اعتراضیه غونډه رابللې وه او د حزباسلامي سره د سولې پر ضد یې شعارونه ورکول.
د رسولي په نوم د دې غورځنګ غړي د اعتراض غونډې پرېکړهلیک ولوست چې په یوه برخه کې یې راغلي وو:
"په داسې حال کې چې موږ د سولې غوښتونکي یو خو داسې سوله چې عدالت پهکې قرباني شي په رسمیت نهپېژنو. موږ رسماً د حکمتیار او حکومت تر منځ پر تړون اعتراض لرو او د حکمتیار قضایي مصؤنیت باید لیرې شي. د ګلبیدین حکمتیار او نورو جنګي جنایتکارانو داسې بخښل د جنګ د قربانیانو حقوق او د عدالت ټینګښت تر پوښتنې لاندې راولي."
خو نړیوالې ټولنې د افغانستان د ستونزې حل د سولې خبرې بللي او د حزب اسلامي سره له روغې جوړې یې هرکلی کړی دی.
افغان حکومت هم د حزباسلامي سره د سولې د تفاهملیک لاسلیک یوه لاسته راوړنه بولي او هیلهیې ښودلې چې نورې وسلهوالې ډلې هم بینالافغاني خبرو ته کېني.
راپور: یوسف خان ځدراڼ
